Era Via Totogitaka na Tamata e dua na Marama ka Valavala Ca

Ena dua na mataka lailai, a gole o Jisu Karisito ki na valetabu e Jerusalemi. E vuqa na tamata era soqoni wavoliti Koya mera rogoca na Nona ivakavuvuli.

Joni 8:1–2

Ni veivakatavulici tu o Jisu, era kauta mai Vua eso na iliuliu ni Jiu e dua na yalewa. Sa tobo o koya ni voroka tu e dua na ivakaro ni Kalou. Me vaka na lawa, sa dodonu me vakamatei na yalewa ena nodra vakaviriki koya na tamata ena vatu.

Joni 8:3–5

Era vakatarogi Jisu na tamata na cava me yaco vua. Era sa saga tiko mera lawakitaki Jisu. Era sa kila tu ni na sega ni vinakata o Koya me vakamavoataka na marama oya. Ia kevaka e kaya o Jisu ni sega ni dodonu me totogitaki na yalewa, sa rawa ni ra kaya tu ni sa sega ni muria na lawa o Koya.

Joni 8:6

Ia a sega ni sauma o Jisu vei ira. A cuva sobu ki na qele ka volavola ena soso. Era sa vakatarogi Koya tale na tamata na cava me ra cakava.

Joni 8:6–7

Kena itinitini, sa duri o Jisu ka rai wavoliti ira na turaga. A kaya o koya ni kevaka e dua vei ira e sega ni se bau valavala ca, sa rawa ni matai o koya me viriki koya ena vatu.

Joni 8:7

Sa qai cuva sobu tale o Jisu ka tomana na nona volavola ena qele. Era sa kila kece na tamata ni tiko talega na nodra ivalavala ca. Era sa lako tani vakayadudua.

Joni 8:8–9

A rai wavoki o Jisu ka raica walega na marama ni tucake tu e kea. A taroga o koya na vanua era sa lako kece kina na tamata ka via totogitaki koya. Sa tukuna vua o koya ni ra sa gole kece. Sa kaya o Jisu vua na yalewa, “Mo lako, ka mo kakua ni valavala ca tale.” Mai na gauna oya ka lako yani, sa vakabauti Jisu na yalewa.

Joni 8:9–11; Vakadewa i Josefa Simici, Joni 8:11; ena Joni 8:11, ivakamacala e botona c.