Veivakavulici o Jisu me baleta na Qele, Sorenikau, Madrai, kei na Mataniciva

A dau talanoataka wasoma o Jisu na italanoa e vakatokai na vosa vakatautauvata. Ena vosa vakatautauvata, a vakatauvatana kina o Jisu, na veika ena veisiga ki na dina bibi eso me baleta na Nona kosipeli. Me kilai na vosa vakatautauvata, o ira era daumuri Koya mera vakarorogo sara vakavinaka ka vakasamataka vakatitobu na kedra ibalebale. A vukei ira na vosa vakatautauvata mera vulica na veika me baleta na matanitu ni Kalou.

Maciu 13:3, 10–15

Ena dua na vosa vakatautauvata, a gole kina dua na were e dua na tamata me tea eso na sorenikau. A kaburaka o koya e vuqa na sorenikau ena loma ni were. Era a lutu na sorenikau ena veimataqali vanua duidui.

Maciu 13:3

Eso na sorenikau era a lutu ena dua na salatu qele kaukauwa, ka ra sega ni tubu rawa kina. Era a lako mai na manumanu vuka ka kania na sorenikau era lutu kina.

Maciu 13:4

Eso na sorenikau era a lutu ena qele veivatu. Era tubucake vakatotolo sara na sorenikau, ia a sega ni tubu rawa na wakana baleta na vatu. Ni sa katakata mai, sa mate na kau.

Maciu 13:5–6

Eso na sorenikau era a lutu ena qele sinai ena veiwa vakavotona. Ena vuku ni veiwa vakavotona, a sega ni tubu rawa kina na sorenikau.

Maciu 13:7

Era a lutu na sorenikau tale eso ena vanua vinaka. A yaco mera kau kaukauwa, ka bulabula vinaka. Era a vuataka e vuqa sara na vuana.

Maciu 13:8

Me vukei ira na Nona tisaipeli mera kila, a vakamacalataka o Jisu na ibalebale ni Nona vosa vakatautauvata. Na sorenikau era sa vaka na vosa ni Kalou. Na veimataqali qele era sa vaka na yalo ni tamata kei na sala duidui era ciqoma kina mera rogoca na vosa ni Kalou. Na qele vinaka sa vakataki ira na tamata era rogoca na vosa ni Kalou, kila vakavinaka, ka talairawarawa Vua.

Maciu 13:18–23

Me vakavulica na sala ena tubu kina na matanitu ni Kalou, a tukuna o Jisu me baleta e dua na sore ni musita. Esa ka lailai sara, ia e tubu me dua na vunikau ka rawa ni ra bula kina na manumanu vuka.

Maciu 13:31–32

A kaya talega o Jisu ni matanitu ni Kalou sa vaka na leveni se yisi ka vakayagataka e dua na yalewa ni buli madrai tiko. E taura ga vakalailai e dua na leveni me rawa ni tubu taucoko kina na ibuli.

Maciu 13:33

A talanoataka o Jisu e dua tale na italanoa me baleta e dua na tamata ka a volia na mataniciva. A raica o koya e dua e totoka ka yaga sara. A volitaka na veika kece e taukena me rawa kina ni volia na mataniciva. A tukuna o Jisu na italanoa oqo me vakavulica ni sa rui yaga vakalevu sara na veivakalougatataki ni kosipeli meda cakava na veika kece sara eda rawata me da ciqoma kina.

Maciu 13:45–46