Hepelū 1–6

Fakakaukau ke fakaʻaliʻali ha fakatātā ʻo ha meʻa ne hoko ʻi he moʻui ʻa e Fakamoʻuí, hangē ko ia ʻi he kamataʻanga ʻo e lēsoni ko ʻení. Fakaafeʻi e kau akó ke nau toe vakaiʻi nounou ʻa e meʻa ne fakaʻaliʻalí. Fehuʻi ange leva:

• Ko e hā te tau lava ʻo ako fekauʻaki mo e ngaahi ʻulungaanga ʻo Sīsū Kalaisí mei he meʻa ko ʻeni naʻe hokó?

• ʻE fakamālohia fēfē ʻetau tui ki he Fakamoʻuí, ʻi he ako lahi ange fekauʻaki mo e ngaahi fatongia, huafa, mo e ʻulungaanga ʻo Sīsū Kalaisí?

Fakamatalaʻi ange naʻe fakamatalaʻi ʻe Paula ʻi heʻene tohi ki he kakai Hepeluú ha ngaahi huafa mo e fatongia lahi ʻo e Fakamoʻuí. Fakakaukau ke fakaafeʻi e kau akó ke faʻu ha lisi ʻo e ngaahi fatongia, huafa, mo e ʻulungaanga ʻo e Fakamoʻuí ʻoku nau ʻiloʻi ʻi he ʻekitivitī ako ko ʻení. Fakaafeʻi e kau akó ke tokanga ki he meʻa ʻoku akoʻi ange ʻe he Laumālie Māʻoniʻoní fekauʻaki mo Sīsū Kalaisi ʻi heʻenau akó.

Ke tokoni ki he kau akó ʻi heʻenau akó, te ke lava ʻo fakaʻaliʻali ʻa e ngaahi fakahinohino ko ʻení:

1. Ako ha niʻihi ʻo e ngaahi veesi ko ʻení, ʻo kumi ʻa e ngaahi huafa, fatongia, mo e ʻulungaanga ʻo Sīsū Kalaisí: Hepelū 1:1–6, 9–12; 2:7–10, 17–18; 3:1–2; 5:8–10.

2. Kumi ha ngaahi founga te ke lava ai ʻo fakakakato ʻa e kupuʻi lea ko ʻení: “Te u lava ʻo maʻu e tui kia Sīsū Kalaisi koeʻuhí …” (Hangē ko ʻení, Te u lava ʻo maʻu e tui kia Sīsū Kalaisi koeʻuhí ʻokú Ne poupouʻi e meʻa kotoa pē ʻi he mālohi ʻo ʻEne folofolá [vakai, Hepelū 1:3].)

3. Fili ha fatongia, huafa pe ʻulungaanga ʻe taha pe ua ʻo e Fakamoʻuí ke ako lahi ange ki ai. Fakaʻaongaʻi ʻa e ngaahi futinoutí, Fakahinohino ki he Ngaahi Folofolá, pe fekumi ʻi he Gospel Library ke kumi e ngaahi potufolofola, akonaki ʻa e kau taki ʻo e Siasí, mo ha fakamatala kehe ʻoku ʻaongá.

Fakaafeʻi e kau akó ke vahevahe e meʻa naʻa nau ako fekauʻaki mo e Fakamoʻuí mo ha hoa pe kulupu toko siʻi. Te ke lava foki ʻo fakaafeʻi kinautolu ke aleaʻi e ngaahi fehuʻi ko ʻení:

• ʻE fakamālohia fēfē hoʻo tui kia Sīsū Kalaisí ʻi he mahino ʻa e fatongia, huafa, pe ʻulungaanga ko ʻení?

• Ko e hā ʻoku fokotuʻu atu ʻe he hingoa, fatongia, pe ʻulungaanga ko ʻení fekauʻaki mo e founga ʻe lava ke tokoniʻi ai koe ʻe he Fakamoʻuí?

Fakaʻosi ʻa e ʻekitivitī akó ʻaki hono vahevahe hoʻo fakamoʻoni kia Sīsū Kalaisí. Te ke lava foki ʻo fakaafeʻi ha kau ako toko siʻi ke vahevahe ʻenau fakamoʻoní. Poupouʻi e kau akó ke hokohoko atu ʻenau fekumi lolotonga ʻenau ako fakatāutahá ki he meʻa ʻoku akoʻi ʻe he folofolá fekauʻaki mo e Fakamoʻuí.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke kamata ʻa e ʻekitivitī ako ko ʻení ʻaki hono aleaʻi fakataha mo e kalasí e ongo fehuʻi ko ʻení.

• Ko e hā ha niʻihi ʻo e ngaahi faingataʻa angamaheni taha ʻoku fehangahangai mo e kakai lalahi kei talavoú? (Te ke lava ʻo hiki e tali ʻa e kau akó ʻi he palakipoé.)

• ʻOku tafoki ki fē ʻa e kakaí ʻi heʻenau feinga ke fehangahangai mo e ngaahi faingataʻa ko ʻení?

Fakaafeʻi ha tokotaha ako ke ne lau e fakamatala ko ʻeni ʻa Palesiteni Lāsolo M. Nalesoní:

Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia! (“Ko Sīsū Kalaisi Maʻu Pē ʻa e Talí,” Liahona, Mē 2023, 127–28)

• ʻOkú ke pehē ko e hā ʻe lava ai ʻo maʻu maʻu pē ʻa e tali ki hotau faingataʻaʻiá pe ngaahi fehuʻí ʻi he moʻui mo e ngaahi akonaki ʻa Sīsū Kalaisí?

Fakaafeʻi e kau akó ke fakakaukau pe ko e hā e tuʻo lahi ʻenau tafoki ki he Fakamoʻuí ʻi heʻenau fehangahangai mo e ngaahi faingataʻá pe fehuʻí. Poupouʻi kinautolu ʻi heʻenau akó ke tokanga ki he ngaahi ueʻi fakalaumālie ʻe lava ʻo tokoni ke nau maʻu ha tui lahi ange kia Sīsū Kalaisí.

Fakaafeʻi e kau akó ke ako e Hepelū 2:7–18; 4:14–16, ʻo kumi e ngaahi akonaki fekauʻaki mo e Fakamoʻuí ʻe lava ʻo fakalahi ai ʻetau holi ke tafoki kiate Iá. (Ke tokoni ke mahino lelei ange ki he kau akó ʻa e puipuituʻa ʻoku felāveʻi mo e ngaahi akonaki ko ʻení, fakakaukau ke fakaafeʻi foki kinautolu ke lau ʻa e “Hepelū 1:4–2:10. Ko e hā naʻe fakafehoanaki ai ʻa Sīsū Kalaisi ki he kau ʻāngeló?” ʻi he Ngaahi Tokoni Fakafolofolá: Fuakava Foʻoú.)

Fakakaukau ke fakaʻaliʻali ange ʻa e ngaahi fehuʻi ko ʻení. Fakaafeʻi e kau akó ke aleaʻi ia mo ha hoa pe ʻi ha kulupu toko siʻi.

• Ko e hā ha ngaahi akonaki mei he ngaahi veesi ko ʻení naʻá ke maʻu ʻoku mahuʻingamālie tahá? Ko e hā hono ʻuhingá?

• ʻE tokoni fēfē ʻe he mahino ki he ngaahi akonaki ko ʻení ʻetau loto-holi ke tafoki kia Sīsū Kalaisi ʻi heʻetau fepaki mo e ngaahi faingataʻá?

ʻI he ʻosi e fealeaʻaki ʻa e kau akó, fakaafeʻi ha niʻihi ke vahevahe ʻenau fakakaukaú mo e kalasí. Kapau ʻoku ʻikai fakamatala e kau akó ki he ngaahi akonaki mei he Hepelū 2:18, fakakaukau ke taki ʻenau tokangá ki he veesi ko iá pea fakahoko e fehuʻi ko ʻení:

• ʻOkú ke pehē ʻoku ʻuhinga ki he hā ʻa e “ʻoku faʻa fai [ʻe Sīsū Kalaisi] ke tokoniʻi ʻa kinautolu ʻoku ʻahiʻahiʻí”? (Kapau ʻe tokoni, lau fakataha ʻa e “Hepelū 2:18. ʻOku lava fēfē ʻa Sīsū Kalaisi ʻo tokoniʻi kitautolu ʻi hono ʻahiʻahiʻi kitautolú” ʻi he Ngaahi Tokoni Fakafolofolá: Fuakava Foʻoú.)

Fakaafeʻi e kau akó ke vahevahe ha foʻi moʻoni ʻoku nau ako fekauʻaki mo Sīsū Kalaisi mei he veesi 18. Te nau lava ʻo vahevahe ha meʻa hangē ko ʻení: Koeʻuhí naʻe mamahi ʻa Sīsū Kalaisi pea ʻahiʻahiʻi ʻi he meʻa kotoa pē, te Ne lava ʻo tokoniʻi kitautolu ʻi he ngaahi taimi ʻo e faingataʻá. (Naʻe toe akoʻi foki ʻe he palōfita ko ʻAlamaá ʻi he Tohi ʻa Molomoná e foʻi moʻoni ko ʻení. Te ke lava ʻo fakaafeʻi e kau akó ke lau ʻa e ʻAlamā 7:11–12 pea kapau ʻoku fakaʻaongaʻi e folofola fakaʻilekitulōniká, fakafehokotaki ia ki he Hepelū 2:18.)

• ʻE tokoni fēfē ʻa e mahino kiate koe ʻa e moʻoni ko ʻení ke ke falala ki he Fakamoʻuí? (Ko ha konga homou fealeaʻaki ʻi he fehuʻi ko ʻení, te ke lava ʻo vahevahe e fakamatala ko ʻeni ʻa ʻEletā ʻŪlise Soālesí.)

ʻOku … ʻomi ʻe he Fakamoʻuí e fakafiemālie mo e nonga ʻi heʻetau fehangahangai mo e mamahí, ʻahiʻahí mo e ngaahi vaivai ʻo e moʻui fakamatelié. … Te u lava ke fakapapauʻi atu ʻoku ʻafioʻi maʻu pē ʻe Kalaisi e ngaahi faingataʻa ʻoku tau aʻusia ʻi he moʻui matelié. ʻOku mahino kiate Ia e koná, mamahí, mo e mamahiʻia fakatuʻasinó kae pehē ki he ngaahi pole fakaeloto mo fakalaumālie ʻoku tau fehangahangai mo iá. ʻOku fonu e loto ʻo e Fakamoʻuí ʻi he ʻaloʻofá, pea ʻokú Ne mateuteu maʻu pē ke tokoniʻi kitautolu. ʻOku malava ʻení koeʻuhí he naʻá Ne aʻusia fakataautaha pea toʻo kiate Ia ʻi he kakanó ʻa e faingataʻa ʻo hotau vaivaí mo e mamahí. (“Sīsū Kalaisi: Ko e Tauhi ʻo Hotau Laumālié,” Liahona, Mē 2021, 83)

Fakaafeʻi e kau akó ke nau fakakaukau mo vahevahe ha ngaahi sīpinga ʻokú ne fakatātaaʻi e malava ʻa e Fakamoʻuí ke tokoniʻi Hono kakaí. ʻE lava pē ʻeni ke hoko ko ha ngaahi sīpinga mei heʻenau moʻuí, moʻui ʻa ha kakai ʻoku nau ʻilo, pe kakai ʻi he folofolá. Kapau ʻoku fiemaʻu tokoni e kau akó ʻi he fakakaukau ki ha ngaahi sīpingá, te nau lava ʻo ako ʻa e Sione 11:21–27, 32–36; Mōsaia 24:11–15; pe Tokāteline mo e Ngaahi Fuakava 122:5–9.

Fakaafeʻi ʻa e kau akó ke fakakaukauloto ki he meʻa naʻa nau ako mo ongoʻi lolotonga e ʻekitivitī ako ko ʻení. Poupouʻi kinautolu ke fakakaukauʻi mo lekooti ʻa e ngaahi ngāue kuo ueʻi kinautolu ʻe he Laumālie Māʻoniʻoní ke fakahokó. Fakamoʻoni ki he ʻofa ʻa e Fakamoʻuí kiate kitautolú mo ʻEne malava ke tokoniʻi kitautolú.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke kamata ʻa e ʻekitivitī ako ko ʻení ʻaki hano aleaʻi ʻa e tūkunga ko ʻení:

Kuo hoko ʻa Selemaia ko ha mēmipa ʻo e Siasí ʻi ha ngaahi taʻu. Kimuí ni maí, kuó ne fakakaukau ke foki ki heʻene tōʻonga moʻui kimuʻá koeʻuhí ʻokú ne ongoʻi ʻoku fuʻu lahi e meʻa ʻoku fiemaʻu ki ha mēmipa ʻo e Siasí.

• Ko e hā ha ngaahi fakakaukau ʻokú ke maʻu ki he tūkunga ko ʻení?

• Ko e hā ʻe ala faingataʻa ai ki he kakaí ke hoko ko ha kau mēmipa ʻo e Siasi ʻo e Fakamoʻuí?

Fakaafeʻi e kau akó ke fakakaukau pe ʻoku nau ʻiloʻi ha kakai ʻi ha tuʻunga hangē ko ia ne fakamatalaʻi ʻi he tūkungá. Te ke lava foki ʻo fakaafeʻi e kau akó ke fakakaukau ki ha ngaahi tūkunga kehe ʻoku nau fepaki mo ia ʻokú ne fakatupu ke nau ongoʻi mafasia pe ongosia ai. Poupouʻi e kau akó ʻi heʻenau akó ke kumi e ngaahi moʻoni ʻe lava ʻo tokoni kiate kinautolu ʻi he ngaahi tūkunga ko ʻení.

Ke teuteuʻi e kau akó ke nau ako ʻa e Hepelū 3–4, fakamatalaʻi ange lolotonga e kuonga ʻo Paulá, naʻe aʻusia ʻe he kau Kalisitiane Siú ha fakatanga koeʻuhí ko ʻenau tuí. Naʻe fakakaukau ha tokolahi ke nau foki ki heʻenau tōʻonga moʻui kimuʻá ke fakaʻehiʻehi mei ha toe fakatanga. Ko e taha ʻo e ngaahi taumuʻa ʻa Paula ʻi hono hiki e tohi Hepeluú ke tokoniʻi e kakaí ni ke nau tuʻu maʻu ʻi heʻenau tukupā kia Sīsū Kalaisí. (Ke maʻu ha fakamatala lahi ange, vakai “Ko hai naʻe tohi ki ai e tohi Hepeluú pea ko e hā hono ʻuhingá?” ʻi he Ngaahi Tokoni Fakafolofolá: Fuakava Foʻoú.)

Naʻe vahevahe ʻe Paula ʻa e fakamatala kia Mōsese mo e fānau ʻo ʻIsilelí ke tokoni ke mahino ki he kau Kalisitiane Siú ʻa e fakatuʻutāmaki ʻo e foki ki ha tōʻonga moʻui ʻo e angatuʻú mo e taʻetuí. Fakaafeʻi e kau akó ke nau ako ʻa e Hepelū 3:7–19 pea feinga ke ʻiloʻi e pōpoaki ʻa Paulá.

• Ko e hā ha ngaahi akonaki naʻá ke maʻu kuó ne tokoniʻi e Kau Kalisitiane Siu ko ia ne nau fakakaukau ke liʻaki ʻenau tuí?

Fakamahinoʻi ange ko e taha e ngaahi nunuʻa naʻe fehangahangai mo e kakai ʻIsilelí ko e ʻikai ke fakaʻatā ke nau hū ki he fonua ʻo e talaʻofá pe ki he mālōlōʻanga ʻo e ʻEikí (vakai, Hepelū 3:11, 18). Fakaafeʻi e kau akó ke nau lau ʻa e Hepelū 4:11, ʻo kumi e fakaafe ʻa Paula ki he Kāingalotu Siú.

• ʻOkú ke pehē ko e ʻuhinga ki he hā ke hū ki he mālōlōʻanga ʻo e ʻEikí? (Ke tokoni ke mahino lelei ange ki he kau akó ʻa e kupuʻi lea ko ʻení, te ke lava ʻo fakaafeʻi kinautolu ke lau ʻa e “Hepelū 3:7–4:16. ʻOku ʻuhinga ki he hā ke hū ki he mālōlōʻanga ʻo e ʻEikí?” ʻi he Ngaahi Tokoni Fakafolofolá: Fuakava Foʻoú.)

• Ko e hā ʻokú ke ako mei he ngaahi akonaki ʻa Paulá ʻo fekauʻaki mo e founga te tau lava ai ʻo hū ki he mālōlōʻanga ʻa e ʻEikí? (Tokoni ke ʻiloʻi ʻe he kau akó ha moʻoni hangē ko ʻení: Kapau te tau faivelenga ki he Fakamoʻuí pea ʻoua ʻe fakafefeka hotau lotó, te tau hū ki he mālōlōʻanga ʻo e ʻEikí [vakai foki, ʻAlamā 12:34–37].)

• ʻOkú ke pehē ko e hā ʻoku mahuʻinga ai ke tulifua ki he tāpuaki ʻo e mālōlōʻanga ʻo e ʻEikí?

Fakakaukau ke vahevahe e fakamatala ko ʻeni ʻa Palesiteni Lāsolo M. Nalesoní, ko ha konga homou fealeaʻaki ʻi he ngaahi fehuʻi ko ʻení:

Siʻi ngaahi tokoua mo e tuofāfine, ʻoku ou tēngihia kinautolu ʻoku siʻi mavahe mei he Siasí koeʻuhí ko ʻenau ongoʻi ʻoku fuʻu lahi e meʻa ʻoku fiemaʻu meiate kinautolu ʻi heʻenau hoko ko ha mēmipá. Kuo teʻeki ai ke nau ʻiloʻi ʻoku hanga ʻe hono fakahoko mo tauhi e ngaahi fuakavá ʻo ʻai ke faingofua ange ʻa e moʻuí. Ko e tokotaha kotoa pē ʻokú ne fakahoko ha ngaahi fuakava ʻi he vai papitaisó pea ʻi he temipalé—mo tauhi kinautolú—kuo fakalahi ʻene maʻu e mālohi ʻo Sīsū Kalaisí. Kātaki ʻo fakakaukau ki he foʻi moʻoni fakaʻofoʻofa ko iá!

Ko e pale ki he tauhi ʻo e ngaahi fuakava mo e ʻOtuá, ko e mālohi fakalangi—ko e mālohi ʻokú ne fakamālohia kitautolu ke tau matuʻuaki lelei ange hotau ngaahi faingataʻá, ʻahiʻahí, mo e loto-mamahí. ʻOku fakafaingofuaʻi ʻe he mālohí ni ʻetau fonongá. ʻOku maʻu ʻe kinautolu ʻoku moʻui ʻaki e ngaahi fono māʻolunga ange ʻa Sīsū Kalaisí ʻa Hono mālohi māʻolunga angé. Ko ia, ʻoku ʻi ai ʻa e totonu ʻa e kau tauhi fuakavá ki ha faʻahinga fiemālie makehe ʻoku nau maʻu ʻi heʻenau fefuakavaʻaki mo e ʻOtuá. …

… Neongo e ngaahi takihala mo e ngaahi fakahohaʻa ʻoku nau ʻākilotoa kitautolú, ka te ke lava ʻo maʻu ha fiemālie moʻoni—ʻa ia ko ha fakafiemālie mo ha nonga—naʻa mo e lotolotonga ʻo hoʻo ngaahi palopalema fakatuta tahá. (“Ikuʻi ʻa Māmani mo Maʻu ha Fiemālie,” Liahona, Nōvema 2022, 96)

Fakaafeʻi e kau akó ke fakalaulauloto ki he founga kuo nau aʻusia ai e fiemālie ʻa e ʻEikí mo e ngaahi ngāue pau kuo nau fai naʻe tokoni ke nau aʻusia ai e fiemālie ʻa e ʻEikí. Te ke lava ʻo fakaafeʻi ha kau ako toko siʻi ke vahevahe ʻenau ngaahi aʻusiá. Te ke lava ʻo fakakaukau ke vahevahe foki hoʻo aʻusiá.

Poupouʻi e kau akó ke nau fakakaukau ki he meʻa te nau lava ʻo fai ke aʻusia lahi ange ai e fiemālie ʻa e ʻEikí ʻi heʻenau moʻuí. Fakaafeʻi kinautolu ke lekooti e ngaahi ongo fakalaumālie ʻoku nau maʻu mei he Laumālie Māʻoniʻoní. Fakamoʻoni ki he ngaahi moʻoni kuo mou aleaʻi ʻi he ʻaho ní.

Foki ki he “Ngaahi ʻEkitivitī Ako ke Fili Mei Aí.”