1 I a sosodé ku a manda Alma i Amulek pa sali for di e siudat ei; i nan a bai, i a yega na e tera di Sidom; i mira, ei nan a haña tur esnan ku a bai for di e tera di Amoniha, ku a wòrdu saká i tirá ku piedra, pa motibu ku nan a kere den e palabranan di Alma.

2 I nan a relatá na nan tur loke a sosodé ku nan kasánan i yunan, i tambe konserniente nan mes, i di nan poder di liberashon.

3 I tambe Zeezrom tabata malu na Sidom, ku un keintura fuerte, kual a wòrdu kousá pa e tribulashonnan grandi di su mente pa motibu di su maldatnan, pasobra e tabata suponé ku Alma i Amulek no tabata eksistí mas; i el a suponé ku nan a wòrdu matá pa motibu di su maldat. I e piká grandi aki, i su hopi otro pikánan, a hasi su mente tristu te ora ku el a bira sumamente tormentá, sin haña liberashon; p’esei el a kuminsá wòrdu konsumí pa un keintura fuerte.

4 Awor, ora el a skucha ku Alma i Amulek tabata den e tera di Sidom, su kurason a kuminsá tuma kurashi; i mesora el a manda un mensahe pa nan, deseando pa nan pa bini serka dje.

5 I a sosodé ku nan a bai mesora, obedesiendo e mensahe kual el a manda pa nan; i nan a bai den e kas serka Zeezrom; i nan a hañ’é riba su kama, malu, ku keintura fuerte; i su mente tambe tabata sumamente tormentá pa motibu di su maldatnan; i ora el a mira nan el a ekstendé su man, i a supliká nan pa nan san’é.

6 I a sosodé ku Alma a bis’é, tumando su man: Bo ta kere den e poder di Kristu pa salbashon?

7 I el a kontestá i bisa: Sí, mi ta kere tur e palabranan ku boso a siña.

8 I Alma a bisa: Si bo ta kere den e redenshon di Kristu bo por wòrdu saná.

9 I el a bisa: Sí, mi ta kere di akuerdo ku bo palabranan.

10 I e ora ei Alma a sklama na Señor, bisando: O Señor nos Dios, tene mizerikòrdia di e hòmber aki, i san’é di akuerdo ku su fe kual ta den Kristu.

11 I ora Alma a bisa e palabranan aki, Zeezrom a bula lanta riba su pianan, i a kuminsá kana; i esaki a kousa un gran asombro na henter e pueblo; i e notisia aki a ekstendé rònt di henter e tera di Sidom.

12 I Alma a batisá Zeezrom na Señor; i el a kuminsá for di e tempu ei padilanti ta prediká na e pueblo.

13 I Alma a establesé un iglesia den e tera di Sidom, i a konsagrá saserdotenan i maestronan den e tera, pa batisá na Señor ken ku tabata deseá pa wòrdu batisá.

14 I a sosodé ku tabatin hopi; pasobra nan a yega den grupo for di tur region alrededor di Sidom, i a wòrdu batisá.

15 Pero pa loke ta trata e pueblo ku tabata den e tera di Amoniha, nan a keda tòg un pueblo tèrko i di kurason duru; i nan no a arepentí di nan pikánan, atribuyendo tur e poder di Alma i Amulek na e diabel; pasobra nan tabata di e kreensia di Nehor, i no tabata kere den e arepentimentu di nan pikánan.

16 I a sosodé ku Alma i Amulek, Amulek despues di a bandoná tur su oro, i plata, i su kosnan presioso, kual tabata den e tera di Amoniha, pa e palabra di Dios, el a wòrdu rechasá pa esnan ku un tempu tabata su amigunan i tambe pa su tata i su famia;

17 P’esei, despues ku Alma a establesé e iglesia na Sidom, mirando un kambio grandi, sí, mirando ku e pueblo a frena pa loke ta trata e orguyo di nan kurason, i a kuminsá ta humiá nan mes dilanti di Dios, i a kuminsá ta reuní huntu na nan santuarionan pa adorá Dios dilanti di e altar, vigilando i hasiendo orashon kontinuamente, pa nan por a wòrdu librá for di Satanas, i morto, i for di destrukshon—

18 Awor manera mi a bisa, Alma a wak tur e kosnan aki, p’esei el a tuma Amulek i a dirigí na e tera di Zarahemla, i a hib’é na su mes kas, i a atministr’é den su tribulashonnan, i a fortales’é den Señor.

19 I asina a terminá e di dies aña di e reinado di e huesnan riba e pueblo di Nefi.