Era Sikovi Meri kei Josefa na Agilosi

Rau digitaki me qarava na Luve ni Kalou

E dua na yalewa na yacana o Meri a vakaitikotiko ena taoni o Nasareci. A dau lomana na Kalou o koya ka talairawarawa ki na Nona ivunau. A musuki tu o Meri vua e dua na tagane na yacana o Josefa, ka dau lomana talega na Kalou.

Maciu 1:18–19; Luke 1:26–28

Ena dua na siga a sikovi Meri e dua na agilosi na yacana o Keperieli. E liu, a rere o Meri. Ia a kaya o Keperieli ni sa talai koya mai na Kalou. A sega ni dodonu kina me rere o Meri. A kaya nio Meri e sa duatani sara vua na Kalou ka na yaco totolo me na vakaluveni. Na luvei Meri ena yaco me Luve ni Kalou, o Jisu.

Luke 1:26–33

Tukuna tiko na agilosi vei Meri ni na vakaluveni o koya.

Ia a veilecayaki o Meri. A se sega mada ni vakamau tu o koya vei Josefa. E rawa vakacava me dua na luvena? A vakamacalataka o Keperieli ni na yaco oqo ena kaukauwa ni Kalou. A kaya vua o koya, “Ni na sega ni dredre vua na Kalou e dua na ka.”

Luke 1:34–37

Tukuna tiko o Meri vua na agilosi ni sa tu vakarau me sa tina ni Luvena na Kalou.

A yalomalumalumu ka yalodina o Meri. A tukuna vei Keperieli ni sai koya na italai ni Turaga. Sa tuvakarau o koya me tinana na Luvena na Kalou.

Luke 1:38

Mai rogoca o Josefa ni na vakaluveni o Meri.

Ni sa kila o Josefa ni na vakaluveni o Meri, a lomaleqa o koya. A vakataroga se me na vakamautaki Meri tikoga.

Maciu 1:19

Ia ena dua na bogi ena tadra, a sikovi Josefa na agilosi. A kaya na agilosi vei Josefa ni luvei Meri sa Luve ni Kalou ka sa dodonu me vakayacani koya o Josefa me o Jisu. Ena vakabulai ira kece na tamata o Jisu mai na nodra ivalavala ca. A kaya na agilosi ni dodonu tikoga vei Josefa me vakamautaki Meri.

Maciu 1:20–23

A cakava o Josefa na ka a kaya na agilosi. Rau sa qai vakamau o Josefa kei Meri.

Maciu 1:24

O Meri ni sikova tiko na tavalena o Ilisapeci.

A qai gole o Meri ka laki sikovi Ilisapeci na tavalena. A tukuna vei Meri na agilosi ni sa bukete tale tikoga o Ilisapeci, e dina ga ni sa qase sara o koya. Oqo a dua tale na cakamana mai vua na Kalou. Na luvena tagane ena tubu cake me o Joni na Dauveipapitaiso. Ni curu yani ki vale o Meri, a kidavaki Ilisapeci sara yani.

Luke 1:13–17, 36, 39–40

Ni rogoci Meri ga o Ilisapeci, a rika ena reki na luvei Ilisapeci e ketena. A vakasinaiti o Ilisapeci ena Yalo Tabu. A kila o koya ni sa tiko vei Meri na Luve ni Kalou. A reki o Meri vata kei Ilisapeci. A vakacaucautaka o koya na Kalou ena vuku ni veika talei kece e cakava me vakalougatataki ira kina na Luvena.

Luke 1:41–55