யாக்கோபிடமிருந்து ஒரு கடிதம்

யாக்கோபு மரியாளின் மகனும், இயேசு கிறிஸ்துவின் சகோதரர்களில் ஒருவனுமாவான். யாக்கோபு எருசலேமில் ஒரு சபைத் தலைவனாகவும் இருந்தான். இயேசு கிறிஸ்துவின் சுவிசேஷத்தின்படி வாழ உதவுவதற்காக, உலகெங்கிலும் உள்ள தேவனின் மக்களுக்கு அவன் ஒரு கடிதம் எழுதினான்.

யாக்கோபு 1:1

“உங்களில் ஒருவன் ஞானத்தில் குறையுள்ளவனாயிருந்தால், தேவனிடத்தில் கேட்கக்கடவன்” என்று யாக்கோபு எழுதினான். பல வருடங்களுக்குப் பிறகு, ஜோசப் ஸ்மித் என்ற சிறுவன் இந்த வார்த்தைகளைப் படித்து, தன் கேள்விகளைப் பற்றி ஜெபிக்க முடிவு செய்தான். ஜோசப் ஸ்மித் பின்னர் கூறினார், “யாக்கோபின் சாட்சியம் உண்மை என்று நான் கண்டேன்.” தேவன் ஜோசப்பின் ஜெபத்திற்கு பதிலளித்தார், நம்முடையதிற்கும் அவர் பதிலளிப்பார்.

யாக்கோபு 1:5; ஜோசப் ஸ்மித்—வரலாறு 1:11–17, 26

மற்றவர்கள் சொல்வதைக் கவனமாகக் கேட்டு, அவர்கள் மீது கோபப்படாமல் இருக்க முயற்சி செய்ய வேண்டும் என்றும் யாக்கோபு எழுதினான். நாம் கோபமாக இருக்கும்போது, ​​தேவனுக்கு சேவை செய்ய முடியாது.

யாக்கோபு 1:19-20

தேவனுடைய வார்த்தையைக் கேட்பது மட்டும் போதாது; நாம் அதன்படி வாழவும் வேண்டும் என்று யாக்கோபு கூறினான். “திருவசனத்தைக் கேட்கிறவர்களாய் மாத்திரமல்ல, அதின்படி செய்கிறவர்களாயும் இருங்கள்” என்று அவன் எழுதினான்.

யாக்கோபு 1:22.

இயேசு கிறிஸ்துவைப் பின்பற்றுபவராக இருப்பது என்பது தேவனை நம்புவதை விட அதிகம் என்று யாக்கோபு விளக்கினான். தேவன் உண்மையானவர் என்பது பிசாசுக்குக் கூடத் தெரியும். குளிராகவோ அல்லது பசியாகவோ இருப்பவர்களைப் பார்க்கும்போது, ​​நாம் அவர்களுக்கு உடை மற்றும் உணவைக் கொடுக்க வேண்டும். நாம் விதவைகளையும் அனாதைகளையும் சந்திக்க வேண்டும். “கிரியைகளில்லாத விசுவாசம் செத்தது” என யாக்கோபு எழுதினான்.

யாக்கோபு 1:27; 2:14–20

யாக்கோபு பரிசுத்தவான்களுக்கு மக்களிடம் அன்பாகப் பேசக் கற்றுக்கொடுக்க விரும்பினான். நம் வார்த்தைகளில் கவனமாக இருப்பது குதிரையை வழிநடத்துவது போன்றது என்று அவன் கூறினான். குதிரையின் வாயில் உள்ள ஒரு சிறிய உலோகத் துண்டில் இணைக்கப்பட்ட கடிவாளத்தின் மூலம் நாம் ஒரு பெரிய குதிரையை வழிநடத்த முடியும். நமது வார்த்தைகள் சிறியதாகத் தோன்றலாம், ஆனால் அவை வல்லமைவாய்ந்ததாக இருக்க முடியும்.

யாக்கோபு 3:2–3

நம் வார்த்தைகளைக் கட்டுப்படுத்துவது ஒரு கப்பலை ஓட்டுவது போன்றது என்று யாக்கோபு கூறினான். கப்பல் பெரியதாக இருந்தாலும், காற்று பலமாக இருந்தாலும், மிகச் சிறிய சுக்கான் பிடி அல்லது சுக்கானைக் கட்டுப்படுத்துவதன் மூலம் நாம் கப்பலை வழிநடத்த முடியும். சுக்கான் பிடி நம் வார்த்தைகளைப் போன்றது. நாம் சொல்வதைக் கட்டுப்படுத்த முடிந்தால், பெரிய மாற்றத்தை ஏற்படுத்த முடியும்!

யாக்கோபு 3:4–5

அன்பற்ற வார்த்தைகள், பெரிய நெருப்பை மூட்டிவிடும் ஒரு சிறிய சுடரைப் போல இருக்கலாம் என்று யாக்கோபு விளக்கினான். அவை விரைவாகப் பரவி அதிக காயத்தை ஏற்படுத்தும். அதனால்தான் நம் வார்த்தைகளில் கவனமாக இருப்பது முக்கியம்.

யாக்கோபு 3:5–6

நாம் நம் வாய்களைப் பயன்படுத்தி பரலோக பிதாவிடம் ஜெபிக்கிறோம் என்று யாக்கோபு எழுதினான். ஆனால் சில சமயங்களில் பரலோக பிதாவின் பிள்ளைகளான மற்றவர்களிடம், நாம் நம் வாயால் மோசமான விஷயங்களைச் சொல்கிறோம். அப்படி இருக்கக்கூடாது என்று யாக்கோபு சொன்னான்.

யாக்கோபு 3:9–10

பரிசுத்தவான்களுக்கு கனிவான வார்த்தைகளைப் பேசக் கற்பிக்க, ஒரு நீரூற்று நன்னீரையும் கசப்பான நீரையும் தர முடியாது என்று யாக்கோபு போதித்தான். ஒரு அத்தி மரத்தால் ஒலிவ பழங்களை கொடுக்க முடியாது, ஒரு திராட்சைக் கொடியால் அத்தி பழங்களை கொடுக்க முடியாது. அதேபோல், நம் இருதயங்களில் நன்மையும் அன்பும் இருந்தால், நம் வார்த்தைகளும் நல்லதாகவும் அன்பாகவும் இருக்க வேண்டும்!

யாக்கோபு 3:11–18