Ena Vukuda Sa Solia o Jisu na Nona Bula—E dua na solibula me vakabulai keda mai na ivalavala ca kei na mate

Maciu 27:11–66; Luke23; Joni19

Ena Vukuda Sa Solia o Jisu na Nona Bula

E dua na solibula me vakabulai keda mai na ivalavala ca kei na mate

Era talia na sotia e dua na isala wa-votovotoa ka biuta ena ului Jisu.

Ni sa lewa o Pailato me sa vakoti ki na kauveilatai o Jisu, a qai tukuna vei ira na sotia me ra kauti Jisu tani. Era sa qai mokulaki Koya, kasiviti Koya, biuta e uluna e dua na isala wa vakavotovotoa, ka vakalialiai Koya.

Marika 15:15–20

E colata tu o Jisu e dua na kauveilatai bibi.

Era sa qai vakacolata vei Jisu na sotia e dua na kauveilatai bibi. Era a kauti Koya ki na dua na vanua ena taudaku kei Jerusalemi ka vakatokai o Kolikoca.

Joni 19:17

Era sa vakoti Jisu na sotia ki na kauveilatai.

Era sa qai vakota na sotia na ligai Jisu kei na yavana ena kauveilatai. A kerea o Jisu vua na Tamana Vakalomalagi me vosoti ira na sotia, baleta ni ra sega ni kila ni ra a vakota na Luve ni Kalou.

Luke 23:33–34; raica talega na iVakadewa ni Josefa Simici ena ivakamacala era 34c

Era raici Jisu kei rua na tamata caka ca ni sa vakoti ki na kauveilatai.

Rau a vakoti vata ena kauveilatai kei Jisu e rua na tamata caka ca na siga oya. A kaya Vua e dua vei Rau, “Kevaka ko sa Karisito ko iko, vakabulai iko kei keirau talega.”

Luke 23:39

E vosa o Jisu vata kei na dua vei rau na tamata caka ca.

E kaya tale okoya na kena kadua ni veiganiti na kedrau itotogi, ia a sega ni cakava o Jisu e dua na cala. A kerei Jisu me nanumi Koya ena Nona matanitu. Sa qai kaya vua o Jisu ena siga ga edaidai rau sa na laki tiko vata ena vuravura ni yalo.

Luke 22:40–43

Sa tukuna o Jisu vei Joni me qaravi tinana.

E vuqa na marama era muri Jisu Karisito era a lako mai ki na kauveilatai me ra tiko vata kei Koya. E dua vei ira na marama o tinai Jisu, o Meri. A raici koya o Jisu ka tukuna vei Joni, e dua vei ira na Nona iApositolo, me qaravi koya.

Joni 19:25–27; raica talega na Luke 8:1–3; Marika 15:40–41

E tolu na auwa, sa ubia na vanua na butobuto. A galili sara ga o Jisu. A vakila ni sa biuti Koya na Tamana mai Lomalagi.

Maciu 27:45–46

Ni oti, sa qai kila o Jisu ni sa vakacavara na Nona rarawa. E kaya o koya, “Tamaqu, sa oti, me yaco ga na nomuni lewa.” Sa qai vakacuvara na uluna o Jisu ka solia na Nona bula. Me laurai ke sa mate vakaidina, a laubasikati Koya e yasana e dua na sotia ena dua na moto.

Vakadewa ni Josefa Simici, Maciu 27:54 (ena Maciu 27:50, ivakamacala e botona a); Joni 19:28–30, 34

Ni sa mate o Jisu, sa sakure na vuravura. Sa ramusu na veivatu ki na veitikina eso. Na ilati ni valetabu, na ilati e kovuta na vanua savasava ena valetabu, era sa sei rua.

Maciu 27:51

Era sa rere na sotia ena vakaraici Jisu tiko.

Era rere sa rere na sotia. “E dina ga sa luve ni Kalou ko koya oqo,” era kaya.

Maciu 27:54

Era sa qai biuta na Yagona na tinai Jisu kei ira na Nona tisaipeli ena dua na ibulubulu.

Eratou a solega na tisaipeli i Jisu na Yagona ena isulu ka biuti Koya ena dua na ibulubulu ena dua na were. E muri, era a qai vaqiqica yani e dua na vatu levu ena mata ni katuba ni ibulubulu.

Maciu 27:57–61; Joni 19:38–41