Bwebwenato ko an Jeje ko Rekwojarjar
Jisōs ej Kwaļok ioon juon Toļ—Jipan̄ kōj erom āinwōt Jemedwōj Ilan̄

Matu 5–7

Kraist ej kwaļo̧k Naan ioon Toļ eo

Jipan̄ kōj erom āinwōt Jemedwōj Ilan̄

Jisōs ej katakin turin Lom̧aļo̧ in Galili.

Jisōs im Rikaļoor ro An raar etal n̄an juon toļ iturin Lom̧alo in Galili. Ijin Jisōs eaar katakin er ewi wāween ad maron̄ m̧ōņōņō im erom āinwōt Jemedwōj Ilan̄.

Matu 5:1–2

Jisōs ej katakin ewi wāween ad kōm̧m̧an aeņōm̧m̧an n̄an ro jet.

Jisōs eaar katakin bwe armej rej jeraam̧m̧an im m̧ōņōņō n̄e rej kōttāik er, im n̄e ej em̧m̧an būruōer, im rej kajjieon̄ kōm̧m̧ane ta eo ejim̧we. Ro rej joļo̧k an ro jet bōd naaj barāinwōt joļo̧k aer bōd. Jisōs ekar kwaļo̧k bwe ro rej kōm̧m̧an aenōm̧m̧an naaj ņa etaer ro nejin Anij.

Matu 5:3-9

Jej aikuj āinwōt juon meram n̄an laļ.

Jisōs eaar ba bwe rikaļo̧o̧r ro An rej meram n̄an laļ—āinwōt juon jikin ioon toļ bwe aolep ren loe. Jejjab aikuj in ņooje meram ko ad.

Matu 5:14

Jerbal ko ad rem̧m̧an rej āinwōt meram n̄an ro jet.

N̄e jej ļoore Jisōs, jej āinwōt juon kāāntōļ ej leļok meram n̄an aolep iloan ruum̧ eo. Jerbal ko ad rem̧m̧an remaron̄ jipan̄ armej tōmak ilo Jemedwōj Ilan̄.

Matu 5:15–16

Jisōs ej katakin bwe jej aikuj iakwe aolep.

Jisōs eaar ba bwe jej aikuj iakwe aolep—ekoba ro rejjab iakwe kōj. Jej aikuj jar kōn er. Jisōs eaar katakin bwe jej aikuj kajjion̄ āinwōt Jemedwōj Ilan̄. E eaar katakin bwe n̄e jej jipan̄ ro jet, jejjab aikuj ba n̄an ro ipeļaakid. Anij ej loe men ko rem̧m̧an jej kōm̧m̧ani, im E enaaj kōjeraam̧m̧an kōj.

Matu 5:38-48; Matu 6:1-4

Jej aikuj in jar kōn būruwōd.

N̄e jej jar, jejjab aikuj ineptata kōn ta ko ro jet rej ļōmņak kōn kōj. Jejjab aikuj ālijji naan aolep iien n̄e rejjab itok jān būruōd. Jej aikuj kenono jān būruōd. Jemedwōj Ilan̄ ej ron̄ jar ko ad im ejeļā aikuj ko ad. Jekdo̧o̧n n̄e ejjeļo̧k en ej ron̄jake kōj, E enaaj.

Matu 6:5-–8

Jej aikuj kōm̧m̧an n̄an ro jet āinwōt ad kōņaan bwe ren kōm̧m̧an n̄an kōj.

Jisōs eaar katakin bwe jejjab aikuj ļōm̧nak bwe jem̧m̧an ļo̧k jān armej ro jet. Jej aikuj keememej bwe kōj wōj jej ioon men ko reppen. Ijellokin ad ekajete ro jet, jej aikuj ļōm̧nak kōn wāween ad emm̧anļo̧k. Jej aikuj kōm̧m̧an em̧m̧an n̄an ro jet ilo wāween eo jej kōņaan bwe ren kōm̧m̧ane n̄an kōj.

Matu 7:1-5, 12

Jisōs ej katakin kōn m̧weo eaar ekkal ioon bar.

Innām Jisōs ej bwebwenato kōn ļeo ejajeļo̧kjeņ ej kalōk m̧weo im̧ōn ioon bok ak ļeo ejeļāļo̧kjeņ eaar kalōk m̧weo im̧ōn ioon bar. N̄e ebuñ wōt, m̧weo ej ekkal ioon bok ej wōtļo̧k, ak m̧weo ioon bar ej jutak wōt. Jisōs ej ba bwe n̄e jej ron̄jake katak ko an im ļoori, jej āinwōt lein ejeļāļo̧kjeņ.

Matu 7:24-28