1 Awor a sosodé ku den e di trinta aña di e reinado di e huesnan riba e pueblo di Nefi, despues ku Moroni a risibí i a lesa e epístola di Helaman, e tabata regosihá ekstremadamente pa e bienestar, sí, e gran éksito ku Helaman tabatin den optené e teranan kual nan a pèrdè.

2 Sí, i el a duna di konosé esaki na henter su pueblo, den tur e tera den alrededor di e parti kaminda e tabata, pa nan tambe regosihá.

3 I a sosodé ku inmediatamente el a manda un epístola pa Pahoran, deseando pa reuní mas hende pa fortalesé Helaman, òf e ehérsitonan di Helaman, di manera ku fásilmente e por a mantené e parti di e tera ei ku asina milagrosamente el a logra rekonkistá.

4 I a sosodé ku ora ku Moroni a manda e epístola aki na e tera di Zarahemla, el a kuminsá traha un plan un biaha mas pa konkistá e sobrá di e poseshonnan i siudatnan kual e lamanitanan a kita for di nan.

5 I a sosodé ku miéntras Moroni tabata hasiendo preparashonnan pa bai batayá kontra di e lamanitanan, mira, e pueblo di Nefiha, ku tabata reuní huntu for di e siudat di Moroni, i e siudat di Lehi, i e siudat di Morianton, a wòrdu ataká dor di e lamanitanan.

6 Sí, asta esnan ku a wòrdu obligá na hui for di e tera di Manti, i for di e tera den alrededor, a yega i a uni ku e lamanitanan den e parti aki di e tera.

7 I pues, siendo sumamente numeroso, sí, i risibiendo refuerso dia tras dia, nan a avansá kontra di e pueblo di Nefiha, bou di e komando di Amorón, i nan a kuminsá mata nan ku un matansa ekstremo.

8 I nan ehérsitonan tabata asina numeroso ku e sobrá di e pueblo di Nefiha tabata obligá pa hui dilanti di nan; i nan a yega i asta a uni na e ehérsito di Moroni.

9 I awor, manera Moroni a suponé ku nan lo a manda hòmbernan na e siudat di Nefiha pa yuda e pueblo retené e siudat ei, i sabiendo ku tabata mas fásil pa impidí e siudat di kai den man di e lamanitanan ku bolbe kit’é for di nan, el a suponé ku fásilmente nan lo a mantené e siudat ei.

10 P’esei el a retené tur su ehérsito pa preservá e lugánan ku nan a rekonkistá.

11 I awor, ora ku Moroni a mira ku e siudat di Nefiha tabata pèrdí e tabata sumamente tristu i a kuminsá duda, pa motibu di e maldatnan di e pueblo, si nan lo no kai den man di nan rumannan.

12 Awor esaki tabata e kaso ku tur su kapitannan hefe. Nan a duda i maraviá tambe pa motibu di e maldatnan di e pueblo, i esaki pa motibu di e éksito di e lamanitanan riba nan.

13 I a sosodé ku Moroni tabata rabiá ku e gobièrnu, pa motibu di nan indiferensia konserniente e libertat di nan pais.