Cakacaka 9:1–31
Rairai ko Jisu vei Saula
E dua na veisureti ni veivutuni ka muria na Turaga
O Saula e dua na Farisi—e dua na nodra iliuliu na Jiu ka kila vinaka tu na ivolanikalou. Ia a sega ni vakabauta o Saula ni o Jisu sa iVakabula. E vakavuqa ni dau biuti ira na daumuri Jisu e valeniveivesu. Ena dua na siga a lako o Saula ki na dua na korolevu ka vakatokai o Tamasiko me vesuka eso na daumuri Jisu ka kauti ira ki Jerusalemi me ra totogitaki.
Cakacaka 9:1–2; 22:4–5; 26:5
Ni lako tiko o Saula, a cilavi koya vakasauri e dua na rarama. E rarama vakalevu cake mai na matanisiga E sa bale sobu o Saula ki na qele. A rogoca e dua na domo ni kaya, “I Saula, Saula.” Sa qai tarogi Saula na domo na vuna a valuti Jisu kina ka vakararawataki ira na Nona tisaipeli.
Cakacaka 9:3–4; 26:13–14
A taroga o Saula se o cei a vosa tiko. E kaya na domo, “Oi au ko Jisu.” A rere ka kurabui o Saula. A tarogi Jisu ena ka me cakava. A kaya o Jisu vei Saula, “Tucake, ka lako ki na koro.” E kea sa qai vulica kina okoya na veika me na cakava tarava.
Cakacaka 9:5–6
A talairawarawa o Saula ka tucake. Ia a mataboko ena gauna oqo. A sega ni raica rawa e dua na ka. O ira na tamata era lako vata kei koya era kauti koya ki na koro ko Tamasiko. Me tolu na siga, a sega ni kania se gunuva ko Saula e dua na ka.
Cakacaka 9:8–9
E dua vei ira na tisaipeli i Jisu ka vakaitikotiko e Tamasiko o Ananaiasa. A sikovi Ananaiasa o Jisu ena dua na raivotu ka tukuna vua me lako ka vukei Saula.
Cakacaka 9:10–12
Ia a veilecayaki o Ananaiasa. E a rogoci Saula okoya. E kila na levu ni nona valuti ira na tisaipeli i Jisu o Saula.
Cakacaka 9:13–14
A kerei Ananiasa o Jisu me vukei Saula. E kaya o Jisu ni sa digitaki Saula me kauta na Nona kosipeli vei ira e vuqa na tamata era sega ni Jiu ka sega ni kilai Koya.
Cakacaka 9:15–16
A talairawarawa o Ananaiasa vei Jisu. Sa kunei Saula o koya ka solia vua e dua na veivakalougatataki. A vakatokai koya o Ananaiasa me “Saula na Taciqu.”
Cakacaka 9:17
E kaya o Ananaiasa ni a talai koya mai o Jisu me rawa ni vakabulai Saula ka vakasinaiti ena Yalo Tabu. Ena gauna oya, sa rawa ni rai tale o Saula.
Cakacaka 9:17–18
Sa qai papitaiso o Saula. Ka qai vakavulici ira kece na tamata ena korolevu me baleti Jisu Karisito. Era sa qoroqoro na tamata ni sa veisau vakalevu o Saula. Ena vo ni nona bula taucoko, a vakatokai ko Saula me o Paula. E vakavulici ira na tamata kecega, Jiu kei na vuqa tale, me ra vakabauti Jisu. A yaco o Paula me dua na iApositolo i Jisu Karisito.
Cakacaka 9:18–22, 29–31; 13:9