Si Jesus Mao ang Maayong Magbalantay

Gisultihan ni Jesus ang mga tawo sa Jerusalem nga Siya sama sa usa ka maayong magbalantay. Ang Iyang mga disipulo, o mga sumusunod, sama sa Iyang karnero. Ang maayong magbalantay nahigugma sa iyang mga karnero Nakaila siya sa ngalan sa matag usa.

Juan 10:3, 14; tan-awa usab sa Helaman 15:13

Ang mga karnero nakaila sa tingog sa maayong magbalantay. Kon motawag siya nila, sila maminaw ug mosunod.

Juan 10:4, 27

Ang maayong magbalantay moatiman sa iyang mga karnero. Mogiya siya kanila ngadto sa balilihan, sama nga si Jesukristo mogiya nato ngadto sa kinabuhing dayon.

Juan 10:9–10, 28

Kon adunay lain nga suholan sa pag-atiman sa mga karnero, dili sila mosunod kaniya, tungod kay sila wala makaila sa iyang tingog. Kon moabot ang kakuyaw, ang sinuholan nga tawo modagan. Wala siyay pagpakabana sa mga karnero sama sa maayong magbalantay.

Juan 10:5, 12–13

Ang maayong magbalantay dili modagan kon adunay kakuyaw. Magpabilin siya aron sa pagpanalipod sa Iyang mga karnero. Andam gani siya sa paghatag sa iyang kinabuhi alang kanila, sama ni Jesukristo nga mihatag sa Iyang kinabuhi alang nato aron nga kita makabaton og kinabuhing dayon.

Juan 10:11, 17–18

Gisultihan ni Jesus ang mga tawo sa Jerusalem nga Siya usab adunay laing mga karnero nga nagpuyo sa ubang mga dapit. Miingon si Jesus nga Siya mobisita usab kanila, ug sila maminaw sa Iyang mga pagtulun-an. Ang Basahon ni Mormon nagsulti mahitungod ni Jesus nga nagbisita sa pipila sa Iyang laing mga karnero sa Amerika.

Juan 10:16; 3 Nephi 15:11–24