Vakavulica o Jisu na iVunau mai na Ulunivanua

E ratou a gole o Jisu kei na Nona tisaipeli ki na dua na ulunivanua volekata na Wasawasa e Kalili. E kea a vakavulica kina o Jisu vei iratou na sala meda na bula marau kina ka yaco meda vakataka vakalevu cake na Tamada Vakalomalagi.

Maciu 5:1–2

A vakavulica o Jisu ni ra na vakalougatataki ka marau na tamata ni ra yalomalumalumu, yalosavasava, ka ra tovolea mera cakava na ka dodonu. O ira era vosoti ira na tani e rawa ni ra vosoti. O ira na dautataro era na vakatokai me luve ni Kalou.

Maciu 5:3–9

A kaya o Jisu ni o iratou na Nona tisaipeli sa rarama kei vuravura—me vaka e dua na koro ena dua na delana e rawa nira raica kece na tamata. E sega ni dodonu meda tabonaka na noda rarama.

Maciu 5:14

Ni da muri Jisu, eda sa vaka na kadrala ka vakararamataki ira kece ena loma ni rumu. Na noda cakacaka vinaka e rawa ni vukei ira na tamata mera vakabauta na Tamada Vakalomalagi.

Maciu 5:15–16

A kaya o Jisu ni dodonu meda lomani ira na tamata kecega—o ira sara mada ga na tamata era sega ni lomani keda. E dodonu meda masulaki ira. A vakavulica o Jisu ni dodonu meda tovolea meda vakataki Tamada Vakalomalagi. A vakavulica o Koya ni gauna eda vukei ira kina na tamata, e sega ni dodonu meda tukuna vei ira kecega na tamata na ka eda cakava. Na Kalou e raica na veika vinaka eda cakava, ka na vakalougatataki keda o Koya.

Maciu 5:38–48; Maciu 6:1–4

Nida masu, e sega ni dodonu meda leqataka na veika era nanuma na tamata baleti keda. E sega ni dodonu meda cavuta na veivosa vata ga e veigauna kevaka e sega ni noda inaki dina. E dodonu meda vosa mai na lomada. E dau rogoca noda masu na Tamada Vakalomalagi ka kila tu na veika eda gadreva. Kevaka mada ga e sega ni dua tale e rogoci keda rawa, ena rogoci keda o Koya.

Maciu 6:5–8

A vakavulica o Jisu ni sega ni dodonu meda nanuma ni da sa vinaka cake mai vei ira na tamata tale eso. E dodonu meda nanuma tiko ni tu kece vei keda na bolebole. Me kua kina nida vakalewai ira na tani, sa dodonu ga meda vakasamataka na sala meda vinaka cake kina. E dodonu meda cakava vei ira na tani na veika eda vinakata mera cakava vei keda.

Maciu 7:1–5, 12

A qai talanoataka o Jisu me baleta e dua na tamata lialia ka tara na nona vale ena nuku kei na dua na tamata vuku ka tara na nona vale ena dua na vatu. Ni sa liwa mai e dua na cava, sa bale sobu na vale ena nuku, ka duri tu ga na vale ena vatu. A kaya o Jisu kevaka eda rogoca na Nona ivakavuvuli ka muria, eda sa vaka na tamata vuku.

Maciu 7:24–28