Bula ena vakabauti Jisu Karisito.

E sega soti ni dau rawarawa na vakamuri Jisu Karisito ena veisiga taumada ni Lotu. Ena so na gauna era dau cati ira na lewe ni Lotu se veiwalitaki ira ena vuku ni nodra vakabauta o ira na tamata. A vinakata o Paula me vukei ira me ra maroroya na nodra vakabauti Jisu Karisito.

Iperiu 10:32–39

A vola o Paula e dua na ivola vei ira na Iperiu, se Jiu, Yalododonu. A vakavulica ni vakabauta e kena ibalebale meda vakabauta ka vakanuinui kina dua na ka, dina ga ni da sega ni raica rawa. Me kena ivakaraitaki, na vakabauti Jisu Karisito e kena ibalebale na vakararavi Vua kei na Nona yalayala, kevaka mada ga eda se bera ni ciqoma na veivakalougatataki eda vakanuinui kina.

Iperiu 11:1, 6

Me vukei ira na Yalododonu ni Iperiu mera sotava na nodra bolebole ena vakabauta, a vakananuma vei ira o Paula na italanoa me baleti ira na tamata ena ivolanikalou e cecere tu na nodra vakabauta.

Iperiu 11:4–40

Me kena ivakaraitaki, a tukuna o Paula me baleti Noa. A kaya na Kalou vei Noa me taya e dua na waqa me vakabula na nona matavuvale mai na waluvu. Sa vakabauta ko Noa me talairawarawa, ni se bera mada ga ni raica na uca.

Iperiu 11:7

A tukuna o Paula me baleti Eparaama kei Sera, ka tu vei rau na vakabauta me rau biuta nodrau vale baleta ni sa yalataka na Kalou ni na kauti rau kina dua na vanua vinaka cake. Erau vakabauta talega na yalayala ni Kalou ni na levu sara na nodrau matavuvale, dina ga nira sa qase sara ka ra se bera ni vakaluveni.

Iperiu 11:8–16

A tukuna talega o Paula me baleti tinai Mosese, o Jokapeti. E tu vua na vakabauta me vunitaki Mosese, ni se gonelailai, me taqomaki koya mai vua e dua na tui ca.

Iperiu 11:23

A tubu cake o Mosese mai Ijipita. A rawa me vutuniyau ka logavinaka. Ia a vakanadakuya taucoko o koya baleta ni tu vua na vakabauta na Kalou kei na Nona veivakalougatataki.

Iperiu 11:24–27

Ena vuku ni nona vakabauta, a kauti ira tani na tamata ni Kalou mai na veivakabobulataki o Mosese. Era lako curuma na Wasawasa Damudamu ena qele mamaca.

Iperiu 11:29

A tukuna talega o Paula me baleti Reapi. E tu vua na vakabauta me vukei ira na tamata ni Kalou, e dina ga ni sega tale ni dua ena nona koro e vakabauta na Turaga. Na nona vakabauta a vakabula na nona matavuvale.

Iperiu 11:30–31

A kaya o Paula ni vuqa na ivakaraitaki ni vakabauta oqo e rawa ni vukei keda meda vakabauti Jisu Karisito talega, ena gauna mada ga e dredre kina na bula. E rawa nida veivutunitaka na noda ivalavala ca ka rai vei Jisu, o Koya sa “vakatekivuna ka na sauma talega na noda vakabauta.“ Sa lomasoli me mate ena vukuda baleta ni kila o Koya ni Nona Veisorovaki ena kauta mai na reki cecere kei na veivakabulai!

Iperiu 12:1–2