Saqueo ang Kobrador sa Buhis

Si Jesus mibisita sa siyudad sa Jerico. Usa ka tawo nga ginganlan og Saqueo nagpuyo didto. Si Saqueo usa ka adunahan nga kobrador sa buhis Kadaghanan sa mga tawo dili ganahan sa mga kobrador sa buhis. Nagtuo sila nga ang mga kobrador sa buhis mikuha og daghang kwarta gikan sa mga tawo.

Lucas 19:1–2

Nakadungog si Saqueo nga si Jesus anaa sa siyudad. Gusto siya nga makakat-on pa og dugang mahitungod kaniya. Misulay siya sa pag-adto aron makakita ni Jesus, apan dili siya makahimo tungod kay adunay daghan kaayong tawo nga naglibot Kaniya, ug si Saqueo mubo kaayo nga dili makakita kon itandi kanila. Unsaon man niya aron makakita siya ni Jesus?

Lucas 19:3–4

Midagan si Saqueo ug misaka sa usa ka kahoy aron makakita siya ni Jesus. Sa dihang milabay si Jesus, mihangad Siya ug nakita si Saqueo sa ibabaw sa kahoy. Gitawag siya ni Jesus ug miingon, “Kanaog dayon.” Gusto si Jesus nga mobisita kaniya sa iyang panimalay. Nagdali si Saqueo sa pagkanaog sa kahoy. Malipayon kaayo siya nga si Jesus moadto sa iyang balay.

Lucas 19:4–6

Ang mga tawo sa Jerico natingala ngano nga si Jesus moadto sa balay ni Saqueo. Nagtuo sila nga si Saqueo usa ka makasasala tungod kay siya usa ka kobrador sa buhis.

Lucas 19:7

Gisultihan ni Saqueo si Jesus, “Ihatag ko ang katunga sa akong katigayonan ngadto sa mga kabos.” Miingon siya nga kon siya makalimbong kang bisan kinsa, ulian niya sila og upat ka pilo. Gisultihan ni Jesus si Saqueo, “Karong adlawa miabot ang kaluwasan niining balaya.” Miingon si Jesus nga Siya miabot aron sa pagpangita ug sa pagluwas sa mga tawo nga nawala.

Lucas 19:6, 8–10