iVola vei Timoci

O Timosi na cauravou kaukauwa na nona vakabauti Jisu Karisito. O tinana, o Unaisi, kei buna, o Luisa, erau marama vakabauta cecere. Era vakavulici Timoci mai na ivolanikalou, ena gauna e se gone kina.

2 Timoci 1:5; 3:15

E rau veitokani vinaka o Timoci kei Paula. E rau a cakacaka ka dau veilakoyaki vata, rau veiqaravi vua na Turaga ka wasea na Nona kosipeli. E lomani Timoci o Paula me vaka ga ni luvena.

Filipai 2:19–22; 1 Timoci 1:2

A kerei Timoci o Paula me liutaka na Lotu mai Efeso. A biubiu o Paula me gole kina dua tale na koro levu. Ni tu tani, a vola vei Timoci e dua na ivola me vukei koya.

1 Timoci 1:1–3

E muri, ni sa laki tiko vakavesu o Paula e Roma, a vola vei Timoci e dua tale na ivola. A vakasalataki Timoci ni na yaco mai na gauna dredre. Eso na tamata era na gole tani mai na dina ka lomana vakalevu cake na veika ni vuravura mai vua na Kalou. Era na vakavulica na veika e sega ni dina.

2 Timoci 3:1–7; 4:3–4

Sa qai tukuna o Paula vei Timoci me kakua ni rere. E kaya, “Ni sa sega ni solia mai vei keda na Kalou na yalo ni rere; a yalo ni kaukauwa ga, kei na yalololoma.“ A kaya o Paula vei Timoci me tomana tikoga ni cakava na veika sa vulica. Ena tuberi koya vei Jisu Karisito na ivolanikalou.

2 Timoci 1:7–9; 3:14–17

E kila tu o Paula ni sa voleka ni mate. Ia e sega ni rerevaka o koya na mate. A kaya o Paula vei Timoci ni dina ga ni a sotava oti e vuqa na bolebole ena nona bula, a tudei tu ga na nona vakabauta. E vakabauta ni na solia vua na Tamada Vakalomalagi kei Jisu Karisito na bula tawamudu.

2 Timoci 4:6–8