Kejota eo Āliktata

Jisōs im Rijilōk ro An raar pād ilo Jerusalem n̄an keememe Kejota in Kijone eo. Armej in riJu ro rej keememe Kejota in Kijone eo kajjojo iiō. Eļan̄n̄e ej kakeememej er bwe, elōn̄ iiō remootļo̧k, baam̧le ko aer raar rikōm̧akoko ilo Ijipt, im Anij ekar jipan̄ er ko.

Exodus 12:27

Ke rej pād ilo Jerusalem, Jisōs im Rijilōk ro An raar kōm̧m̧ane juon kejota ippān doon. Jisōs eaar reim̧aanļo̧k n̄an kejota ippāer.

Luk 22:7–15

Ālkin an m̧ōj aer m̧ōn̄ā, Jisōs eaar ten̄i juon bo̧o̧ļ in dān. Eaar jino kwaļ neen Rijilōk ro An.

Jon 13:4–5

Ke ej iien eo an Piter, eaar kajjitōk etke Jisōs ej kōm̧m̧ane menin. Kwaļkwōļ ne ej juon me ekkā wōt an rijerbal kōm̧m̧ane.

Jon 13:6

Jisōs ekar ba Ej kwaļ neer n̄an kwaļo̧k juon waanjon̄ak n̄an er. E eaar kōņaan bwe ren jerbal im iakwe doon āinwōt An kar iakwe er. Eļan̄n̄e rej kōm̧m̧an āindein, armej renaaj jeļā bwe raar An rijilōk.

Jon 13:14–16, 34–35

Jisōs ekar ba n̄ān rijilōk ro An bwe E enaaj mej. Piter eaar ba enaaj m̧ōņōņō in mej kōn Jisōs.

Jon 13:36–38

Ak Jisōs ekar jeļā bwe iien ko reppen rej itok. E eaar ba n̄an Piter m̧okta jen an kako ikkūr jibbon̄on eo juon, Piter enaaj ba jilu alen ke ejaje kajjien Jisōs.

Jon 13:38

Jisōs ekar jeļā bwe Rijilōk ro An remaron̄ inepata im mijak. Eaar kallim̧ur bwe Anij enaaj jilkintok Jetōb Kwojarjar. Jetōb Kwojarjar enaaj kaenōm̧m̧an er, katakin er, im jipan̄ er keememej ta eo Jisōs ekar katakin er. Eaar jiron̄ er n̄an jab inepata im mijak. Eaar ba, “Eļan̄n̄e kom̧wij yokwe eō, kom̧ naaj kōjparok kien ko aō."

Jon 14:1, 15–16, 26–27

Innām Jisōs eaar kōm̧m̧ane juon men eo ejenoļo̧k n̄an jipan̄ Rijilōk ro An n̄an keememej E iien otemjej. E ekar leļo̧k n̄an er kwojkwoj eo. M̧oktata, Eaar kōjeraam̧m̧an pilawā eo, ruje n̄an m̧ōttan ko reddik, im leļo̧k n̄an Rijilōk ro An. Jisōs eaar ba n̄an er n̄an ļōmņak kōn Ānbwinnin n̄e rej m̧ōn̄ā pilawā eo. Eaar kajjitōk ippāer n̄an keememej bwe E enaaj mej kōn er.

Matu 26:26; Luk 22:19

Innām Jisōs ekar lutōke wine eo n̄an juon kab. Eaar kōjeraam̧man wine eo im ba n̄an Rijilōk ro n̄an idaak. Jisōs eaar ba n̄an er n̄an ļōmņak kōn Bōtōktōkin n̄e rej idaake wine eo. Eaar kajjitōk ippāer n̄an keememej bwe E enaaj en̄taan, bōtōktōk, im mej kōn metak im jerawiwi ko an aolep armej bwe jen maron̄ ukweļo̧k im bōk jeo̧rļo̧k bōd.

Matu 26:27–28; Luk 22:20

Innām Jisōs eaar kōmeļeļeiki bwe E ej āinwōt juon vain, im Rijilōk ro An rej āinwōt ra ko. N̄e juon ra ej ekkeijeļ wōt ippān vain eo, enaaj kalle leen. A ra eo me ejjab ekkijeļ wōt ippān vain eo emej im eban kalle leen. Jisōs ekar kōņaan bwe Rijilōk ro An ren aolep iien epaake wōt E n̄an iakwe doon im kōjparok kien ko An.

Jon 15:4–12

Ālkin kwaļo̧ki men kein, JIsōs im Rijilōk ro An raar al juon al. Raar etetal ļo̧k n̄an jikin kallib Getsemane.

Matu 26:30