O Jisu ni Vakani Ira e Udolu na Tamata

Sai Koya na Madrai ni Bula

Sa qai kila o Jisu ni sa vakamatei o Joni na Dauveipapitaiso. A gole ki na dua na vanua vakayawa sara mai na veitauni me rawa kina Vua me tiko duadua ga.

Maciu 14: 13

Veivosaki tiko o Jisu kei na dua na ilawalawa tamata.

Ni ra sa rogoca na tamata na vanua sa lako kina o Jisu, era a muri Koya. A raici ira o Jisu, ka sa lomani ira o Koya. A vakalougatataki ira ka vakabulai ira o Koya ena siga taucoko.

Maciu 14:13–14

Kerei iratou na iApositolo o Jisu me ratou solia vei ira na tamata eso na ka mera kania.

Ni voleka ni cava na siga oya, era a viakana na tamata. Eratou nanuma na iApositolo ni dodonu me talai ira lesu o Jisu ki na veitauni me kauta mai na kakana. Ia a vinakata o Jisu mera tiko ga. A kerei iratou na iApositolo me solia vei ira eso na ka mera kania.

Maciu 14:15–16

Raica o Adriu e dua na gonetagane ka tiko vakalailai vua eso na kakana.

A kunea o Adriu na iApositolo e dua na gonetagane ka tiko vua e lima na ibuli madrai kei na rua na ika lalai me solia vei ira na tamata. Ia era sa 5,000 na tagane, vakakina o ira na yalewa kei na gone, ka ra gadreva mera kana. E rawa vakacava ni ra vakani e vuqa sara na tamata ena kakana lailai vaka oya?

Maciu 14:17, 21; Joni 6:8–10

Sa masu o Jisu ka vakalougatataka na kakana.

A kerei iratou na iApositolo o Jisu me ratou kauta mai na kakana Vua. A tukuna o Koya vei ira na tamata mera dabe e ra ena veico. A qai cabora o Jisu e dua na masu me vakavinavinakataka na Tamada Vakalomalagi me baleta na madrai kei na ika ka me vakalougatataka. Oti sa qai dovia na madrai kei na ika.

Maciu 14:18–19; Joni 6:10–11

Eratou veisoliyaka na iApositolo na kakana vei ira na tamata.

A kerei iratou na Nona iApositolo o Jisu me ratou solia na madrai kei na ika vei ira na tamata. Era a kana kece, ka ra sa mamau kece. Ni ra sa kana oti, a se vo tu e 12 na basikete ka sinai tu ena ivovo ni kakana!

Maciu 14:20; Joni 6:11–13

Era sa lesu mai na tamata, ka vaqara eso tale na kakana.

Ena siga tarava, era lako tale mai na tamata vei Jisu. Ia a kila o Jisu ni vuqa vei ira era sa muri Koya tikoga baleta ni solia vei ira o Koya na kakana. A vakananuma vei ira o Jisu ni kakana e lekaleka walega na kena yaga. A tiko Vua e dua na ka e vinaka cake sara me solia vei ira.

Joni 6:14, 24–27

Vakavulica o Jisu ni sai Koya na Madrai ni Bula.

A kaya o Jisu, “Koi au na madrai ni bula.” Na madrai sa solia vei keda na bula e vuravura. Ia o Jisu Karisito e rawa ni solia vei keda na bula tawamudu kei Tamada Vakalomalagi.

Joni 6:35–58

Era sa yalorarawa na tamata ena veika e vakavulica tiko o Jisu.

E vuqa na tamata era a sega ni taleitaka na veika a saga tiko o Jisu me vakavulica. Era sa biubiu ka navuca me ra kakua ni muri Jisu tale.

Joni 6:60, 66

Tukuna o Pita vei Jisu ni ratou na sega ni biuti Koya na iApositolo.

A qai tarogi iratou na Nona iApositolo o Jisu, “Dou sa via lako tani talega koi kemudou?” A sauma o Pita, “Kemuni na Turaga, keitou na lako vei cei? sa tu ga vei kemuni na vosa ni bula tawamudu.” Eratou a sega ni lako tani na iApositolo. Eratou a kila tu nio Jisu Karisito sa iVakabula ka Luve ni Kalou.

Joni 6:67–69