Na Kana Vata Ni Lako Sivia

Sa vakamacalataka o Jisu na sakaramede

E a tiko o Jisu kei iratou na Nona iApositolo e Jerusalemi me ratou marautaka na Lakosivia. Era dau marautaka na Jiu na Lakosivia e veiyabaki. E vukei ira mera nanuma tiko, ena vuqa na yabaki sa oti, na nodra matavuvale a vakabobulataki tu mai Ijipita, ka qai vukei ira na Kalou mera dro.

Na Lako Yani 12:27

Eratou dabe wavokita tiko edua na teveli o Jisu kei iratou na Nona iApositolo.

Nodratou a tiko mai Jesuralemi, eratou a kania vata edua na magiti digitaki o Jisu kei iratou na Nona iApositolo. O Jisu a sa nanamaki tiko mai me kania vata kei iratou na magiti oqo.

Luke 22:7–15

E vuya tiko o Jisu na yavana edua vei iratou na Nona iApositolo.

Ni ratou sa kana oti, a vakasinaita o Jisu edua na boulu ena wai. Sa tekivu me vuya na yavadratou na Nona iApositolo.

Joni 13:4–5

E taroga tiko o Pita na vuna e vuya tiko kina o Jisu na yavadratou.

Ni sa yacovi Pita, a tarogi Jisu se cava na vuna a cakava tiko kina na ka oqo. Na veivui yava edua na ka era dau cakava ga na tamata dauveiqaravi.

Joni 13:6

E vakavulici iratou tiko na Nona iApositolo o Jisu ena sala meratou veilomani kina vakai iratou.

A kaya o Jisu ni a vuya na yavadratou me laiva edua na ivakaraitaki vei iratou. A vinakata o Koya meratou veiqaravi ka veilomani vakai iratou me vaka na Nona lomani iratou. Kevaka eratou na cakava na ka oqo, era na kila na tamata niratou sa Nona tisaipeli.

Joni 13:14–16, 34–35

A kaya o Jisu vei iratou na Nona tisaipeli ni sa na voleka ni mate o Koya. A kaya o Pita ni bolea me mate ena vukui Jisu.

Joni 13:36–38

Ia a kila tu o Jisu ni na yaco mai na veigauna dredre. A kaya vei Pita ni bera ni na tagi na toa ena mataka ka tarava, ena tukuna vakatolu o Pita ni sega ni kilai Jisu.

Joni 13:38

E vakavulici iratou na Nona iApositolo o Jisu me baleta na Yalo Tabu.

Sa kila tu o Jisu niratou na lomaleqa ka rere na Nona iApositolo. A yalataka o Koya ni Kalou ena tala mai vei ira na Yalo Tabu. Na Yalo Tabu ena vakacegui iratou, vakavulici iratou, ka vukei iratou me nanuma tiko na veika a vakavulica vei iratou o Jisu. A tukuna vei iratou meratou kakua ni lomaleqa se rere. E kaya o Koya, "Kevaka dou sa lomani au, dou talairawarawa kina noqu ivunau."

Joni 14:1, 15–16, 26–27

Sa dovia tiko o Jisu na madrai ni sakaramede.

Sa qai cakava o Jisu edua na ka talei sara me vukei iratou na Nona iApositolo me dau nanumi Koya tikoga. A solia vei iratou o Koya na sakaramede. iMatai, a vakalougatataka o Koya na madrai, dovia vakalalai, ka solia vei iratou na nona iApositolo. A kaya vei iratou o Jisu meratou vakananuma na Yagona niratou sa kania na madrai. A kerea o Koya meratou nanuma tiko ni na mate o Koya ena vukudratou.

Maciu 26:26; Luke 22:19

Sa masulaka tiko o Jisu na waini ni sakaramede.

Sa qai sova o Jisu na waini ki na dua na bilo. A vakalougatataka na waini o Koya ka tukuna vei iratou na iApositolo meratou gunuva. A kaya vei iratou o Jisu meratou vakananuma na Nona dra niratou gunuva na waini. A kerei iratou meratou nanuma tiko ni na vakararawataki o Koya, tiri na Nona dra, ka mate ena vuku ni nodra mosi kei na ivalavala ca na tamata kecega me rawa kina nida veivutuni ka vosoti.

Maciu 26:27–28; Luke 22:20

E vakavulici iratou tiko na Nona iApositolo o Jisu me ratou muria na Nona ivakaro.

Sa qai vakamacalataka o Jisu ni ko Koya e vaka e dua na vaini, ka ra sa vaka na tabana na Nona tisaipeli. Kevaka e sema tiko kina vaini edua na tabana, ena vuataka na vuana. Na tabana e sega ni sema kina vaini ena mate ka na sega ni rawa ni vua. E vinakata o Jisu vei iratou na Nona tisaipeli me ratou voleka tiko vei Koya ena nodratou veilomani vakai iratou ka muria na Nona ivakaro.

Joni 15:4–12

E taubale tiko o Jisu kei iratou na Nona iApositolo ki Kecisemani.

Ni oti na vakavulici ni veika oqo, eratou a lagata edua na serenilotu o Jisu kei iratou na Nona iApositolo. Eratou lako tiko kina dua na were ka vakatokai o Kecisemani.

Maciu 26:30