Cakacaka 21–22; 26–28
Na cakamana ena ilakolako nei Paula ki Roma
Sa vakalougatataka na Nona italai na Turaga
Sa tukuna vei Paula na Yalo me lako ki Jerusalemi. E vuqa na tamata ekea era sega ni taleitaka na veika a vakavulica o Paula me baleti Jisu Karisito. Era tauri koya ka vesuki koya ena sinucodo. A tukuna o Paula vei ira na tamata kecega na gauna a raica kina e dua na rarama mai lomalagi, rogoca na domoi Jisu, ka papitaiso.
Cakacaka 21:4, 12–13, 27–40; 22:1–16
A biu ki valeniveivesu o Paula. Ena nona tiko e kea, a rairai mai o Jisu ka kaya, ”Dou reki ga, Paula.” A kaya ni na vakadinadinataki Koya o Paula mai Roma.
Cakacaka 23:10–11
A kau o Paula vei ira na kovana kei na dua na tui. A vakadinadinataki Jisu Karisito ena yalodoudou vei ira na iliuliu qaqa oqo. A vinakata ira kece mera vakabauti Jisu.
Cakacaka 24:10–27; 25:6–8, 17–19; 26:1–29
A talai Paula na tui ki Roma me lewai mai vei Sisa, na tui. A vodo waqa o Paula vata kei ira na kaivesu tale eso, ka kele ena so na gauna. Ena dua na gauna ni kele, sa kila tu o Paula ni sa na vakarau yaco na vulaibatabata. Kevaka era toso tikoga, era na sotava na leqa levu. A tukuna vei ira na kaimua ni waqa me ra wawa me yacova ni sa vinaka cake na draki.
Cakacaka 27:1–10
E sega ni dua e vakabauti Paula, era mani soko tikoga. A yaco mai e dua na cava levu, ka biliraki ena ua na waqa ena veiyasana kecega. Era sa sega ni raica rawa na matanisiga se na kalokalo. Era nanuma ni ra sa namate ena cava.
Cakacaka 27:11–20
Ena dua na bogi, a sikovi Paula e dua na agilosi ni Kalou ka kaya, ”Kakua ni rere, Paula.” A kaya na agilosi ni na yaco ki Roma ko Paula, me vaka sa yalataka na Turaga. A kaya ni Kalou ena taqomaka na tamata kecega ena waqa—e sega ni dua vei ira ena mate.
Cakacaka 27:23–24
Sa tukuna o Paula vei ira kece na ka a kaya na agilosi. ”Dou reki ga,” a kaya o Paula, ”niu sa vakabauta na Kalou.”
Cakacaka 27:21–25
Ni oti e vica na siga sa takasa ka luvu na waqa. Ia me vaka ga a yalataka na agilosi, e sega ni dua ena waqa e mate. Era qalo taucoko ki na dua na yanuyanu ka vakatokai o Melita.
Cakacaka 27:40–44; 28:1
O ira na tamata era vakaitikotiko e Melita era a lomani Paula kei ira na kena vo mai na waqa. Era waqara e dua na matadravu buka me ra vakatakatari kece kina na tamata.
Cakacaka 28:2
Vakasauri, a basika mai na bukawaqa e dua na gata ka katia na ligai Paula. Ia a sega ni mavoa o Paula. A kuretaka laivi ga na gata. Era sa kurabui na tamata.
Cakacaka 28:3–6
A vakadonuya e dua na tamata na yacana o Publius me tiko e nona vale o Paula. A tauvimate bibi sara tiko o tamai Publius. A vakotora na ligana o Paula ka vakayagataka na kaukauwa ni Kalou me vakabulai koya kina.
Cakacaka 28:7–8
E tolu na vula na nona tiko voli e Melita o Paula. A vukei koya na Turaga me cakava e vuqa na cakamana, veivakalougatataki ka vakabulai ira na tamata era tauvimate. Ia, me vaka ga a yalataka na Turaga, a lako o Paula ki Roma.
Cakacaka 28:9–16
Se kaivesu tiko ga o Paula ni tiko mai Roma. Ia era vakatara o ira era yadravi koya tiko me ra sikovi koya na tamata. A vakavulica o Paula baleti Jisu Karisito vei koya ena vakarorogo. A volavola talega vei ira na lewe ni Lotu ena vuqa na vanua. Eso na ivola oqo, se itukutuku vakaiapositolo, era tiko ena Veiyalayalati Vou.
Cakacaka 28:16–31