Kadkad In
Kōn Kallim̧ur Ekāāl
Bwebwenato in Jisōs Kraist im Rikaļo̧o̧r ro An
Ewōr ruo m̧ōttan Baibōļ eo: Kallim̧ur M̧okta im Kallim̧ur Ekāāl. Kallim̧ur M̧okta ewōr ie jeje ko jān rikanaan ro etto. Jet iaan rikanaan ro rekar jeje bwe Anij eaar kallim̧ur n̄an jilkintok juon Rilo̧mo̧o̧r. E enaaj nejin Anij im enaaj lo̧mo̧o̧ren kōj jān jerawiwi im mej bwe jen maron̄ bar mour ippān Anij.
Aiseia 53:3-5; Jekab 7:11; Moses 4
Kallim̧ur Ekāāl ej kwaļok kōn wāween an kallim̧ur eo kūrm̧ool. Ej kwaļok kōn ļōtak eo an Jisōs Kraist, eo Nejin Anij.
Luk 2:4–7
Kallim̧ur Ekāāl ej barāinwōt kwaļok kōn mour eo an Jisōs. E eaar mour ibwiljin riJu ro im katakin kōj wāween mour bwe jen maron̄ bar jepļaakļok n̄an ippān Jemedwōj Ilan̄ juon iien.
Matu 5:1–12
Jisōs eaar kōjeraam̧m̧an im jebal n̄an armej ro. E eaar kōm̧m̧ane elōn̄ menin bwilōn̄ ko n̄an er, āinwōt kemour ro renan̄inmej im kajerkak ro remej n̄an mour.
Matu 4:23
Jisōs eaar kāālet jon̄oulruo iaan rikaļo̧o̧r ro an bwe ren An Rijilōk. E eaar barāinwōt leļo̧k n̄an er mālim n̄an tōl Kabun̄ eo An.
Luk 9:1–2
Kōnke E ej iakwe kōj, Jisōs eaar bōk Ioon aolep metak, būrom̧ōj, im jerawiwi ko ad. E eaar mej kōn kōj. Innām, jilu raan tok ālik, E eaar anjo̧ jān mej im jerkakpeje! Jisōs Kraist ej mour im kōn E, jemaron̄ ukweļo̧k jān jerawiwi ko ad im bar mour ālikin mej.
Armej ro rejeļā im rekar iakwe Jisōs raar jeiki men kein. Rijilōk ro An raar jeje leta n̄an jipan̄ membōr ro ilo Kabun̄ in kōkajoorļok tōmak ko aer ilo Jisōs Kraist. Men ko raar jeiki kar kōjparoki ium̧win elōn̄ im lōn̄, iiō ko. Kiiō kwomaron̄ riiti ilo Kallim̧ur Ekāāl im ekkatak wāween ļoore Jisōs Kraist.
Luk 1:1-4