Juon Leta jān Jemes

Jemes ekar juon ļaddik nejin Mary im juon iaan būratōr ro an Jisōs Kraist. Jemes ekar barāinwōt juon ritōl an Kabun̄ eo ilo Jerusalem. Ekar je juon leta n̄an armej ro doon Anij ilo aolepān laļ in n̄an jipan̄ er mour kōn gospel eo an Jisōs Kraist.

Jemes 1:1

Jemes ekar je, “‘A eļan̄n̄e jabdewōt iami ej aikuj mālōtlōt, en kajjitōk kōn e ippān Anij.” Elōn̄ iiō ko tokālik, juon ļaddik kar etan Josep Smith ekar riiti naan kein im kāālet n̄an jar kōn kajjitōk ko an. Tokālik Josep Smith ekar ba, “Iaar lo kam̧ool eo an Jemes bwe ekar m̧ool.” Anij ekar uwaake kajjitōk eo an Josep, im E enaaj uwaake ko ad barāinwōt.

Jemes 1:5; Josep Smith—Bwebwenato 1:11–17, 26

Jemes ekar barāinwōt jeje bwe jej aikuj lukkuun in ron̄jake ta eo ro jet rej ba im kajjion̄ jab illu ippāer. N̄e jej illu, jejjab maron̄ jerbal n̄an Anij.

Jemes 1:19–20

Jemes ekar ba bwe ejjab bwe n̄an ron̄jake wōt naaj eo an Anij; jej aikuj barāinwōt mour kake. “A kom̧win ri kōm̧anm̧an naan eo, im jab ri ron̄jake wōt”

Jemes 1:22

Erom juon rikaļoor an Jisōs Kraist eļapļo̧k jān baj tōmak ilo Anij, Jemes ekar kōmeļeļeik. Jekdo̧o̧n tepiļ ejeļā bwe Anij ej m̧ool in. N̄e jej lo armej ro me rej pio ak kwōle, jej aikuj leļo̧k n̄an er nuknuk im m̧ōn̄ā. Jej aikuj loļo̧k kōrā ro emej peleer im riatajinemjen ro. “Tōmak ke ejjeḷọk jerbal ejjeḷọk tokjān.” Jemes ekar je.

Jemes 1:27; 2:14–20

Jemes ekar barāinwōt kōņaan katakin Armej ro Rekwojarjar n̄an kōnono jouj n̄an armej. Ekar ba bwe jojo kōjparok ilo naan ko ej āinwōt n̄e jej tōl juon kidia. Jemaron̄ tōl juon kidia eļap kōn juon bidle (to eo botin kidia), eo ej eddepļo̧k n̄an juon m̧ōttan metal edik ilo lon̄in kidia eo. Naan ko ad remaron̄ barāinwōt juon men me edik, bōtaab remaron̄ in kajoor.

Jemes 3:2–3

Jemes ekar ba bwe bōk eddo in naan ko ad ej āinwōt kōjbwbweik juon wa. Jekdo̧o̧n eļan̄n̄e wa eo ekilep im kōto ko rekajoor, jemaron̄ tōl wa eo im kōjbwebweik kōn juon jebwe jidikdik. Jebwe ej āinwōt naan ko ad. Eļan̄n̄e jemaron̄ kōjbwebweik ta eo jej ba, jemaron̄ kōm̧m̧ane juon oktak kileplep!

Jemes 3:4–5

Naan ko rejjab jouj, Jemes ekar kōmeļeļeik, emaron̄ āinwōt juon urur edik me ej jino juon kijeek eļap. Remaron̄ m̧ōkaj aer ajeeded im kōm̧m̧an eļap metak. En̄in etke ej aorōk n̄an mejmejkaruo kōn naan ko ad.

Jemes 3:5–6

Jemes ekar je bwe jej kōjerbal lo̧n̄iid n̄an jar n̄an Jemadwōj Ilan̄. Bōtaab jet iien jej barāinwōt kōjerbal lo̧n̄iid n̄an ba men ko relej n̄an ro jet, ro rej nejin Jemādwōj Ilan̄. Jemes ekar ba ejjab aikuj in jekjek eo in.

Jemes 3:9–10

N̄an katakin Armej ro Rekwojarjar n̄an kōnono naan ko rejouj, Jemes ekar katakin bwe juon ujen dān ejjab maron̄ letok jim̧or dān kāāl im dān meo̧. Juon fig wōjke ejjab maron̄ eddōk in olive ko, im juon grapevine ejjab maron̄ eddōk im fig ko. Ilo ejja wāween in wōt, eļan̄n̄e ewōr ippād em̧m̧an im iakwe ilo būruōd, naan ko ad rej aikuj in em̧m̧an im iakwe barāinwōt!

Jemes 3:11–18