Sa Tucake Tale ko Koya

Era sa biuta na yago i Jisu na Nona tisaipeli ena loma ni ibulubulu. Era a vinakata me cakava e levu na ka mera taqomaka kina na Yagona, ia a sa voleka mai na Siga ni Vakacecegu. Eratou a navuca meratou lesu tale mai ni oti na Siga ni Vakacecegu me mai vakaotia.

Luke 23:52–56

Ena mataka caca ena ikatolu ni siga ni oti na mate nei Jisu, eratou a lako kina ibulubulu o Meri na yalewa ni Makitala kei na so tale.

Luke 24:1; Joni 20:1

Ni ratou yaco yani, eratou a raica ni sa vaqiqici tani na vatu ka sogota tu na ibulubulu. Eratou a curu ki loma ni ibulubulu, ka sa sega ni tiko kina na yago i Jisu.

Luke 24:2–3; Joni 20:1

A cici o Meri me laki tukuna vei Pita kei Joni ni dua sa kauta tani na yagoi Jisu. Rau a cici o Pita kei Joni kina ibulubulu.

Joni 20:2–4

Nirau sa yaco ki na ibulubulu, rau sa curu yani ki loma o Pita kei Joni. Erau a raica ni sa yali na yagoi Jisu. Na isulu a ologi kina a se tu ga e kea.

Joni 20:5–7

Erau a lako i vale o Pita kei Joni, ia a tiko ga ena ibulubulu o Meri, ka tagi tiko. A rai yani ki loma ni ibulubulu ka raica kina erua na agilosi. Erau a tarogi koya se cava e tagi tiko kina. A kaya o koya ni dua sa kauta na yagoi Jisu, ka sega ni kila o koya na vanua e tiko kina.

Joni 20:11–13

Sa qai lako mai ko Jisu, ia o Meri e sega ni kila ni sai Koya ga. A tarogi koya o Jisu, "Yalewa, ko sa tagi ena vuku ni cava?" A nanuma o Meri ni sai Koya na ivakatawa ni were. A tarogi Koya se kila na vanua e tiko kina na yago i Jisu.

Joni 20:14–15

A kaya o Jisu, "Meri." A raivuki o koya. Sa qai kila oqo o koya ni sai Jisu oya! A kaya vua o koya, "Vakavuvuli." A kerei koya o Jisu me tukuna vei iratou na vo ni tisaipeli ni gadrevi Vua me lako vei Tamana Vakalomalagi. A raici iratou na vo ni tisaipeli o Meri ka tukuna vei iratou ni a raici Jisu ka sa bula tale ko Koya!

Joni 20:16–18

Ena yakavi oya, e vuqa vei iratou na iApositolo eratou a tiko vata. Eratou a sogota na katuba, n iratou rerevaka de era na tovolea na nodra iliuliu na Jiu mera kunei iratou. Vakasauri, era a raici Jisu ni tucake tu ena kedra maliwa. Taumada era a rere. Eratou a nanuma ni o Koya edua na yalo. A kaya ko Jisu, "Dou vakacegu."

Luke 24:33–38; Joni 20:19

A sureti iratou na iApositolo o Jisu meratou tara na Ligana kei na Yavana. A vinakata o Koya me ratou kila ni tiko edua na yagona, ka sega ni yalo ga. A kana ika sara mada ga kei na oni vata kei iratou. Eratou sa marau vakalevu na tisaipeli ni raici Koya!

Luke 24:39–44; Joni 20:20

Sa qai vukei iratou na Nona iApositolo o Jisu me ratou kila vakavinaka na ivolanikalou ni vakavuvulitaka na Nona mate kei na Tucaketale. A vinakata o Koya meratou vakavulici ira na tamata kecega ni baleta ena vukuna, sa rawa nira veivutuni ka vosoti kina. O iratou na iApositolo eratou na Nona ivakadinadina.

Luke 24:44–48

O Tomasi na iApositolo a sega ni tiko ena gauna a lako mai kina o Jisu. A kaya o koya ni na sega ni vakabauta ni bula tiko o Jisu vakavo ga ke raica na we ni ivako e Ligana.

Joni 20:24–25

Ni oti e walu na siga, era a soqoni vata na tisaipeli. A rairai tale mai kina o Jisu. Ena gauna oqo a tiko kina e kea o Tomasi.

Joni 20:26

A sureti Tomasi o Jisu me tara na mavoa ena Ligana kei na Sarisarina. A kaya vei Tomasi, "Kakua ni vakatitiqa, mo vakadinata ga." A kaya o Tomasi, "Noqu Turaga ka noqu Kalou." Sa qai vakabauta o Tomasi ni sa tucaketale o Jisu. A kaya o Jisu nira vakalougatataki na tamata nira vakabauta, kevaka mada ga era se bera ni raici Koya.

Joni 20:27–29