Jerbal 1–4
Rijilōk ro an Jisōs rej Tōl Kabun̄ eo An
Katakin, peptaij, kemour, im jeer aolep men
Ālikin an Jisōs jepļaak n̄an ippān Jemen Ilan̄, Rijilōk ro rekar ritōl n̄an Kabun̄ eo An. Rekar katakin kōn gospel eo an Rilo̧mo̧o̧r, karuwaineneik elōn̄ armej n̄an Kabun̄ eo An, im kōm̧m̧an elōn̄ menin bwilōn̄ kōn kajoor eo an Anij. Jisōs ekar kallim̧ur n̄an jipan̄ er ilo an jikinļok Jetōb Kwojarjar.
Jerbal 1:8-13; 2:41-47
Kōnke Judas ekar mej, ekar wōr wōt jon̄oul juon Rijilōk. Rijilōk ro rekar jar n̄an jeļā wōn Anij ekōņaan bwe en pinej jenkwan Judas im erom̧ juon rikam̧ool an Jisōs Kraist ejenolok. Anij eaar kālet juon em̧m̧aan etan Mattaias. E ekar erom̧ juon iaan Doulul eo an Jon̄oulruo Rijilōk ro.
Jerbal 1:15–26
Ilo juon raan aorōk an Ri Ju ro, Rikaļoor ro rekar ippān doon ilo Jerusalem. Innem, āinwōt n̄e juon kōto̧ jān lan̄ eaar deļon̄e m̧weo. Rekar lo meram āinwōt kijeek ej pād ioer, im rekar obrak kōn Jetōb Kwojarjar. Kōn Jetōb Kwojarjar, rekar maron̄ kenono ilo kajin ko jet.
Jerbal 2:1-4
Ke armej in Jerusalem rej ron̄ kōn menin, juon kumi eļap eaarvain doon. Jekdoon n̄e armej ro ilo jarlepju eo raar itok jān elōn̄ laļ ko im ekar oktak kajin ko aer, kajojo iaer rekar ron̄ an Rijilōk ro kenono ilo kajin ko aer make. Armej ro rekar bwilōn̄!
Jerbal 2:5-13
Pita ej jutak im kenono n̄an jarlepju eo. E ekar ba n̄an er kōn Jisōs Kraist. E ekar kwaļok an naan in kam̧ool ke Jisōs ej Rilo̧mo̧o̧r eo im em̧ōj an jerkakpeje.
Jerbal 2:14-36
Ke armej rej ron̄ menin, rekar en̄jaake ke rej aikuj in oktak. Rekar kajjitōk ippān Rijilōk ro ta eo rej aikuj kōm̧m̧ane.
Jerbal 2:37
Piter ekar ba, “Kom̧ otemjej kom̧win ukeļo̧k ippemi, im peptaij ilo etan Jisōs Kraist kōn An juļo̧k jero̧wiwi ko ami, im kom̧ naaj bōk men in letok eo, Jetōb Kwōjarjar. Tarrin 3,000 armej raar peptaij im kobatok ilo Kabun̄ in raan eo.
Jerbal 2:38-43
Ejjab too, Pita im Jon raar etal n̄an tampeļ eo. Rekar lo juon em̧m̧aan ejjab maron̄ etetal. Aolep raan ej jijōt ijin, kajjitōk jāān ippān armej.
Jerbal 3:1–2
Em̧m̧aan eo ej kajjitōk jāān ippān Pita im Jon. Rekar bōjrak im reilo̧k n̄an e. Pita eaar ba, “Kwōn lale kōmro.”
Jerbal 3:3-4
Pita ekar ba ejjeļok ippāer silver ak gold. Ako ewōr ippāer juon men em̧m̧anļok. “Ilo etan Jisōs, ri Nazeret,” eaar ba, “kwōn jutak im etal.” Pita eaar jipan̄ kajutake. Kein kajuon ilo mour eo an, em̧m̧aan in ej kab maron̄ etetal! Jon̄an an lukkun m̧ōnōnō eaar ekāke im etetal ļok n̄an tampeļ eo ippān Pita im Jon.
Jerbal 3:6–8
Armej ro rekar bwilōn̄. Pita ekar jiron̄ļok er ke ejjab an kab Jon kajoor eo eaar kemour em̧m̧aan eo. Ļein eaar mour jān kajoor eo an Jisōs Kraist im an tōmak ilo E. Pita eaar jiron̄ er bwe ren ukweļok im tōmak ilo Jisōs.
Jerbal 3:9-26
Jet iaan ritōl ro an Ri ju ro rekar jab em̧m̧an ippāer ta ko Pita im Jon rekar katakin kaki. Rej ba ejjeļok juon en kwaļok kōn Jisōs.
Jerbal 4:1-18
Pita im Jon rekar ba renaaj pokake Anij, im Anij ekōņaan bwe ren ba n̄an armej ta ko rejļā kōn Jisōs Kraist.
Jerbal 4:19–20
Rijilōk ro rej wōnm̧aanļok wōt im katakin kōn gospel eo an Rilo̧mo̧o̧r kōn eļap kajoor. Eaar lōn̄ļok armej rekar kobatok ilo Kabun eo An. Rekar obrak kōn Jetōb. Rekar iakwe doon im jeer aolep men. Rekar wia kake men ko ewōr ippāer im leļok jāān n̄an Rijilōk ro bwe ren leļok n̄an ro rejeram̧ōl.
Jerbal 4:31-37