Na Gonetagane o Jisu

A tubu cake o Jisu ena taoni o Nasareci vata kei Meri kei Josefa. Ni toso na gauna, a vulica o Koya e vuqa tale na ka me baleta na Tamada Vakalomalagi. A vakavakarau o Koya kina cakacaka a vinakata o Tamada Vakalomalagi me cakava.

Luke 2:39–40; Vunau kei na Veiyalayalati 93:12–14

Ni sa yabaki 12 o Jisu, a gole yani i Jerusalemi vata kei ira na nona matavuvale kei na itokani me laki marautaka na Lakosivia. Era a tiko e kea me vica na siga.

Luke 2:41–43

Ena ilakolako i vale, a raica o Meri kei Josefa ni a sega ni tiko vata kei rau o Jisu. E rau lesu tale ki Jerusalemi me vakasaqarai Koya. Erau a lomaleqa vakalevu.

Luke 2: 44–46

Ni oti na nodrau vaqaqara me tolu na siga, rau sa qai kunei Jisu o Meri kei Josefa. A tiko o koya ena valetabu, ka veivosaki tiko kei na so na qasenivuli me baleta na ivolanikalou. Era taroga tiko Vua na qasenivuli na taro eso. Era qoroqoro ena levu ni nona kila ka o Jisu!

Luke 2:46–47; raica talega na Josefa Simici iVakadewa ena ivakamacala era 46c

A tukuna o Meri vei Jisu na nodrau lomaleqa ni rau sega ni kunei Koya rawa. A kaya lesu mai o Jisu ni a cakava tiko o Koya na cakacaka nei Tamana. A lesu tale o Jisu ki Nasareci kei na Nona matavuvale. A talairawarawa o Koya vei Meri kei Josefa.

Luke 2:48–52

A vuli tikoga o Jisu. A tubu cake ka kaukaua cake o Koya. A lomani Koya na Tamada Vakalomalagi ka vukei Koya me vakavakarau kina Nona ilesilesi. A lomani ira na tamata era tu wavoliti Koya o Jisu, ka ra lomani Koya.

Luke 2:52