O Jisu e Kecisemani

Eratou a gole o Jisu kei iratou na Nona iApositolo ki na dua na were ka vakatokai o Kecisemani. Sa kerei Pita, Jemesa, kei Joni o Jisu me ratou muri Koya ka tukuna vei ira na kena vo me ra wawa tiko.

Maciu 26:36–37; Joni 18:1

Sa kaya o Jisu vei Pita, Jemesa, kei Joni ni sa rarawa sara tiko vakalevu. A kerei ira o Koya me ra yadra tiko vata kei Koya ni sa masu tiko.

Maciu 26:38

A qai taubale vakalailai yani o Jisu ki na were. Sa tekivu me vakararawataki ena vuku ni noda ivalavala ca me rawa kina ni da veivutuni ka vosoti. A vakila talega o Jisu na noda mosi, tauvimate, kei na rarawa me kila o Koya na sala me vukei keda kina. E vakayacora oqo o Koya baleta ni lomani iko. Na veika kece oqo e tiki ni nona ituvatuva na Tamada Vakalomalagi.

Maciu 26:39; Luke 22:41; Roma 3:23; Alama 7:11–13; 3 Nifai 27:19

E mosimosi sara na veivakararawataki nei Jisu ka kerea kina na Tamada Vakalomalagi kevaka e rawa me kauta laivi na rarawa o ya. Ia sa tuvakarau o Koya me cakava na ka e gadreva Vua o Tamana me cakava. E kaya o Koya, “Me kakua ni yaco na noqu lewa, me yaco ga na nomuni lewa.”

Luke 22:42

Sa lako o Jisu vei Pita, Jemesa, kei Joni ka raica ni ratou sa moce tu. A vakayadrati ira o Koya ka kerei ira tale me ra yadra tiko ka masu. Ia e kila o Koya ni dina ga ni ra vinakata me ra yadra tiko, era sa oca sara vakalevu.

Maciu 26:40–41

Sa masu tale o Jisu. A lako mai e dua na agilosi me solia Vua na kaukauwa. A vakila o Koya e levu na mosi, ka mani masu vakaukauwa sara. Na nona bunu sa titiri ni dra ni sa lutu ki na qele.

Maciu 26:42; Luke 22:43–44; Mosaia 3:7; Vunau kei na Veiyalayalati 19:16–19

Vakarua, a gole o Jisu vei Pita, Jemesa, kei Joni ka raici iratou ni ratou sa moce. Kena itinitini, a vakayadrati ira cake o Koya, baleta ni sa yaco mai na gauna me sa kau tani kina o Koya.

Maciu 26:43–46