Sa Sucu o Joni na Dauveipapitaiso—Sa maroroya na Kalou e dua na yalayala vei Ilisapeci kei Sakaraia

Luke 1:5–25, 57–80

Sa Sucu o Joni na Dauveipapitaiso

Sa maroroya na Kalou e dua na yalayala vei Ilisapeci kei Sakaraia

Erau masu tiko o Sakaraia kei Ilisapeci me rau vakaluveni.

O Sakaraia kei Ilisapeci erau tamata yalodina ka dau lomana na Kalou. Erau a masulaka me dua na luvedrau. Ia oqo ni rau sa qase sara, e se bera ga ni rau vakaluveni.

Luke 1:5–7

O Sakaraia e dua na bete ka dau veiqaravi voli ena valetabu e Jerusalemi. Ena dua na siga, a lesi o koya me vakama na ka boi vinaka ena dua na rumu tabu ena valetabu.

Luke 1:8–10

Sa rairai vei Sakaraia e dua na agilosi.

Vakasauri ga, a rairai mai e dua na agilosi. A rere o Sakaraia. A kaya mai na agilosi, “Kakua ni rere, Sakaraia; sa rogoci na nomu masu.” A kaya ni na dua na luvedrau tagane o Sakaraia kei Ilisapeci. Me rau vakatokai koya me yacana o Joni. A kaya na agilosi ni sa tu vei Joni e dua na cakacaka bibi me vakayacora. Ena vukei ira na tamata me ra vakavakarau mera ciqoma na iVakabula ena Nona lako mai.

Luke 1:12–17

A sega ni vakabauta o Sakaraia na ka e tukuna tiko na agilosi. O koya kei Ilisapeci erau sa rui qase sara me vakaluveni. A kaya na agilosi ni baleta ni sega ni vakabauta o Sakaraia na nona itukutuku, ena galu tu me yacova ni sa sucu o Joni.

Luke 1: 18–20

Biubiu tiko mai na valetabu o Sakaraia. Sa sega ni rawa ni vosa o koya.

Era a vakataroga na tamata na vuna sa rui balavu kina na nona tiko o Sakaraia ena loma ni valetabu. Ni sa biubiu o koya, a sega ni rawa ni vosa. Era a kila rawa ni dua na ka bibi sa yaco.

Luke 1:21–23

Erau roqota tiko na luvedrau vou o Ilisapeci kei Sakaraia.

Ena vica na vula i muri, a vakasucuma e dua na gonelailai o Ilisapeci, me vaka ga a yalataka na agilosi. Era marau vakalevu na nodrau matavuvale kei na itokani! Era a lako mai me raica na gonelailai.

Luke 1:57–59

Rau vakatokayacataka tiko na gonelailai o Ilisapeci kei Sakaraia.

Era nanuma ni dodonu me vakayacani na gonelailai me o Sakaraia, me vakataki tamana. A kaya o Ilisapeci, “Ena vakatokai o koya me o Joni.” Era a tarogi Sakaraia, ka se sega tikoga ni vosa rawa. A vola vaqo o koya, “Na yacana o Joni.” Era a kurabui kece kina.

Luke 1:59–63

Sa kaya tiko o Sakaraia ni na yaco me dua na parofita na gonelailai.

Vakasauri ga, a qai vosa rawa tale o Sakaraia. A vakavinavinakataka na Kalou o koya ka vakasinaiti ena Yalo Tabu. A tukuna vei ira kecega ni sa nanuma tiko na Kalou na Nona yalayala vei ira na Nona tamata. A kaya o koya ni na yaco me dua na parofita o Joni. Ena vakatavulici ira na tamata o Joni mera veivutuni ka papitaiso. Ena vukei ira o koya ena nodra vakavakarau mera vuli mai vei Jisu Karisito.

Luke 1:64–80