Na Sipi Yali, na Sede Yali, kei na Gone Yali

Eso na iliuliu ni Jiu a raici Jisu ni vosa ka kana vata tiko kei ira na tamata era nanuma sa ivalavala ca. Era nanuma na iliuliu ni sa cala vei Jisu me kana vata kei ira sa ivalavala ca. Sa tukuna o Jisu vei ira na iliuliu e tolu na italanoa se vosa vakatautauvata me vukei ira ni kila vinaka ni vinakata tu o Koya me vukea na tamata kecega me ra veivutuni ka sa dau marau o Koya ni ra cakava vakakina.

Luke 5:1–3

Na matai ni vosa vakatautauvata esa baleta na turaga ka 100 na nona sipi. Sa yali e dua vei ira na nona sipi.

Luke 15:4

Sa biuta na turaga na vo ni 99 na sipi ka laki vakasaqarai koya ka yali. A vakasaqaqara tikoga me yacova ni sa kunea.

Luke 15:4

Ni sa qai kunea na nona sipi ka yali, sa marau vakalevu sara! A viribaleta na sipi ki vale e domona ka tukuna vei ira na nona itokani kei na wekana me ra marau vata kei koya. Kaya o Jisu ni sa vakaoqo na ka e vakila na Tamada Vakalomalagi ni dua e veivutunitaka na nona ivalavala ca ka lesu Vua.

Luke 15:5–7

Nai karua ni vosa vakatautauvata esa baleta na marama ka 10 na nona sede siliva. Ni vakayalia e dua, a waqaca e dua na kadrala ka taviraka na nona vale, ka vakasaqara na sede yali. A vakasaqaqara voli me yacova ni sa kunea.

Luke 15:8

Ni sa qai kunea na nona sede yali, esa marau saraga! A tukuna vei ira na nona itokani kei na wekana me ra marau vata kei koya. Kaya o Jisu ni sa vakaoqo na ka era vakila na agilosi mai lomalagi ni dua e veivutunitaka na nona ivalavala ca.

Luke 15:9–10

Nai katolu ni vosa vakatautauvata esa baleta na turaga ka rua na luvena tagane. Sa sega ni vinakata o luvena gone me tiko vata tale kei tamana. Sa kerei tamana o koya me solia vua na nona ivotavota ni ilavo ni matavuvale. Esa qai biuta na nona itikotiko ka lako ki na dua na vanua yawa sara.

Luke 15:11–13

Sa cakava na gone eso na digidigi ca sara. Sa vakasabusabutaka o koya na ilavo a solia vua o tamana.

Luke 15:13

Ni sa oti taucoko na nona ilavo, esa viakana saraga. E sega ni dua e solia vua e dua na ka me kania. Sa qai kunea o koya e dua na cakacaka ni vakana vuaka. Sa viakana vakalevu o ko na gone, esa diva tu me kania na kedra kakana na vuaka. Sa kila o koya ni sa dodonu me lesu tale vei tamana.

Luke 15:14–18

Ia a sega ni vakadeitaka o gone ni na ciqomi koya lesu o tamana. Sa navuca tu o koya me na kerea vei tamana me dua vei ira na nona dauveiqaravi.

Luke 15:17–19

Ni sa lako tiko i vale o gone, sa raici koya o tamana ni lako tiko mai vakayawa. Sa marau saraga o tamana, ka cici yani vei luvena!

Luke 15:20

Sa kubeti luvena o tamana ka reguci koya. Sa tukuna vei ira na nona dauveiqaravi mera kauta mai na isulu vinaka duadua vei luvena ka vakarautaka e dua na magiti. Sa vinakata o koya mera marau ka reki vata baleta ni sa lesu mai vale o luvena.

Luke 15:20–24

Ena gauna kece oqo, a cakacaka voli tu na luvena ulumatua ena were. Ni sa lesu mai ki vale, sa rogoca o koya na ivakatagi kei na danisi. A taroga e dua na dauveiqaravi na cava e caka tiko. Sa tukuna vua na dauveiqaravi ni sa lesu mai vale o tacina, ka ra sa solevu tiko.

Luke 15:25–27

Sa cudru sara o tuakana. A sureti koya o tamana ki na kana magiti, ia a sega ni lako. A tukuna o koya vei tamana ni a qaravi koya voli tu ena vuqa na yabaki, ia e sega na magiti a bau caka ena vukuna. Sa kaya vua o tamana, “Na ka kecega sa tu vei au sa nomu,” ia sa vinaka ga meda marau ni dua sa veivutuni ka lesu ki vale!

Luke 15:28–32