A Kerei Iratou na iApositolo o Jisu me Vakani Ira Na Nona Sipi

Eratou a laki qoli o Pita kei iratou na iApositolo tale eso, ni oti na tucake tale i Jisu E dina ga ni ratou a qoli tiko ena bogi taucoko, eratou a sega ni rawata edua na ka.

Joni 21:1–3

Ena mataka ka tarava, eratou a raici Jisu e baravi o iratou na iApositolo, ia eratou a sega ga ni kila ni sai Koya. A taroga se ratou sa rawata edua na ika. Eratou a kaya ni sega.

Joni 21:4–5

A kaya o Jisu vei iratou na iApositolo me ratou viritaka na nodratou lawa kina yasa imatau ni waqa ka ratou na rawata kina na ika. Eratou a cakava na iApositolo na ka a tukuna o Jisu, ka sivia na dua na drau na ika era a vakasinaita na lawa! A bibi sara na lawa ena ika ka sega ni rawa kina vei iratou na iApositolo me dreta ki loma ni waqa.

Joni 21:6

Sa qai kila o Joni se o cei na tagane o ya. A kaya vei Pita o koya, "Sa i Koya na Turaga." A rika yani ki waitui o Pita ka qalo yani vei Jisu. O iratou na vo ni iApositolo eratou a kauta na waqa kei na ika ki matasawa. A vakasaqara tiko o Jisu eso na madrai kei na ika, ka a sureti iratou na iApositolo meratou kana vata kei Koya.

Joni 21:7–13

Ni ratou sa kana oti, a tarogi Pita o Jisu, "Ko sa lomani au vakalevu ka vakalailai ko iratou oqo?" A kaya o Pita io. Sa qai kaya o Jisu, "Vakani ira na noqu lami."

Joni 21:15

Sa qai tarogi Pita tale o Jisu se lomani Koya. Sa kaya tale o Pita io. A kaya vua o Jisu, "Vakani ira na noqu sipi."

Joni 21:16

A tarogi Pita ena ikatolu ni gauna o Jisu se lomani Koya. A kaya o Pita, "Kemuni na Turaga, koni sa kila na ka kecega; ko ni sa kila niu sa lomani kemuni." Sa kaya tale vua ko Jisu. "Vakani ira na noqu sipi." A vinakati Pita o Koya me karoni ira na tamata era muri Jisu.

Joni 21:17

E muri, a kerei iratou na Nona iApositolo o Jisu me ratou sotavi Koya ena dua na ulunivanua. E kea a tukuna kina vei iratou me ratou wasea na Nona kosipeli ki vuravura taucoko, vakavulici ira na tamata ena Nona ivakaro, ka papitaisotaki ira kece era sa vakabauta. "Dou na dau vakadinadinataki au," a kaya o Koya. A yalataka ni na tiko vata kei iratou o Koya ka solia vei iratou na kaukaua mai vua na Yalo Tabu.

Maciu 28:16–20; Marika 16:15–19; Cakacaka 1:8

Sa qai lako ko Jisu ki lomalagi ena dua na o. A lesu tale o Koya vua na Tamana mai Lomalagi. Ni ratou raici Koya tiko na iApositolo ni sa biubiu, erau a rairai mai erua na agilosi. Erau a kaya me vaka ga na Nona a lako cake ki lomalagi o Jisu, ena lesu tale mai kina ki vuravura ena sala vata ga oya ena dua na siga.

Cakacaka 1:9–11