Vakabula e Dua na Yalewa o Jisu ka Vakatura Cake na Luvei Jairo Yalewa

E dua na tagane na yacana o Jairo e vakaitikotiko vata kei watina kei luvena yalewa ena dua na taoni volekata na Wasawasa e Kalili. O Jairo e dua na iliuliu ena valenilotu, ka ra dau laki qarava kina na Kalou na Jiu.

Marika 5:22

Na luvei Jairo yalewa, ka se qai yabaki 12 ga, a tauvimate bibi sara. A voleka sara ni mate o koya. A kila o Jairo ni gadreva o koya na veivuke. A kila talega ni a tiko voli o Jisu ena nodratou taoni.

Marika 5:22–23

A biuta na nona vale o Jairo ka mai kunei Jisu. A tekiduru ena yavai Jisu ka kerei Koya me laki vakabula na luvena yalewa. A kila tu o Jairo ni kevaka me vakalougatataka na luvena yalewa o Jisu, ena bula o koya. A muri Jairo yani o Jisu ki na nona vale. Era muri Koya eso na ilawalawa tamata levu.

Marika 5:23–24

E dua na yalewa ena tauni vata ga oya a gadreva talega na veivuke i Jisu. A tauvimate levu tu o koya me 12 na yabaki. A vakayagataka na nona ilavo kecega vei ira na vuniwai, ia e sega ni dua a vakabulai koya rawa—sa qai ca ga vakalevu. A kila o koya ni na rawa ni vakabulai koya o Jisu. Ia ena rawa beka vakacava me yacovi Koya yani ena veidrigidrigiti ni tamata?

Marika 5:25–27

A vakabauta na yalewa oqo ni kevaka e rawa ni tara ga na isulu i Jisu, ena vakabulai o koya. A dolele yani vei Jisu ni lako siviti koya. Ena gauna ga a tara kina na bele ni Nona icurucuru balavu, a vakabulai sara na nona tauvimate.

Maciu 9:20; Marika 5:27–29; Luke 8:44

Ena gauna vata ga oya, a mai tu vakadua o Jisu. A vakila o Koya ni sa lako tani mai Vua na kaukauwa. “O cei sa tarai au?” A taroga o Koya. Eratou a veilecayaki na Nona tisaipeli. E vuqa na tamata era a tarai Koya—era a vakavolivoliti iratou tu na tamata. A veiraiyaki o Jisu me raica o cei a tarai Koya.

Marika 5:30–32; Luke 8:45

A raica o Jisu na yalewa ka tara na Nona isulu. A tukuna vei Jisu o koya na nona tauvimate, ka sa vakabulai koya o Jisu. A kaya vua o Jisu me vakacegu ga. A sa vakabulai kina ena vuku ni nona vakabauti Koya. “Mo lako ena vakacegu,” a kaya vua o Koya.

Marika 5:33–34; Luke 8:47–48

A qai lako mai e dua na tamata mai na vale nei Jairo. A mai kaya ni sa bera: Sa qai mate oti na luvei Jairo yalewa. Me kua tale ni qai vakaogai Jisu o Jairo.

Marika 5:35

Ena gauna ga a rogoca kina na ka oqo o Jisu, a kaya vei Jairo, “Kakua ni rere, vakadinata ga.” Rau a qai gole ki na vale nei Jairo.

Marika 5:36–38

Erau a tuberi Jisu o Jairo kei watina kina vanua e koto kina na luvedrau yalewa. A taura na ligai goneyalewa o Jisu ka kaya vua, “Tucake mai.”

Marika 5:41

Ena gauna vata ga oya, a tucake na luvei Jairo yalewa mai na nona idavodavo. A sega tale ni mate o koya! A kerei Jairo kei watina o Jisu me rau kauta mai e dua na ka me kania o koya. Erau a qoroqoro ena ka a cakava o Jisu vei luvedrau yalewa. A kerei rau o Koya me kakua ni tukuna vei ira tale eso na tamata me baleta na cakamana oqo.

Marika 5:42–43