Vakabula o Jisu e dua na Yalewa ena Siga ni Vakacecegu

Eratou a taubale takosova tiko o Jisu kei na Nona tisaipeli e dua na loga ni witi ena Siga ni Vakacecegu. Eratou a viakana, ka ratou betia eso na witi ka kania. Era raici iratou eso na iliuliu ni Jiu era vakatokai na Farisi. O ira na Farisi era a cakava e vuqa na lawa me baleta na Siga ni Vakacecegu. Na beti witi a saqata na nodra lawa.

Maciu 12:1–2

Era tarogi Jisu na Farisi na vuna eratou sega ni rokova kina na Siga ni Vakacecegu na Nona tisaipeli. A sauma o Jisu ni ratou a sega ni cakava e dua na cala. A solia vei keda na Kalou na Siga ni Vakacecegu me vakalougatataki keda, me kua ni vakadredretaka noda bula.

Maciu 12:2–8; Marika 2:27

Ni oti oya, a veivakavulici tiko o Jisu ena dua na valenilotu ena Siga ni Vakacecegu. A raica e kea o Jisu e dua na yalewa. A sega ni rawa ni tucake vakadodonu o koya. A tauvi koya tu na leqa oqo me 18 na yabaki.

Luke 13:10–12

A kaciva o Jisu na yalewa oya me lako mai Vua. A tabaki koya ena Ligana ka vakalougatataki koya.

Luke 13:12–13

Ena gauna vata ga oya, a tu vakadodonu kina na yalewa oya. A sa cudru na iliuliu ni valenilotu baleta ni veivakabulai tiko o Jisu ena Siga ni Vakacecegu.

Luke 13:13–14

A kaya o Jisu ni nona vukei na yalewa oqo e sa ka dodonu ga me caka. Sa dodonu meda caka vinaka ena Siga ni Vakacecegu. A madua na iliuliu, ka ra marau na tamata ena valenilotu baleta ni sa vakabulai na yalewa oya.

Luke 13:15–17; raica talega na Luke 6:9