1 Kolinitō 8–13

Te ke lava ʻo kamata ʻaki hono vahevahe ʻa e tūkunga ko ʻení:

• Ko e hā ha meʻa ʻe ala tokoni ke mahino lelei ange kia Mālisi e ʻuhinga ke tekeʻi pea ikunaʻi ai e ʻahiʻahí?

Fakamatalaʻi ange naʻe lau ʻa Paula ʻi he 1 Kolinitō 10:1–14, ki ha niʻihi ʻo e ngaahi aʻusia ʻa e kakai ʻIsileli he kuonga muʻá ke akoʻi ki he Kāingalotu Kolinitoó ha ngaahi lēsoni mahuʻinga fekauʻaki mo hono tekeʻi ʻo e ʻahiʻahí. Ke ako lahi ange fekauʻaki mo e puipuituʻa ʻo e ngaahi veesi ko ʻení, ʻe lava e kau akó ʻo lau ʻa e “1 Kolinitō 10:1–11. Ko e hā e meʻa naʻe loto ʻa Paula ke ʻilo ʻe he Kāingalotu Kolinitoó fekauʻaki mo e talanoa ʻo e Fononga Tokolahí?” ʻi he Ngaahi Tokoni Fakafolofolá: Fuakava Foʻoú.

Lau fakataha ʻa e 1 Kolinitō 10:1–4, pea fehuʻi:

• Ko e hā ha meʻa ʻokú ke ako fekauʻaki mo Sīsū Kalaisi mei he ngaahi veesi ko ʻení?

• ʻOku hanga fēfē ʻe he ʻilo ko Sīsū Kalaisi hoʻo “Maka fakalaumālié” ʻo ʻoatu ha ʻamanaki lelei te ke lava ʻo ikunaʻi e ʻahiʻahí?

ʻE lava e kau akó ʻo ngāue mo ha hoa pea lau fakataha ʻa e veesi 5–14, ʻo kumi e meʻa te nau lava ʻo ako fekauʻaki mo e founga ke ikunaʻi ai e ʻahiʻahí.

• Ko e hā e meʻa ʻokú ke ako mei he veesi 13 fekauʻaki mo hono ikunaʻi ʻo e ʻahiʻahí?

Hili e tali ʻa e kau akó ki he fehuʻí, te ke lava ʻo fakamatalaʻi ange ko e ʻAlamā 13:28 ko ha veesi ia ʻoku hoa mo e 1 Kolinitō 10:13. Fakaafeʻi e kau akó ke lau ʻa e ʻAlamā 13:28 pea fakakaukau ke fakafekauʻaki e ongo potufolofola ko ʻení.

• Ko e hā ha ngaahi tefitoʻi moʻoni ʻo e ongoongoleleí te ke lava ʻo ʻiloʻi mei he ongo potufolofola ko ʻení? (ʻE lava ke ʻiloʻi ʻe he kau akó ha ngaahi moʻoni hangē ko ʻení: ʻE teuteu ʻe he ʻOtuá ha hala ke tau hao ai mei he ʻahiʻahí, ka kuo pau ke tau ʻuluaki fili ke mavahe mei he ʻahiʻahí. ʻI heʻetau loto-fakatōkilalo pea leʻo mo lotu maʻu ai peé, he ʻikai ke ʻahiʻahiʻi kitautolu ʻo lahi ange ʻi he meʻa te tau lava ʻo matuʻuakí.)

• Ko e hā ha ngaahi founga ʻe ala ʻomi ai ʻe he ʻOtuá ha founga ke tau hao mei he ʻahiʻahí?

• Kapau ʻoku toe e taimí, ʻe lava e kau akó ʻo vakai ki he fakamatala “ʻAhiʻahí, ʻAhiʻahiʻí” ʻi he Fakahinohino ki he Ngaahi Folofolá (Gospel Library) ke maʻu ha toe ngaahi potufolofola fekauʻaki mo hono ikunaʻi pe tekeʻi e ʻahiʻahí (vakai, “Ko e Kumi ʻi he Ngaahi Folofolá pea ʻi he Gospel Library” ʻi he Ngaahi Taukei Ako Folofolá). Fakaafeʻi e kau akó ke vahevahe mo ha hoa ʻa e meʻa ʻoku nau akó.

ʻOange ki he kau akó ha ngaahi miniti siʻi ke lekooti ha ngaahi sitepu pau te nau fakahoko ke fakatupulaki ai ʻenau malava ke tekeʻi ʻa e ʻahiʻahí.

Foki ki he “Ngaahi ʻEkitivitī Ako ke Fili Mei Aí.”

Fakaʻaliʻali ʻa e fakamatala ko ʻeni naʻe fai ʻe Palesiteni Tāleni H. ʻOakesí:

ʻOku hanga ʻe he ouau ʻo e sākalamēnití ʻo ʻai ke hoko ʻa e houalotu sākalamēnití ko e fakatahaʻanga toputapu mo mahuʻinga taha ia ʻi he Siasí. (“Houalotu Sākalamēnití mo e Sākalamēnití,” Liahona, Nōvema 2008, 17)

Kole ki he kau akó ke fakalaulauloto ki he ngaahi meʻá ni:

• ʻOkú ke ʻai nai ʻa e houalotu sākalamēnití ke hangē ko e fakatahaʻanga toputapu mo mahuʻinga taha ia ʻi he Siasí?

• ʻOku fēfē hoʻo teuteu ki he houalotu sākalamēnití?

Fakaafeʻi e kau akó ke lau ʻa e 1 Kolinitō 11:23–29, ʻo kumi e akonaki meia Paula ʻe ala tokoni ke nau teuteu ki he sākalamēnití:

• ʻOkú ke pehē ʻoku ʻuhinga ki he hā ke vakavakaiʻi koé?

• Ko e hā nai ʻe mahuʻinga ai ke vakavakaiʻi koe ʻi hoʻo teuteu ke maʻu ʻa e sākalamēnití?

Fakakaukau ke vahevahe e ngaahi fakamatala ko ʻeni ne fakahoko ʻe ʻEletā Leli R. Lōlení, ko ha Fitungofulu Taki Māʻolunga mālōlō fakalāngilangi, mo Brother Militoni Kamako, ko e Tokoni ʻUluaki ʻi he Kau Palesitenisī Lahi ʻo e Lautohi Faka-Sāpaté:

Ko ha taimi fungani ke fehuʻi ai, “Ko e hā ʻoku teʻeki ai ke u faí?” ʻa e taimi ko ia ʻoku tau kai ai e sākalamēnití. Naʻe akonaki mai e ʻAposetolo ko Paulá ko ha taimi ʻeni moʻotautolu takitaha ke tau vakavakaiʻi ʻetau moʻuí. ʻI he ʻātakai molumalu ko ʻení, ʻi he tafoki ʻetau fakakaukaú ki he langí, ʻe lava ke fakahā mai ʻe he ʻEikí ʻa e meʻa ʻoku fiemaʻu ke tau fakaleleiʻi hokó. (“Ko e Hā ʻOku Teʻeki Ai Ke u Faí?,” Liahona, Nōvema 2015, 34)

Ko e fakafoʻou ko ia ʻetau ngaahi fuakava ʻi he sākalamēnití he Sāpate kotoá ko ha faingamālie maʻongoʻonga ia ke vakavakaiʻi ai kitautolu mo toe tukutaha ʻetau moʻuí kia Sīsū Kalaisi. ʻI heʻetau maʻu ʻa e sākalamēnití, ʻoku tau fakahaaʻi ai ʻoku tau “manatu maʻu ai pē kiate ia” [Molonai 4:3; 5:2]. (“Tokanga Taha kia Sīsū Kalaisi,” Liahona, Mē 2023, 65)

• ʻE fakatupulaki fēfē ʻetau aʻusia ʻi he sākalamēnití ʻi hono vakavakaiʻi kitautolú? (ʻE lava ke ʻiloʻi ʻe he kau akó ha moʻoni hangē ko ʻení: ʻI hono vakavakaiʻi kitautolu ʻi he teuteu ki he sākalamēnití, te tau lava ai ʻo toe fakatefito ange ʻetau moʻuí ʻia Sīsū Kalaisi pea fakahinohinoʻi ʻi he founga ke fakalakalaka aí.)

• Kuo fēfē hoʻo aʻusia ʻi he sākalamēnití ʻi hoʻo tokanga taha ki he Fakamoʻuí?

• Ko e hā ha meʻa ʻe ala tokoni atu ke ke teuteu ki he sākalamēnití?

Fakaafeʻi e kau akó ke nau faʻu ha palani faingofua ʻo e meʻa te nau fai ke vakavakaiʻi ai kinautolu ʻi he teuteu ki he sākalamēnití he Sāpate ko ʻeni ka hoko maí.

Kapau ʻoku ʻi ai ha fehuʻi ʻa e kau akó fekauʻaki mo e ʻuhinga ke maʻu ai ʻi he taau ʻa e sākalamēnití, te ke lava ʻo vahevahe mo aleaʻi e fakamatala ko ʻeni ʻa ʻEletā Sione H. Kolipoki, ko ha Fitungofulu Taki Māʻolunga mālōlō:

Kapau ʻoku tau fie fakalakalaka (ʻa ia ko haʻatau fakatomala) pea [ʻikai ha fakangatangata pe toʻo e mēmipasipí], ʻi heʻeku fakakaukaú, ʻoku tautaau. Neongo ia, kapau ʻoku ʻikai ke tau fie fakalakalaka, kapau ʻoku ʻikai haʻatau fakakaukau ke muimui ʻi he fakahinohino ʻa e Laumālié, kuo pau leva ke tau fehuʻi: ʻOku tau taau nai ke maʻu ʻa e sākalamēnití, pe ʻoku tau manukiʻi nai ʻa e tefitoʻi taumuʻa ʻo e sākalamēnití, ʻa ia ko e hoko ko ha tupuʻanga ʻo e fakatomalá mo e fakalakalaka fakatāutahá? (“The Beauty and Importance of the Sacrament,” Ensign, May 1989, 38)

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali ʻa e fakamatala ko ʻeni naʻe fai ʻe Sisitā Mīseli D. Kuleki, ko e Tokoni ʻUluaki mālōlō ʻi he Kau Palesitenisī Lahi ʻo e Kau Finemuí:

Kuo foaki mai ʻe he ʻOtuá ha ngaahi meʻaʻofa kiate kitautolu takitaha. Mahalo he ʻikai ke ke ongoʻi talēnitiʻia, ka ʻoku ʻi ai ho ngaahi meʻafoaki fakalaumālie mei he ʻOtuá ke ke lava ʻo tāpuekina ʻaki e niʻihi kehé pea ʻunu ke ofi ange kiate Ia.

Ko e hā ha ngaahi meʻafoaki kuo foaki atu ʻe he ʻOtuá? (“Ngaahi Meʻafoaki Taʻeʻiloá” [fakataha lotu faka-Kilisimasi ʻa e Kau Palesitenisī ʻUluakí, 5 Tīsema 2021], Gospel Library)

Fakaafeʻi e kau akó ke lekooti e ngaahi meʻafoaki ʻoku nau ongoʻi kuo foaki ange ʻe he ʻOtuá kiate kinautolú.

Fakamatalaʻi ange naʻe akoʻi ʻe Paula ki he kakai Kolinitoó ʻa e mahuʻinga mo e taumuʻa ʻo e ngaahi meʻafoaki fakalaumālié. Fakaafeʻi e kau akó ke lau ʻa e 1 Kolinitō 12:4–11 pea fakaʻilongaʻi e ngaahi meʻafoaki ʻoku nau maʻú. Te ke lava ʻo hiki ʻi he palakipoé ʻa e ngaahi meʻafoaki ʻoku nau maʻú pea fehuʻi ange:

• Ko e hā e ngaahi meʻafoaki ʻoku makehe kiate koé? Ko e hā hono ʻuhingá?

• Ko e hā e ʻuhinga ʻoku foaki mai ai ʻe he ʻEikí kiate kitautolu ha ngaahi meʻafoaki fakalaumālié? (ʻE lava ke ʻiloʻi ʻe he kau akó ha moʻoni hangē ko ʻení: ʻOku foaki ʻe he ʻEikí ʻa e ngaahi meʻafoaki fakalaumālié ki he mēmipa takitaha ʻo Hono Siasí ke nau lava ʻo faitāpuekina ʻa e niʻihi kehé.)

Fakamahinoʻi ange ʻoku ʻikai kakato ʻa e lisi ʻa Paula ki he ngaahi meʻafoakí. Ke maʻu ha toe ngaahi meʻafoaki kehe, fakaafeʻi ha kau ako ke nau fekumi ʻi he Molonai 10:8–18; pea lava ha niʻihi ʻo fekumi ʻi he Tokāteline mo e Ngaahi Fuakava 46:11–26, pea fekumi ha niʻihi ʻi he laʻipepa tufa ko e “Ngaahi Meʻafoaki Taʻeʻiloá.” Fakaafeʻi e kau akó ke nau hiki ʻi he palakipoé ha toe faʻahinga meʻafoaki kehe ʻoku nau maʻu.

• Ko e hā ʻoku mahuʻinga ai ke ʻiloʻi mo fakamahuʻingaʻi ʻa e ngaahi meʻafoaki fakalaumālie kotoa pē, kau ai kinautolu ʻoku taʻeʻiloá?

• Ko e fē ha taimi kuó ke aʻusia ai ha taha ʻo e ngaahi meʻafoakí ni ʻiate koe pē pe tāpuekina koe ʻe ha taha ʻokú ne maʻu ha taha ʻo e ngaahi meʻafoakí ni?

• Ko e hā hoʻo ongo fekauʻaki mo e Tamai Hēvaní mo Sīsū Kalaisi, ʻi hoʻo ʻiloʻi kuó Na tāpuekina kitautolu ʻaki ha ngaahi meʻafoaki fakalaumālie kehekehé?

Fakaafeʻi e kau akó ke lekooti e founga te nau tali ʻaki ai he taimí ni e fehuʻi ʻa Sisitā Kulekí, “Ko e hā ha ngaahi meʻafoaki kuo foaki atu ʻe he ʻOtuá?” Ke tokoni ke ʻiloʻi ʻe he kau akó ʻenau ngaahi meʻafoakí, te mou lava ʻo lau fakataha e fakamatala ko ʻeni ʻa ʻEletā Sione C. Pingilī ko e Siʻí:

Te tau ʻilo fēfē ʻetau ʻū meʻafoakí? Te tau lava ʻo vakai ki heʻetau tāpuaki fakapēteliaké, ʻeke ki he niʻihi ʻoku nau ʻiloʻi lelei kitautolú, mo feinga pē ʻiate kitautolu ke ʻiloʻi ʻa e meʻa ʻoku tau poto mo manako aí. Ko e mahuʻinga tahá, ke tau ʻeke ki he ʻOtuá (vakai, Sēmisi 1:5; T&F 112:10). ʻOkú Ne ʻafioʻi ʻetau ʻū meʻafoakí, he ko Ia naʻá Ne foaki maí (vakai, T&F 46:26). (“ʻOku ʻi ai Haʻaku Ngāue Ke Ke Fai,” Liahona, Nōvema 2017, 33)

Ke tokoni ki he kau akó ke nau vakai ki he ʻuhinga ʻoku fiemaʻu ai kitautolu mo ʻetau ngaahi meʻafoaki fakalaumālié ʻi he Siasi ʻo e ʻEikí, lau fakataha ʻa e 1 Kolinitō 12:12–27.

• Ko e hā ha meʻa ʻokú ke saiʻia taha ai ʻi he pōpoaki ʻa Paulá?

• ʻE fakaʻaongaʻi fēfē nai ʻa e pōpoaki ʻa Paulá ki he ngaahi fakamatala ko ʻení?

  • “ʻOku ʻikai ke u maʻu ha meʻa ke tokoni ʻi hoku uōtí; ʻoku ʻikai ke u talēnitiʻia fēfē.”

  • “Ko ha taki lelei ange ʻa Sisitā Palauni, he ʻikai pē ke u teitei lavaʻi ʻa e meʻa ʻokú ne faí.”

  • “ʻOku ou kei foʻou ʻaupito ki he Siasí mo ʻikai ha taukei ko ia ʻoku ʻikai lahi ha meʻa ke u tokoni ai ʻi hoku uōtí.”

Kapau ʻe tokoni, te mou lava ʻo mamataʻi ʻa e “Is There a Place for Me?” (3:59). Te ke lava leva ʻo fakaafeʻi e kau akó ke fakalaulauloto ki he fehuʻi ko ʻení:

4:0

• Ko e hā nai ha founga ʻe finangalo ʻa e ʻEikí ke ke fakaʻaongaʻi ki ai ho ngaahi meʻafoaki fakalaumālié mo e ngaahi talēnití ke tāpuekina ʻa kinautolu ʻi ho uōtí, koló, pe fāmilí?

Foki ki he “Ngaahi ʻEkitivitī Ako ke Fili Mei Aí.”

Te ke lava ʻo kamata ʻaki hono fakaafeʻi e kau akó ke vahevahe ha ngaahi sīpinga ʻe niʻihi ʻo e founga naʻe fakahaaʻi ai ʻe Sīsū Kalaisi ʻa e ʻofá lolotonga ʻEne ngāue ʻi he moʻui fakamatelié. Kapau ʻe tokoni, te ke lava ʻo fakaʻaliʻali ha ʻū fakatātā ʻo e Fakamoʻuí ʻoku fakatātaaʻi ai ʻEne ʻofá.

• Naʻe tokoni fēfē ʻa e ʻofa ʻa e Fakamoʻuí kiate kinautolu naʻá Ne ngāue fakaetauhi ki aí?

• Kuo tokoniʻi fēfē koe ʻe Heʻene ʻofá?

Fakamahinoʻi ange ʻoku faʻa fakaʻaongaʻi ʻi he ngaahi folofolá ʻa e foʻi lea ko e manavaʻofa ke fakamatalaʻi e “ʻofa haohaoa ʻa Kalaisí” (Molonai 7:47). Fakaafeʻi e kau akó ke lau ʻa e 1 Kolinitō 13:1–3, ʻo kumi e tuʻunga ne fakamahuʻingaʻi ai ʻe Paula ʻa e manavaʻofá.

• Ko e hā ʻa e pōpoaki ʻa Paula fekauʻaki mo e manavaʻofá?

Fakakaukau ke lau fakataha ʻa e fakamatala ko ʻeni ʻa Palesiteni Tieta F. ʻUkitofá, ko ha mēmipa he taimi ko iá ʻo e Kau Palesitenisī ʻUluakí:

ʻOku fiemaʻu e ngāué ki he ʻofa moʻoní. Te tau talanoa ki he ʻofá he ʻahó kotoa—te tau fai tohi pe faʻu maau ʻo talaki ai, hiva ʻo fakahīkihikiʻi ai, mo malanga ʻo poupouʻi ia—ka ʻo ka ʻikai ke hā heʻetau ngāué, tā ko e “ukamea pakihi pe simipale tatangi pē ʻetau ngaahi leá” [1 Kolinitō 13:1].

Naʻe ʻikai ke folofola ʻaki pē ʻe Kalaisi e ʻofá; naʻá Ne fakahaaʻi ia ʻi he ʻaho kotoa. (“Ko Hoku Ongo Nimá Kimoutolu,” Liahona, Mē 2010, 70)

Fakamatalaʻi ange ʻoku ʻomi ʻe Paula ʻi he 1 Kolinitō 13:4–7, ha ngaahi fakakaukau mahuʻinga fekauʻaki mo e natula ʻo e manavaʻofá. ʻE lava ke fakaʻaongaʻi ʻe he kau akó ʻa e tohi tufa “Manavaʻofá: Ko e ʻOfa Haohaoa ʻa Kalaisí” ke fakaloloto ʻenau mahino ki he manavaʻofá. Fakaafeʻi e kau akó ke fili ha tafaʻaki ʻe ua pe tolu ʻo e manavaʻofá te nau loto ke mahino lelei ange kiate kinautolú. Fakamamafaʻi ange ko e founga lelei taha ke mahino ai ʻa e manavaʻofá ko e ako mei he sīpinga ʻa Sīsū Kalaisí.

Hili hono ʻoange ha taimi ki he kau akó ke nau ako aí, tuku ke nau faʻu ha fanga kiʻi kulupu iiki. Fakaafeʻi e tokotaha ako takitaha ke fili ha foʻi lea pe kupuʻi lea ʻe taha naʻa nau nofotaha ai pea vahevahe e meʻa kuo nau ako mei heʻenau akó. Poupouʻi kinautolu ke nau tokanga taha ki he meʻa ne nau ako mei he sīpinga ʻa Sīsū Kalaisí.

Te ke lava ʻo fakaʻosi e kalasí ʻaki hano fakaafeʻi e kau akó ke vahevahe ha ngaahi sīpinga ʻo e founga kuo nau aʻusia ai e ʻofa faka-Kalaisí. Te mou lava foki ʻo mamata ʻi he “Pure Love of Christ” (2:07).

2:8

Fakaafeʻi e kau akó ke ngāue ki ha faʻahinga ueʻi pē te nau maʻu.

Foki ki he “Ngaahi ʻEkitivitī Ako ke Fili Mei Aí.”