Maciu 18:21–34
Na Vosa Vakatautauvata ni Dauveiqaravi Ka Sega ni Veivosoti
E vakatavulica o Jisu na veivosoti
Dua na siga, a tarogi Jisu o Pita ena dua na taro bibi. A vinakata me kila na levu ni gauna e dodonu me vosoti ira kina na tamata ni ra cakacala. “Me vakavitu?” A taroga o Pita. A sauma o Jisu na taro i Pita ni tukuna vua e dua na italanoa se vosa vakatautauvata.
Maciu 18:15–21
Ena italanoa, a tiko kina e dua na tui ka levu na nona dauveiqaravi. E dua vei ira na dauveiqaravi a dinautaka tu vua na tui e tini na udolu na taledi. Sa ilavo levu dina!
Maciu 18:23–24
Sa sega ni sauma lesu rawa kivua na tui na dauveiqaravi. Sa kaya na tui ni na volitaka na dauveiqaravi kei na nona matavuvale me saumi kina na dinau.
Maciu 18:25
Ni sa rogoca tu na dauveiqarvi, sa bale sobu na duruna. A vakamasuta na tui me solia vua eso tale na gauna. “Ni vosoti au mada ga,” kaya o koya, “kau na sauma kecega vei kemuni.”
Maciu 18:26
Sa yalololoma na tui vua na dauveiqaravi. Sa nanuma tu me vosoti koya. Sa sega ni gadrevi vua na dauveiqaravi me sauma na ilavo. Sa galala o koya me lako!
Maciu 18:27
A qai lako na dauveiqaravi ka raica e dua na turaga ka dinautaka tu vua e dua na ilavo lailai. A taura kaukauwa na turaga oya ka kaya, “Sauma mai.”
Maciu 18:28
Sa bale sobu na duruna na turaga oya. “Ni vosoti au mada ga,” kaya o koya, “kau na sauma kecega vei kemuni.” Ia sa sega ni vosoti koya na dauveiqaravi. E sa vakauti koya ki valeniveivesu.
Maciu 18:29–30
Ni sa kila na tui na ka sa yaco, sa vinakata o koya me raica na dauveiqaravi. A vakananumi koya na dauveiqaravi na tui ni a sa vosoti tu ena dua na dinau levu. A kaya vua na nona dauveiqaravi ni sa dodonu talega vua me vosota na turaga ka dinau ilavo vua.
Maciu 18:31–33
Eda sa dinautaka taucoko na ka eda sega ni sauma rawa vakataki keda. Sa vakamacalataka vei Pita o Jisu ni sa vosoti keda na Kalou, sa dodonu kina me da vosoti ira talega na tani. Ka sega ni dodonu meda muduka ni oti e vitu na gauna ia sa dodonu meda lomasoli tu ga ena veivosoti.
Maciu 18:22, 34–35; raica talega na Maciu 6:14; Vunau kei na Veiyalayalati 64:9–10