Sa Sucu Na iVakabula

E rau vakaitikotiko e Nasareci o Josefa kei Meri. Sa vakarau vakaluveni tu o Meri. Mera gole kece yani na tamata kina nodra taoni mera laki volai. A kena ibalebale oqo me rau gole o Josefa kei Meri ki Peceliema, na taoni nei Josefa. Me rau lakova e dua na sala balavu me rau yaco rawa kina e kea.

Luke 2: 1–5

A sega ni rawarawa vei Meri na ilakolako. Baleta ni vuqa na tamata era a gole mai ki Peceliema, a sega kina ni kunea o Meri kei Josefa e dua na vanua me vakasucu kina o Meri.

Luke 2: 6–7

Rau kunea e dua na vanua era dau maroroi kina na manumanu. Ena vanua lolovira oqo, a sucu kina o Jisu. O Meri kei Josefa erau a lomana ka qarava na gonelailai o Jisu. E rau viviraki Koya ena isulu me vukei Koya me katakata ka logavinaka. E rau vakotori koya me moce ena dua na takona, ka dau vakayagataki me ikanakana ni manumanu.

Luke 2: 6–7

Vakavoleka, era vakatawai ira tiko na nodra sipi ena bogi na kena ivakatawa. Vakasauri ga, a cila wavoliti ira mai e dua na rarama ramase, ka rairai mai e dua na agilosi. Era rere na ivakatawa ni sipi.

A kaya vei ira na agilosi mera kakua ni rere, baleta ni tiko vua e dua na itukutuku totoka! A sa sucu na iVakabula mai Peceliema, ka rawa ni ra kunei koya ni davo koto ena dua na vale ni manumanu. Era qai lako mai e levu tale na agilosi, ka kaya tiko, “Sa nona na Kalou na vakarokoroko ena veiyasana e cake sara, a sa veivinakati rawa ko ira e vuravura, sa lomani ko ira na tamata.”

Luke 2:10–15

Era vakusakusa yani na ivakatawa ni sipi ki Peceliema ka kunea na gonelailai o Jisu, me vaka ga a kaya na agilosi. Era tukuna vei ira na tamata na veika totoka era sa raica ka rogoca. Era kila ni o Jisu e dua na gonelailai digitaki.

Luke 2:16–17

Rau kauta o Meri kei Josefa na gonelailai ki valetabu me laki vakaraitaki Koya vua na Kalou. E kea rau sotava kina e dua na tamata na yacana o Simioni. A tukuna vei Simioni na Yalo Tabu ni na yaco me sota mada kei na iVakabula ni bera ni mate. A keveta o koya na gonelailai ka kaya ni na vakabulai ira kece na luve ni Kalou o Jisu. Rau kurabui o Josefa kei Meri ena ka tukuna o koya.

Luke 2:22–35

Ena valetabu a tiko kina e dua tale na tamata na yacana o Ana. A sa mate na watina ena vuqa na yabaki sa oti. Ia oqo sa dau vakayagataka o Ana na nona gauna taucoko me qarava na Kalou ena valetabu. E vakavinavinakataka na Kalou na madigi me sota kei na iVakabula. Ena veigauna kece a sotava kina o koya e dua e waraka tiko na iVakabula, a dau tukuna vei ira me baleti Jisu.

Luke 2: 36–38

Ni sa sucu ko Jisu, era a raica na tamata vuku ena dua tale na vanua e dua na kalokalo vou. Era kila ni kena ibalebale ni sa sucu e dua na gonelailai digitaki ka na Luve ni Kalou ka iVakabula kei vuravura. Era tekivuna e dua na ilakolako balavu me sikova na gone oqo ka sokalou Vua. Era vinakata me kauta mai Vua na isolisoli me vakaraitaka kina na nodra lomani Koya.

Maciu 2:1–7; raica na Josefa Simici iVakadewa ena ivakamacala, 2a

Ni oti nodra ilakolako balavu, era a yaco mai ki Jerusalemi na tamata vuku. Era kaya ni sa sucu e dua na nodra tui vou na Jiu, na iVakabula, ka ra lako mai me qaravi Koya. Era a taroga na vanua e rawa nira kunea kina na tui vou.

Maciu 2:1–2

A rogoca e dua na tui na yacana o Eroti nio ira na tamata vuku era vakasaqara tiko e dua na tui vou. A sa lomaleqa o koya. Era a kaya vua na nona bete kei na nona vunivola ni sa tukuni ena ivolanikalou ni na sucu na tui vou mai Peceliema. A tukuna o Eroti vei ira na tamata vuku mera rai e Peceliema ka qai lesu mai ka tukuna vua ni ra sa kunea na tui vou.

Maciu 2:3–8

Era lako mai na tamata vuku ki Peceliema. Era muria na kalokalo, ka kauti ira vei Jisu. Ni ra sa kunei Koya kei Meri kei Josefa, era solia vei Jisu e tolu na isolisoli talei ka sokalou Vua. A vakasalataki ira na Kalou mera kakua ni lesu kivei Eroti, ka ra lesu ki vale ena dua tale na sala.

Maciu 2:9–12

Nira sa lesu na tamata vuku, a tadra o Josefa. Ena tadra, a tukuna e dua na agilosi vei Josefa ni sa cudru sara o Eroti. A gadrevi kina vei Josefa me kauti Meri kei Jisu ki Ijipita me rau laki taqomaki kina.

Maciu 2: 13

A mata cake sara ga mai o Josefa. A biuti Ijipita mai o koya kei Meri kei Jisu ni se bogi tiko ga.

Maciu 2:14

E ratou tiko mai Ijipita o Meri, Josefa, kei Jisu me yacova ni tukuna vei iratou na agilosi ni sa mate o Eroti ka sa rawa me ratou lesu tale. Ratou sa qai lesu ka lai vakaitikotiko e Nasareci.

Maciu 2:15, 19–23