Vakadinadinataka o Jisu na Nona iLesilesi

A gole o Jisu ki Nasareci, na vanua era vakaitikotiko kina na Nona matavuvale kei na itokani. Oqo na vanua a tubu cake kina o Koya. Ena Siga ni Vakacecegu, a gole o Koya kina valenilotu, ka ra dau laki vulica kina na tamata na ivolanikalou ka qarava na Kalou.

Luke 4:16–17

E valenilotu, a tucake o Jisu ka wilika e dua na ivolanikalou mai vua na parofita o Aisea. E kaya na ivolanikalou ni dua na siga ena lako mai e dua na iVakabula. Ena vunautaka o Koya na kosipeli vei ira na dravudravua ka vakabula na yalo sa kavoro. Ena vukea o Koya na mataboko kei ira era vakararawataki.

Aisea 61:1–2; Luke 4:17–19

A tinia o Jisu na nona wiliwili ka dabe sobu. Era vakaraici Koya kece tu na tamata. A kaya vei ira ni siga saraga oya, sa yaco dina tiko kina na ivolanikalou a wilika o Koya. Sai Koya na iVakabula.

Luke 4:21

Era kurabui sara vakalevu na tamata e Nasareci ena ka a kaya o Jisu. Ena rawa vakacava vei Jisu me iVakabula? Era nanuma nio Koya e luvedrau tagane ga o Meri kei Josefa, sega ni Luve ni Kalou. Vei ira, o Koya a vaka me dua ga na tamata.

Luke 4:22

A kila o Jisu ni ra vinakata na tamata me cakava e dua na cakamana me vakadinadinataki kina ni sai Koya na iVakabula. A vakavulica ni cakamana e baleti ira na tamata era vakabauta, ka so na gauna e dau cakamana na Kalou vei ira era sega ni Isireli baleta ni levu cake na nodra vakabauta. E so na tamata ena valenilotu era a cudruvi Jisu.

Luke 4:23–28

Era vakasaurarataki koya tani kina taudaku ni koro ka lako cake kina ulu ni dua na delana. Era vinakata mera kolotaki koya tani mai na delana.

Luke 4:28–29

Ia dro yani o Jisu mai vei ira na tamata era cudru.

Luke 4:30

Baleta ni ra sega ni vinakati Koya e Nasareci, a gole o Jisu kina dua tale na koro me laki veivakavulici kina.

Luke 4:31–32