Nagpakita si Jesus ngadto ni Saulo

Si Saulo usa ka Pariseo—usa ka lider sa mga Judeo kinsa nahibalo usab sa mga kasulatan. Apan si Saulo wala mituo nga si Jesus mao ang Manluluwas. Kasagaran gibilanggo niya ang mga sumusunod ni Jesus sa bilanggoan. Usa ka adlaw mibiyahe si Saulo ngadto sa usa ka siyudad nga gitawag og Damasco sa pagdakop sa pipila ka mga sumusunod ni Kristo ug sa pagdala kanila ngadto sa Jerusalem aron pagasilotan.

Mga Buhat 9:1–2; 22:4–5; 26:5

Samtang si Saulo mibiyahe, sa kalit usa ka kahayag misanag diha kaniya. Kini mas hayag kay sa adlaw. Natumba si Saulo sa yuta. Nadungog niya ang usa ka tingog nag-ingon, “Saulo, Saulo.” Dayon ang tingog nangutana kon nganong siya nakig-away batok ni Jesus ug nagpasakit sa Iyang mga disipulo.

Mga Buhat 9:3–4; 26:13–14

Nangutana si Saulo kon kinsa ang namulong. Ang tingog miingon, “Ako mao si Jesus.” Nahadlok si Saulo ug natingala. Siya nangutana kang Jesus unsay angay niyang buhaton. Misulti si Jesus ni Saulo, “Tindog, ug lakaw ngadto sa siyudad.” Didto iyang mahibaloan unsa ang kinahanglan niyang buhaton sunod.

Mga Buhat 9:5–6

Misunod si Saulo ug mitindog. Apan siya karon buta. Dili siya makakita og bisan unsa. Ang mga tawo kinsa mibiyahe uban kaniya migiya kaniya ngadto sa siyudad sa Damasco. Sulod sa tulo ka adlaw, si Saulo wala mikaon ni miinom bisan unsa.

Mga Buhat 9:8–9

Usa sa mga disipulo ni Jesus kinsa mipuyo sa Damasco mao si Ananias. Mibisita si Jesus ni Ananias sa usa ka panan-awon ug misulti kaniya sa pag-adto ug sa pagtabang ni Saulo.

Mga Buhat 9:10–12

Apan naglibog si Ananias. Nakadungog siya kabahin ni Saulo. Nahibalo siya unsa ka grabe ang pakig-away ni Saulo batok sa mga disipulo ni Jesus.

Mga Buhat 9:13–14

Mihangyo si Jesus ni Ananias sa pagtabang lang gihapon ni Saulo. Miingon si Jesus nga Siya mipili ni Saulo sa pagdala sa Iyang ebanghelyo ngadto sa daghang katawhan kinsa dili mga Judeo ug wala mahibalo mahitungod Kaniya.

Mga Buhat 9:15–16

Si Ananias nisunod ni Jesus. Nakaplagan niya si Saulo ug mihatag kaniya og panalangin. Mitawag si Ananias kaniya og “Igsoong Saulo.”

Mga Buhat 9:17

Miingon si Ananias nga si Jesus mipadala kaniya aron si Saulo mamaayo ug mapuno sa Espiritu Santo. Diha dayon, si Saulo nakakita og balik.

Mga Buhat 9:17–18

Nabunyagan si Saulo. Dayon gitudloan niya ang tanan diha sa siyudad mahitungod ni Jesukristo. Nahibulong ang mga tawo nga si Saulo nausab og dako kaayo. Sa nahibilin sa iyang kinabuhi, gitawag si Saulo og Pablo. Gitudloan niya ang tanang mga tawo, mga Judeo ug daghan pang uban, sa pagtuo ni Jesus. Si Pablo nahimong usa ka Apostol ni Jesukristo.

Mga Buhat 9:18–22, 29–31; 13:9