Digitaki Ira na Nona iApositolo o Jisu

Ena dua na siga, era a lako mai na tamata ki na Wasawasa o Kalili mera rogoci Jisu kina ni veivakavulici. A vakavulici ira o Jisu mai na dua na waqa ni ra vakarorogo tiko e baravi. Na waqa a taukena e dua na gonedau ka yacana o Saimoni.

Luke 5: 1–3

Ni sa oti na nona veivakavulici o Jisu, a kerei Saimoni o Koya me kauta yani na waqa kina wai titobu. A kaya vei Saimoni me biuta na nona lawa e wai me qoliva eso na ika. A kaya o Saimoni ni sa qoli tiko ena bogi taucoko ka sega ni rawata e dua na ika. Ia ena vuku ga ni a kerei koya o Jisu, ena tovolea tale o koya.

Luke 5: 4–5

A qoliva rawa o Saimoni e levu sara na ika ni kabasu kina na nona lawa! A qai kere veivuke yani vei ira eso ena dua tale na waqa. Sega ni dede rau sa sinai sara na waqa ena ika, rau sa tekivu me dromu. Eratou a kurabui o Saimoni kei na nona itokani!

Luke 5:6–7, 9

A tekiduru e matai Jisu o Saimoni. A kaya o koya, “Na Turaga, [au] sa tamata ca.” A kila o koya ni sa talai mai vua na Kalou o Jisu. Sa qai kaya o Jisu vua me kakua ni rere.

Luke 5:8

A sureti Saimoni o Jisu, na tacina o Adriu, kei rau na nona itokani, o Jemesa kei Joni, me ratou muri Koya. Eratou na sega tale ni qoliva na ika, eratou sa na vukei ira ga na tamata mera lako mai vei Jisu.

Marika 1:16–17; Luke 5:10–11

E ratou a biuta na nodratou waqa ni qoli o Saimoni, Jemesa, kei Joni ka yaco me ratou iApositolo i Jisu. E muri, a qai solia o Jisu vei Saimoni na yaca na Pita. Na iApositolo sa ikoya e dua na ivakadinadina digitaki i Jisu Karisito. A kaciva o Jisu e 12 na turaga me Nona iApositolo. A masulaka o Koya me kila se o cei me na kaciva. A solia o Koya na lewa ni matabete vei ira na Nona iApositolo me ra liutaka kina na Nona Lotu.

Maciu 10; Luke 6:12–16; 9:1–2

Baleta ni tu vei iratou na iApositolo na kaukauwa ni Kalou, e rawa talega ni ratou vakabulai ira na tamata era tauvimate, kauti ira lesu mai na tamata ki na bula ni ra sa mate oti, ka cakava eso tale na cakamana.

Maciu 10:8

A talai ira yani na Nona iApositolo o Jisu kina vuqa na koro mera vakavulici ira kina na tamata ena Nona kosipeli. A kaya ni Yalo Tabu ena vukei ira me kila na veika me ra tukuna. A kaya o Jisu ni so na tamata era sega ni taleitaka na veika era vakatavulica, ia ni ra veiqaravi ena yalodina, ena tiko vata kei ira na Kalou.

Maciu 10:5–7, 19–22