O Jisu ena iSilisili e Peceseita

E Jerusalemi, a tiko e dua na vanua ka vakatokai na iSilisili e Peceseita. Era a vakabauta na tamata ni tobu oqo e tu kina na kaukauwa veivakabulai. E vuqa na tamata era tauvimate, mataboko, se sega ni rawa mera taubale era dau lako mai ki na isilisili oqo.

Joni 5:2–3

Era a vakabauta na tamata ni, ena so na gauna, a lako sobu mai e dua na agilosi ka vakayavalata na wai ni isilisili. Na imatai ni tamata me sobu i wai ni oti na kena vakayavalati ena vakabulai mai na mate cava ga era tauvimate tu kina. E vuqa na tamata era tovolea mera imatai ki na isilisili.

Joni 5:4

E dua vei ira na tamata ena isilisili oya a dua na tamata ka sega ni lako rawa tu. A sa tauvimate tu o koya me 38 na yabaki. A vinakata o koya me sobu kina isilisili me vakabulai, ia ena veigauna ga e vakatovolea kina, e dua tale e dau sobu eliu vei koya.

Joni 5:5–7

Ena dua na Siga ni Vakacecegu, o Jisu a tiko voli mai Jerusalemi. Ni sa lako curuma yani na korolevu o ya, a yaco yani o Koya kina isilisili e Peceseita ka raica ni davo koto e kea na tamata oqo.

Joni 5:6

A kila tu o Jisu ni sa tauvimate voli na tamata oqo ena dua na gauna balavu ka sega ni lako rawa tu. A taroga o Jisu vua ke vinakata me na vakabulai.

Joni 5:6

A kaya na tamata oqo vei Jisu ni sega ni dua e rawa ni vukei koya me sobu kina isilisili, ka ni sa vakayavalati na wai, eso tale era dau sobu eliu vua.

Joni 5:7

A kaya o Jisu vua na tamata oqo, “Tu cake, taura na nomu imocemoce, ka lako.” Ena gauna vata ga oya, sa vakabulai sara na tamata oqo! A qai tucake ka taura cake na nona imocemoce. Ena imatai ni gauna ena 38 na yabaki, a sa lako rawa o koya!

Joni 5:8–9

Era raica na iliuliu ni Jiu ni colata tiko na nona imocemoce na tamata oqo. Era kaya ni sega ni rokova tiko o koya na Siga ni Vakacecegu, baleta nira nanuma ni sa vaka me cakacaka tiko ena nona colata voli nona imocemoce. A vakamacalataka na tamata oqo ni se qai vakabulai oti ga, kei koya a vakabulai koya a tukuna vua me colata na nona imocemoce.

Joni 5:10–11

Era qai kila na iliuliu ni o Jisu a vakabulai koya na tamata oqo ka tukuna vua me colata na nona imocemoce ena Siga ni Vakacecegu. Era a cudruvi Jisu ka vinakata mera vakamatei Koya. A kaya vei ira o Jisu ni sa cakava tikoga na veika sa vakavulica Vua na Tamana mai Lomalagi me cakava.

Joni 5:15–17