Ilo Kraist Ro Otemjej Renaaj Mour

Jet membōr in Kabun̄ eo ilo juon jikin kweilo̧k kar ņa etan Korint ekar wōr aer kajjitōk ko kōn ta eo ej waļo̧k ālkin aer mej. Raar jab kanooj jeļā bwe Jisōs ekar lukkuun in jerkakpeje. Jet armej raar ba bwe ekar ejjeļo̧k jerkakpeje. Paul ekar ron̄ kake menin im kar je juon leta n̄an Armej ro Rekwojarjar ilo Korint.

1 Korint 15:12–14

Paul ekar jeje bwe Jerkakpeje eo an Jisōs Kraist ekar juon m̧ōttan aorōk an gospel eo An. “Kraist ear mej kōn jero̧wiwi ko ad,” Paul ekar ba, im “Ear jerkakpeje ilo raan eo kein ka jilu.” Elōn̄ļo̧k jān 500 armej ro raar lo E ālkin Jerkakpeje eo An, ekoba Paul im Rijilōk ro jet.

1 Korint 15:1–8

Paul ekar katakin bwe eļan̄n̄e Kraist ekar jab jerkakpeje, jenaaj kar aolep būrom̧ōj im ejjeļo̧k kōjatdikdik. Kōnke kōn Wōtlo̧k eo an Adam, aolepād wōj naaj mej, ak kōn Jisōs Kraist, jenaaj aolep jerkakpeje barāinwōt!

1 Korint 15:17–22

Paul ekar kakeememej Armej ro Rekwojarjar ilo Korint bwe armej ro raar peptaij kōn ro remej. Etke jej aikuj in kōm̧m̧ane menin eļan̄n̄e armej ro me raar mej rejjamin naaj bar jerkak? Jej peptaij kōn ro remej kōnke jeleļā bwe aolep renaaj bar mour. Menin ej leļo̧k n̄an er iien n̄an bōk kōjeraam̧m̧an ko an Irooj.

1 Korint 15:29

Jet Armej ro Rekwojarjar ilo Korint raar ļōmņak ta eo ānbwin ko ad renaj āinwōt n̄e jej jerkakpeje. Paul ekar ba ānbwin ko ad renaaj aiboojoj. Reban m̧ōjņo̧ ak nan̄nmej ak rūttoļo̧k. Jet armej renaaj bōk ānbwinnin ko an selsetial, meram āinwōt aļ. Ro jet renaaj meram āinwōt allōn̄, im ro jet reaan meram āinwōt iju ko.

1 Korint 15:35, 40–43; Katak im Bujen Ko 76:96–98; 88:20–23