Eda na Vakabulai Kece Talega Ena Vuku i Karisito

Eso na lewe ni Lotu ena dua na koro levu ka vakatokai ko Korinica era taroga me baleta na ka ena yaco nida sa mate oti. Era se sega ni vakadeitaka ni sa tucaketale o Jisu. Eso era kaya ni sega ni dua na tucaketale. A rogoca o Paula na ka oqo ka vola e dua na ivola vei ira na Yalododonu mai Korinica.

1 Korinica 15:12–14

A vola o Paula ni Nona Tucaketale o Jisu Karisito e dua na tiki bibi ni Nona kosipeli. “A mate na Karisito ena vuku ni noda ivalavala ca,“ a kaya o Paula, ka “tucake tale ena ikatolu ni siga.“ E sivia e 500 na tamata era a raici Koya ni oti Nona Tucaketale, oka kina o Paula kei ira na Apositolo tale eso.

1 Korinica 15:1–8

A vakavulica o Paula kevaka me a sega ni tucake tale na Karisito, eda na rarawa kece ka sega na inuinui. Ena vuku ni Lutu nei Atama, eda na mate kece, ia ena vuku i Jisu Karisito, eda na vakaturi cake talega vakakina!

1 Korinica 15:17–22

E vakananuma o Paula vei ira na Yalododonu mai Korinica ni ra sa papitaisotaki na tamata ena vukudra na mate. Na cava na vuna meda cakava kina kevaka era na sega ni tucake tale o ira na tamata era sa mate? Eda sa papitaisotaki me baleti ira na mate baleta ni da kila ni da na bula tale na tamata kecega. Oqo e solia vei ira na madigi me ra ciqoma na veivakalougatataki ni Turaga.

1 Korinica 15:29

Eso na Yalododonu e Korinica era vakataroga se na vakacava tu na yagoda ni da sa vakaturi cake tale. E kaya o Paula ni na lagilagi na yagoda. Era na sega ni malumalumu se tauvimate se qase mai. Eso era na vakayago vakasilesitieli, ramase me vaka na matanisiga. Eso era na ramase sara me vaka na vula, ka so era na ramase me vaka na kalokalo.

1 Korinica 15:35, 40–43; Vunau kei na Veiyalayalati 76:96–98; 88:20–23