Jon 8:1–11
Armej ro Rekōņaan Kaje jupn Kōrā eo Me ekar Jerawiwi
“Ilo̧k, im jab bar jero̧wiwi”
Juon jibbon̄ tata, Jisōs Kraist ekar etal n̄an tampeļ eo ilo Jerusalem. Elōn̄ armej raar kukļo̧k Iturin n̄an ron̄jake An katakin.
Jon 8:1–2
Ke Jisōs ekar katakin, jet ritōl an Riju ro rej bōktok juon kōrā n̄an Jisōs. Liin kar jibwe an rupe juon iaan kien ko an Anij. Ekkar n̄an kien eo, kōrā eo ekar aikuj in kameje ilo an armej ro kadļo̧k liin kōn dekā.
Jon 8:3–5
Em̧m̧aan ro raar kajjitōk ippān Jisōs ta eo ej aikuj waļo̧k n̄an liin. Raar kajjion̄ in aujiidik Jisōs. Raar jeļā bwe E eban kar kōņaan bwe kōrā eo en kakkure. Bōtaab eļan̄n̄e Jisōs ekar ba kōrā eo ejjab aikuj in kaje, innām remaron̄ ba bwe E ekar jab pokake kien eo.
Jon 8:6
Bōtaab Jisōs ekar jab uwaake er. E ej m̧al laļļo̧k ioon laļ im kar je ilo bwidej eo. Em̧m̧aan ro raar kajjitōk Ippān bar juon alen ta eo rej aikuj kōm̧m̧ane.
Jon 8:6–7
Āliktata, Jisōs ekar jutak im kar lale em̧m̧aan ro. E ekar ba bwe eļan̄n̄e jabdewōt iaer ekar jan̄in jerawiwi, bwe en eo m̧oktata n̄an kad liin kōn juon dekā.
Jon 8:7
Innām Jisōs ekar bar m̧al laļļo̧k im wōnm̧aanļo̧k wōt in kar jeje ilo bwidej. Aolep em̧m̧aan ro raar jeļā bwe raar bar jerawiwi. Juon illo̧k juon, raar ilo̧k.
Jon 8:8–9
Jisōs ekar reito reitak im kar lo kōrā eo wōt ej jutak ijo. E ekar kajjitōk ippān liin ewi aolep armej ro me raar kōņaan kaje liin raar jako. Liin ekar jiron̄ E raar aolep ilo̧k. Jisōs ekar ba n̄an kōrā eo, “Ilo̧k, jab bar jero̧wiwi.” Jān iien m̧aanļo̧k, kōrā eo ekar tōmak ilo Jisōs.
Jon 8:9–11; Josep Smith Ukook, Jon 8:11; ilo Jon 8:11, footnote c.