Jisu, e dua na Yalewa, kei na dua na iKeliwai

E ratou a taubale tiko o Jisu kei na Nona tisaipeli i Samaria ena nodratou ilakolako ki Kalili. E ratou a cegu me taki wai ena dua na ikeliwai. Ni cegu toka o Jisu e kea, eratou a laki voli kakana na Nona tisaipeli.

Joni 4:3–8

A lako mai kina ikeliwai e dua na yalewa ni Samaria me mai vakatawana na nona vokete ni wai. A kerei koya o Jisu me gunu mada. A kidroa na yalewa oqo. O Jisu e Jiu, ka vuqa vei ira na Jiu era sega ni dau vosa vei ira na kai Samaria.

Joni 4:7–9

A tukuna vua o Jisu ni o ira na tamata era gunu wai mai na ikeliwai era na viagunu tale. Ia sa rawa Vua me solia vei koya na “wai bula” ni bula tawamudu, ka na sega ni viagunu tale. E kaya na yalewa ni vinakata o koya eso na “wai bula.”

Joni 4:10–14

Sa kaya vua o Jisu me lai kauti watina mai. “Sa sega na watiqu,” a kaya o koya. A kaya o Jisu ni a lima na watina eliu, kei na tagane erau tiko kaya e sega ni watina.

Joni 4:16–18

A kurabui na yalewa ni sa kila tu o Jisu na veika oqo me baleti koya. A kaya o koya ni kila ni sa voleka na nona lako mai e dua na iVakabula. A tukuna vua o Jisu ni sa iKoya na iVakabula.

Joni 4:19, 25–26

A biuta tu mai na nona vokete wai ena ikeliwai na yalewa ka lako ki na koro. A tukuna o koya vei ira e vuqa na tamata ni sa kunea na iVakabula. A sureti ira mera lako mai ka rogoci Koya ni veivakavulici. Ena vuku ni yalewa oqo, e vuqa na kai Samaria era a vakabauti Jisu Karisito.

Joni 4:28–29, 39–42