Sa Vodo ki na loma i Jerusalemi o Jisu

Sa kidavaka na tamata na nodra iVakabula

Era wawa na tamata mera sotavi Jisu ena taudaku kei Jerusalemi.

Sa voleka na gauna ni Lakosivia, e dua na nodra kanavata bibi na Jiu. E vuqa na tamata era gole ki Jerusalemi me baleta na Lakosivia. A lako talega o Jisu kei ira na Nona tisaipeli. Ni ra rogoca na tamata na lako mai i Jisu, era sa lako ka tavaki Koya.

Maciu 21:1; Joni 12:12–13

Sa volekati Jerusalemi o Jisu kei ira na Nona tisaipeli.

Ni sa yacovi Jerusalemi o Jisu kei ira na Nona tisaipeli, sa kerea o Koya mera kauta mai Vua e dua na asa. Ena vuqa na yabaki sa oti, a kaya e dua na parofita ni na lako mai ena yalomalumalumu na iVakabula, vodoka tu e dua na asa gone.

Maciu 21:1–7; raica talega na Sakaraia 9:9

Sa curuma na korolevu o Jisu ni vodo tu ena asa. Era sa marau na tamata ni raici Koya. Era sa kidavaki Koya me vaka e dua na tui. Era sa biuta na tabani kau kei na isulu eso ki na qele me lakova na asa. Era vakavinavinaka vua na Kalou ka kailavaka, “Osana: Sa kalougata na Tui kei Isireli sa lako mai ena yaca ni Turaga.”

Maciu 21:8–9; Luke 19:36–38; Joni 12:13

E vuqa na tamata e Jerusalemi sa vakananuma na ka sa yaco tiko. “O cei oqo?” era taroga. Eso tale era sauma ni sai Jisu mai Nasareci.

Maciu 21:10–11

E raica o Jisu ni ra veisau ilavo tiko na tamata ena valetabu.

Tarava, sa gole o Jisu ki na valetabu. Eso na tamata ekea a veisau ilavo ka volitaki manumanu tiko me sorovaki. Sa kila o Jisu ni ra sa lawaki ca.

Maciu 21:12

E tukuna o Jisu vei ira ka veisau ilavo tiko mera biuta na valetabu.

E sega ni vinakata o Jisu me ra rawa ilavo mai vei ira na tamata ka vinakata mera sokalou ena valetabu. Sa vakavuna o Koya mera biuta na valetabu ka vukica na nodra teveli. Kaya o Koya, “A noqu vale ena vakatokai me vale ni masu, ia dou sa cakava me nodra qara na daubutako.”

Maciu 21:12–13; raica talega na Aisea 56:7; Jeremaia 7:11

Vakabulai ira tiko na tamata o Jisu ena valetabu.

O ira na tamata mataboko se ira ka sega ni lako rawa sa gole kivei Jisu ena valetabu, ka sa vakabulai ira o Koya. Era kacivaka na gone “Osana,” ka vakacaucautaki Jisu ka kaya ni sai Koya na iVakabula.

Maciu 21:14–15

Sa veivosaki o Jisu kei ira na bete kei na vunivola.

Era sa rarawa eso na bete kei na vunivola ni ra raica na ka a cakava o Jisu ka rogoca na ka era kaya tu na gone. A vakananumi ira o Jisu ena dua na ivolanikalou e kaya ni na vakacaucautaki vakavinaka sara na Kalou mai na gusudra na gone.

Maciu 21:15–16; raica talega na Same 8:2