“Ko e Kalaisi Moʻuí,” Fuakava Foʻoú – Tohi Lēsoni ʻa e Faiako ʻInisititiutí (2025)
Ko e Kalaisi Kuo Toetuʻú, tā fakatātaaʻi ʻe Walter Rane
Ko e Kalaisi Moʻuí
ʻI he ʻaho 1 ʻo Sānuali 2000, naʻe tuku mai ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha fakamatala ʻoku ʻiloa “Ko e Kalaisi Moʻuí: Ko e Fakamoʻoni ʻa e Kau ʻAposetoló” (Gospel Library). ʻI he fakamatala fakahisitōlia ko ʻení, ʻoku fakamoʻoni ai ʻa e Kau ʻAposetoló ki he moʻui taʻe-hano-tatau, misiona fakalangi, mo e ngaahi fatongia toputapu ʻo Sīsū Kalaisí.
Fakatokangaʻi ange: ʻE lava ke akoʻi ʻa e lēsoni ko ʻení ʻi ha faʻahinga taimi pē lolotonga ʻa e kalasi ko ʻení. Hangē ko ʻení, te ke lava ʻo akoʻi ʻeni ko e lēsoni ʻuluaki ʻo e kalasí, lolotonga e uike Toetuʻú, hili hono ako e Ngaahi Kosipeli ʻe faá, pe ko e fakaʻosinga ʻo e kalasí.
Ngaahi Maʻuʻanga Tokoni Kehé
Fakatokangaʻi ange: ʻOku ʻomi ʻe he “Talateu ki he Kalasí” ha fakahinohino ki he founga hono fakaʻaongaʻi ʻo e ngaahi ʻelemēniti angamaheni ʻe fā ʻo e lēsoni ʻoku hoko maí.
Ko Hono Poupouʻi ʻo e Ako Fakatāutahá
Kimuʻa pea kamata e kalasí, fakakaukau ke ʻave ki he kau akó ha taha ʻo e ngaahi pōpoaki ko ʻení, ʻo fakatatau mo e taimi ʻo e taʻú ʻokú ke akoʻi ai e lēsoni ko ʻení. Te ke lava foki ke ʻave ha ngaahi pōpoaki pē ʻaʻau.
-
Kimuʻa pea kamata hoʻo ako e Fuakava Foʻoú, lau ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló.” ʻI hoʻo laú, feinga ke ʻiloʻi ʻa e ngaahi moʻoni fekauʻaki mo Sīsū Kalaisi ʻokú ke loto ke mahino lelei ange mo ke ongoʻi lahi angé.
-
Kuo poupouʻi kitautolu ʻe Palesiteni Lāsolo M. Nalesoni ke tau tokanga lahi ange ki he Fakamoʻuí lolotonga e uike kimuʻa he Toetuʻú (vakai, “This Easter, Find Peace in Jesus Christ,” Inspiration (blog), Mar. 28, 2021, ChurchofJesusChrist.org). Lau mo fakalaulauloto ki he “Ko e Kalaisi Moʻuí: Ko e Fakamoʻoni ʻa e Kau ʻAposetoló” ke hoko hoʻo Toetuʻú ko ha aʻusia ʻoku fakatefito ange ʻia Kalaisi.
-
ʻI he fakaʻosi ʻetau ako e Fuakava Foʻoú, lau ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló.” Fakakaukau ki he founga kuo tupulaki ai hoʻo fakamoʻoni ki he Fakamoʻuí lolotonga e kalasi ko ʻení.
Ngaahi Fehuʻí mo e Vahevahé
Tuku ha taimi ki he kau akó ke nau ʻeke ha ngaahi fehuʻi mo fevahevaheʻaki ha ngaahi fakakaukau mo ha ngaahi moʻoni naʻa nau maʻu ʻi heʻenau ako fakataautaha ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló.”
Ako Fakataukeí
ʻE lava ke hoko ʻa e ʻekitivitī ako ʻi he laʻipepa tufa “Ako ʻKo e Kalaisi Moʻuí’” ko ha konga ʻaonga ke fakaʻaongaʻi ai ʻa e taukei “Ko e Kumi ʻi he Ngaahi Folofolá pea ʻi he Gospel Library” ʻi he Ngaahi Taukei Ako Folofolá.
ʻEkitivitī Akó
Ko e Kalaisi Moʻuí: Ko e Fakamoʻoni ʻa e Kau ʻAposetoló
Ko e hā ʻe lava ke akoʻi mai ʻe he “Ko e Kalaisi Moʻuí” ʻo fekauʻaki mo e Fakamoʻuí?
Fakaafeʻi e kau akó ke nau fakakaukauloto naʻe fehuʻi ange ʻe ha taha ʻoku ʻikai kau ki heʻetau tui fakalotú, “Ko e hā e meʻa ʻokú ke tui ki ai fekauʻaki mo Sīsū Kalaisí?”
Fakaafeʻi e kau akó ke nau fakaʻaongaʻi ha ngaahi miniti siʻi pea lekooti e ngaahi meʻa mahuʻinga taha te nau fie vahevahe fekauʻaki mo e Fakamoʻuí.
Hili hono maʻu ʻe he kau akó ha taimi ke lekooti ʻenau ngaahi fakakaukaú, fakamanatu kiate kinautolu ʻi he ʻaho 1 ʻo Sānuali 2000, naʻe vahevahe ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa ne nau ongoʻi naʻe mahuʻinga fekauʻaki mo e Fakamoʻuí ʻi he “Ko e Kalaisi Moʻuí: Ko e Fakamoʻoni ʻa e Kau ʻAposetoló.”
Kimuʻa pea ako ʻa e “Ko e Kalaisi Moʻuí,” fakakaukau ke vahevahe ʻa e lea ko ʻeni ʻa Lōpeti D. Heilí:
ʻOku toe vave mo mamaʻo ange e mavahe fakalaumālie ʻa e kakai ʻo e māmaní mei he ʻEikí ʻi ha toe taimi kimuʻa. Kuo fakaʻaongaʻi ʻe he filí hono mālohí mo e ivi tākiekiná ʻi he māmaní. ʻOku tau mamata, fanongo, lau, ako mo vahevahe e ngaahi lea ʻa e kau palōftá ko ha fakatokanga mo ha maluʻanga. Hangē ko ʻení, ne fuoloa hono ʻomi ʻo e “Ko e Fāmilí: Ko ha Fanongonongo ki Māmaní” kimuʻa pea tau aʻusia e ngaahi faingataʻa ʻoku fehangahangai mo e fāmilí he taimi ní. Naʻe teuteuʻi kimuʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló” ki he taimi te tau fiemaʻu lahi taha aí. (“Konifelenisi Lahí: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 7)
-
Ko e hā naʻe mahuʻinga kiate koe mei he fakamatala ko ʻení?
Tufa ʻa e laʻipepa tufa “Ako ʻKo e Kalaisi Moʻuí.’” ʻOange ha taimi ki he kau akó ke nau fakakakato fakafoʻituitui ai ʻa e laʻipepa tufá. Te ke lava ʻo fakaafeʻi ʻa e kau akó ke nau ako kakato ʻa e “Ko e Kalaisi Moʻuí” ki he ʻekitivitī ako ko ʻení. Pe te ke lava ʻo vahe ki he kau akó ha ngaahi konga kehekehe ʻo e fakamatalá ke nau ako.
Hili e ako ʻa e kau akó, fakaafeʻi kinautolu ke vahevahe ʻenau ngaahi tali mei heʻenau laʻipepa tufá mo ha hoa pe kulupu tokosiʻi. Fakakaukau leva ke aleaʻi ko ha kalasi ha ngaahi fehuʻi hangē ko ʻení:
-
Ko e hā naʻá ke ako pe ongoʻi fekauʻaki mo e Fakamoʻuí ʻi hoʻo ako ʻa e “Ko e Kalaisi Moʻuí”?
-
ʻOkú ke pehē ko e hā ha ngaahi founga ʻoku mahuʻinga ai ki he māmaní he ʻahó ni ʻa e ngaahi moʻoni ʻoku akoʻi ʻi he “Ko e Kalaisi Moʻuí”? Ko hai te ke lava ʻo vahevahe mo ia e ngaahi moʻoni ko ʻení?
-
ʻE lava fēfē ʻe he ʻilo mo e tui ki he ngaahi moʻoni ʻi he “Ko e Kalaisi Moʻuí” ʻo tākiekina e anga hoʻo moʻuí?
Ke fakaʻosí, ʻoange ha taimi ki he kau akó ke nau fakakaukau ki he meʻa te nau ala tānaki ki he meʻa ne nau tohi ʻi he kamataʻanga ʻo e ʻekitivitī ko ʻení. ʻE lava ke vahevahe ʻe he kau akó ʻenau ngaahi fakakaukau kuo toe vakaiʻi fekauʻaki mo e Fakamoʻuí mo hanau hoa pe ʻi ha fanga kiʻi kulupu iiki.
Fakamoʻoni ki he ngaahi moʻoni fekauʻaki mo Sīsū Kalaisi naʻa mou aleaʻi ʻi he lēsoni ko ʻení. Poupouʻi e kau akó ke lekooti e ngaahi ueʻi fakalaumālie kuo nau maʻú pea ngāueʻi kinautolu.