Jisōs Ej Leļo̧k N̄an Rijilōk Ro An Priesthood Ki Ko

Juon raan, Jisōs ekar kajjitōk ippān rikaļoor ro An wōn kar E ilo an armej ro ļōmņak. Rikaļoor ro An raar uwaak bwe jet armej raar ba E ekar Jon ri Peptaij. Ro jet raar ļōmņak E ekar juon rikanaan jān Kallim̧ur M̧okta eo ekar bar ro̧o̧ltok.

Matu 16:13–14

Innām Jisōs ekar kajjitōk ippān rikaļoor ro An wōn E ilo aer kar ļōmņak. Pita eaar uwaak, “Kwe Ri Kraist, Nejin Anij e mour.”

Matu 16:15–16

Jisōs ekar m̧ōņōņō in ron̄ an Piter ba menin. E ekar jiron̄ Piter bwe ekar jab katak wōn kar Jisōs jān armej ro jet. Jemādwōj Ilan̄ ekar kwaļo̧ke n̄an e.

Matu 16:17

Jisōs ekar jiron̄ Piter, “Ioon ejm̧aan in Inaaj kalōk Aō eklejia.” Innām E ekar kallim̧ur n̄an leļo̧k n̄an Piter priesthood ki ko, ak mālim eo jān Anij, bwe e im Rijilōk ro jet ren maron̄ tōl Kabun̄ eo An ioon laļ in.

Matu 16:18–19

Jejjo raan ko tokālik, Jisōs ekar bōk Piter, Jemes, im Jon lōn̄ļo̧k n̄an juon toļ eutiej n̄an jar.

Matu 17:1; Luk 9:28

Ke Jisōs ekar jar, turin Mejān ekar ebbōl āinwōt aļ. Em̧ool nuknuk eo An ekar āinwōt meram.

Matu 17:2; Luk 9:29

Ruo rikanaan ro jān Kallim̧ur M̧okta, Moses im Ilaija, raar waļo̧ktok. Raar kōnono ippān Jisōs kōn mej eo An im Jerkakpeje eo, eo enaaj kar waļo̧k ejjab etto ilo Jerusalem. Piter ekar ba n̄an Jisōs, “Irooj, em̧m̧an ad pād ijin.”

Matu 17:3–4; Luk 9:30–33 (lale Josep Smith Ukok ilo footnote 31a)

Ke Piter ekar ekōnono, juon kōdo̧ emeram ekar jepooļ er. Raar ron̄ ainikien Anij ba, “E in Nejū jitōnbōro Ippa, I bun̄būruō kake; kom̧win eo̧ron̄ E.” Piter, Jemes, im Jon raar lōļn̄o̧n̄ im oļo̧k ioon bwidej.

Matu 17:5–6

Jisōs ekar un̄ur Rijilōk ro An im kar ba, “Kom̧win jerkak, im jab lōļn̄o̧n̄.” Raar reilōn̄ļo̧k. Moses im Ilaija raar jako. Ioon toļ in, Piter, Jemes, im Jon raar bōk priesthood ki ko me Jisōs ekar kallim̧uri er.

Matu 17:7–9; lale bar Katak im Bujen Ko 27:12–13