Ang Manluluwas Natawo

Ang saad sa Dios natuman

Si Jose ug Maria nga nagbiyahe paingon sa Betlehem.

Si Jose ug Maria mipuyo sa Nazaret. Si Maria padulong na nga manganak. Ang tanan kinahanglan nga moadto sa ilang lungsod nga natawhan aron mobayad og buhis. Nagpasabot kini nga si Jose ug Maria kinahanglan nga moadto sa Betlehem, sa lungsod nga natawhan ni Jose. Layo kaayo ang ilang biyahion aron makaabot didto.

Lucas 2:1–5

Si Maria ug si Jose nga didto sa Betlehem.

Ang panaw dili sayon alang kang Maria. Tungod kay daghan kaayong tawo ang nangadto sa Betlehem, si Maria ug si Jose walay makita nga dapit alang ni Maria sa iyang pagpanganak.

Lucas 2:6–7

Si Maria ug Jose nga nagsapnay sa bag-ong natawo nga bata nga si Jesus.

Nakakita sila og dapit diin sa kasagaran adto ipasilong ang mga hayop. Sa usa ka luoy nga dapit, natawo si Jesus. Gihigugma ug gipangga ni Maria ug Jose ang bata nga si Jesus. Giputos nila Siya og panapton aron mainitan ug komportable. Gipahimutang nila siya sa usa ka pasungan, nga sa kasagaran maoy gamiton sa pagpakaon sa mga hayop.

Lucas 2:6–7

Usa ka anghel nga nagpakita ngadto sa pundok sa mga tigbalantay sa karnero.

Didto sa duol, ang mga magbalantay sa karnero nagbantay sa ilang mga karnero sa pagkagabii. Sa kalit, usa ka sanag nga kahayag misanag libot kanila, ug usa ka anghel ang mipakita. Ang mga magbalantay sa karnero nangahadlok.

Ang anghel nga nagsulti sa mga magbalantay sa karnero nga si Jesus bag-o lang gayod nga natawo.

Ang anghel misulti kanila sa dili pagkahadlok, kay aduna siyay maayong balita! Ang Manluluwas natawo sa Betlehem, ug ila siyang makita nga naghigda sa pasungan. Dayon daghan pang anghel ang miabot, nag-ingon, “Himaya sa Dios sa kalangitan, ug sa yuta panagdait sa mga tawo nga iyang gikahimut-an.”

Lucas 2:10–15

Ang mga magbalantay sa karnero nga nagtimbaya sa bata nga si Jesus.

Ang mga magbalantay sa karnero nagdali og adto sa Betlehem ug nakita ang bata nga Jesus, sama sa giingon sa anghel. Gisultihan nila ang mga tawo mahitungod sa maayong mga butang nga ilang nakita ug nadungog. Nasayod sila nga si Jesus usa ka espesyal nga bata.

Lucas 2:16–17

Si Simeon nga nagkugos sa bata nga si Jesus.

Si Maria ug Jose midala sa bata nga si Jesus ngadto sa templo aron ipresentar Siya ngadto sa Dios. Didto nasugatan nila ang tawo nga ginganlan og Simeon. Ang Espiritu Santo misulti ni Simeon nga iyang mahimamat ang Manluluwas sa dili pa siya mamatay. Gisapnay niya ang bata ug miingon nga si Jesus moluwas sa tanan nga anak sa Dios. Si Jose ug si Maria nahibulong sa iyang gisulti.

Lucas 2:22–35

Si Ana nga nakigkita sa bata nga si Jesus.

Didto sa templo dunay laing tawo nga ginganlan og Ana. Ang iyang bana namatay mga tuig nang milabay. Karon si Ana migahin sa iyang tanan nga panahon sa pagsimba sa Dios sulod sa templo. Nagpasalamat siya sa Dios sa kahigayonan nga mahimamat ang Manluluwas. Sa matag higayon nga makakita siya og tawo nga naghulat sa Manluluwas, sultihan niya sila mahitungod ni Jesus.

Lucas 2:36–38

Maalamong mga tawo nga nakakita sa bag-ong bitoon nga nagpakita sa kalangitan.

Dihang natawo si Jesus, ang maalamong mga tawo sa laing dapit nakakita sa bag-ong bitoon. Nasayod sila nga nagpasabot kadto nga ang usa ka espesyal nga bata natawo kinsa mao ang Anak sa Dios ug Manluluwas sa kalibotan. Gisugdan nila ang taas nga panaw sa pagbisita niini nga bata ug pagsimba Kaniya. Gusto nilang dalhan Siya og mga gasa sa pagpakita sa ilang gugma alang Kaniya.

Mateo 2:1–7

Ang maalamong mga tawo nga nangita sa Manluluwas didto sa Jerusalem.

Human magbiyahe sulod sa dugay nga panahon, ang maalamong mga tawo miabot sa Jerusalem. Miingon sila nga usa ka bag-ong hari sa mga Judeo, ang Manluluwas, natawo, ug mangadto sila aron mosimba Kaniya. Nangutana sila kon asa nila makita ang bag-ong hari.

Mateo 2:1–2

Si Herod nga nagsulti sa iyang mga tawo sa pagpangita sa bag-ong hari.

Usa ka hari nga ginganlan og Herod nakadungog nga ang maalamong mga tawo nangita sa bag-o nga hari. Nabalaka siya. Ang iyang mga pari ug mga eskriba nag-ingon kaniya nga ang mga kasulatan nag-ingon nga ang bag-ong hari matawo sa Betlehem. Giingnan ni Herod ang maalamong mga tawo sa pagsusi didto sa Betlehem ug dayon mobalik ug sultihan siya kon makit-an nila ang bag-ong hari.

Mateo 2:3–8

Maalamong mga tawo nga misimba sa bata nga si Jesus.

Ang maalamong mga tawo miabot sa Betlehem. Gisunod nila ang bitoon, nga naggiya kanila ngadto kang Jesus. Dihang nakita nila Siya ug si Maria ug si Jose, mihatag sila kang Jesus og tulo ka espesyal nga mga gasa ug misimba Kaniya. Ang Dios mipasidaan kanila sa dili pagbalik ngadto ni Herod, mao nga namauli sila agi sa lahi nga agianan.

Mateo 2:9–12

Usa ka anghel ang misulti kang Jose nga kinahanglan niyang dalhon ang iyang pamilya ngadto sa Ehipto.

Pagbiya sa maalamong mga tawo, nagdamgo si Jose. Diha sa damgo, usa ka anghel misulti kang Jose nga si Herod nasuko. Kinahanglan nga dad-on ni Jose sila si Maria ug si Jesus ngadto sa Ehipto aron sila maluwas.

Mateo 2:13

Si Jose, Maria, ug si Jesus nga mibiya padulong sa Ehipto.

Mibarog dayon si Jose. Mibiya siya padulong sa Ehipto kauban ni Maria ug ni Jesus samtang gabii pa.

Mateo 2:14

Si Maria, Jose, ug Jesus nagpabilin sa Ehipto hangtod ang anghel misulti nila nga si Herod patay na ug luwas na nga mobalik. Dayon namalik sila aron mopuyo sa Nazaret.

Mateo 2:15, 19–23