Mātiu 2; Luke 2

Fakaʻaliʻali e fakatātā ko ʻeni ʻo Sīsū Kalaisi ko e Tupuʻangá. Fakaafeʻi e kau akó ke vahevahe e meʻa ʻoku tau ʻilo fekauʻaki mo Sīsū Kalaisi mei he maama fakalaumālié pea mo Sihova, ko e ʻOtua ʻo e Fuakava Motuʻá.

Christ the Creator (Ko Kalaisi ko e Tupuʻangá), tā fakatātaaʻi ʻe Robert T. Barrett

Fakaʻaliʻali leva ha fakatātā ʻo Sīsū ko ha pēpē, pea fakaafeʻi e kau akó ke nau lau ʻa e Luke 2:1–7, ʻo kumi e ngaahi tūkunga ʻo Hono ʻaloʻí.

Kapau ʻe tokoni, te ke lava ʻo sio ki he “The Christ Child” mei he taimi 1:00 ki he 6:00 pe toe vakaiʻi ʻa e “Luke 2:1–7. What were the circumstances of the Savior’s birth? [Ko e hā e ngaahi tūkunga ʻo hono ʻaloʻi ʻo e Fakamoʻuí?]” ʻi he Scripture Helps: New Testament [Ngaahi Tokoni Fakafolofolá: Fuakava Foʻoú].

17:56

• ʻI hoʻo fakakaukau ki he mālohi, maʻongoʻonga, mo e nāunau ʻo Sīsū Kalaisí, ko e hā ha meʻa ʻokú ke pehē ʻoku mahuʻinga fekauʻaki mo e ngaahi tūkunga ʻo Hono ʻaloʻí?

Fakamahinoʻi ange naʻe fehuʻi ki he palōfita ko Nīfai ʻi he Tohi ʻa Molomoná ʻi ha meʻa-hā-mai ʻo hono ʻaloʻi ʻo e Fakamoʻuí, “ʻOkú ke ʻiloʻi ʻa e āfeitaulalo ʻa e ʻOtuá?” (1 Nīfai 11:16). Fakatokangaʻi ange: ʻOku ʻuhinga ʻa e foʻi lea āfeitaulaló ki he hifo loto-fiemālie mei ha tuʻunga māʻolunga ange ki ha tuʻunga pe tūkunga māʻulalo ange.) Kole ki he kau akó ke nau lau ʻa e mata meʻa-hā-mai ʻa Nīfai ʻi he 1 Nīfai 11:13–23, pea kumi e meʻa naʻe mahino kia Nīfai kau ki he āfeitaulalo ʻa e ʻOtuá.

• Ko e hā ha meʻa ʻoku akoʻi mai ʻe he āfeitaulalo ʻa Sīsū Kalaisí fekauʻaki mo Hono ʻulungāngá? Ko e hā ha meʻa te ne fakahaaʻi mai fekauʻaki mo ʻEne ngaahi ongo kiate kitautolú? (Tokoni ke ʻiloʻi ʻe he kau akó ha foʻi moʻoni hangē ko ʻení: ʻOku fakahaaʻi ʻe he afeitaulalo ʻa Sīsū Kalaisí ʻEne loto fakatōkilaló mo e ʻofa kiate kitautolú.)

• Ko e hā mo ha toe ngaahi founga kehe kuo āfeitaulalo ai ʻa Sīsū Kalaisi kae lava ke Ne tāpuakiʻi ʻetau moʻuí? (ʻE lava ke lau ʻe he kau akó ʻa e 1 Nīfai 11:26–33 ki ha toe ngaahi fakakaukau.)

• ʻE lava fēfē ʻe he mahino ʻo e āfeitaulalo ʻa e Fakamoʻuí ʻo tākiekina ʻa e founga hoʻo vakai mo fehangahangai mo hoʻo ngaahi faingataʻaʻia fakatāutahá?

Ke tokoni ke ongoʻi ʻe he kau akó ʻa e mahuʻinga ʻo e āfeitaulalo ʻa e Fakamoʻuí, te mou lava ʻo toe vakaiʻi fakataha ʻa e fakalea ʻo e himi “Sīsū ē Ne ʻAloʻi” (Ngaahi Himi, fika 107) pe mamataʻi ʻa e “Jesus Once of Humble Birth” (5:37). Fakaafeʻi e kau akó ke nau fakakaukau ki he pōpoaki ʻo e himí pea lekooti ha faʻahinga fakakaukau pe ongo ʻoku nau maʻu.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻalu atu ʻa e lea ko ʻeni meia ʻEleta Tieta F. ʻUkitofa, ʻi he taimi naʻe ʻi he Kau Palesitenisī ʻUluakí ai:

Kiate kinautolu kotoa pē ʻoku loto ke mahino ki ai pe ko hai kitautolu ʻi heʻetau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku ou loto ke tuku atu ha kamataʻanga ʻoku fakamahino ʻe he ngaahi foʻi lea ʻe nima ko ʻení: ʻOku mau fekumi kia Kalaisi. ʻOku mau fekumi ke ako ʻo kau kiate Ia. Ke muimui kiate Ia. Ke hoko ʻo hangē ko Iá. ʻOku mau fekumi kiate Ia ʻi he ʻaho kotoa pē ʻo e taʻú. (Dieter F. Uchtdorf, “Fekumi kia Kalaisi ʻi he Kilisimasí,” Liahona, Tīsema 2017, 4)

ʻOange ki he kau akó ha ngaahi miniti siʻi ke nau fakakaukau ai pea lekooti e meʻa kuo nau fai he uiké ni ke fekumi ai kia Kalaisí. Hili iá pea hiki ʻi he palakipoé ʻa e fakamatala taʻekakato ko ʻení: Te u lava ʻo fekumi kia Sīsū Kalaisi ʻaki …

Fakamatalaʻi ange ʻe lava ke maʻu ʻe he kau akó ha ngaahi founga kehekehe ke fakakakato ai ʻa e fakamatala ko ʻení ʻaki ʻenau fekumi ki ha ngaahi moʻoni ʻoku fokotuʻu mai pe fakatātaaʻi ʻe he ngaahi talanoa ko ʻení. ʻI hono lau ʻe he kau akó e ngaahi fakamatala ko ʻení, te nau lava ʻo fehuʻi: Ko e hā ha meʻa te tau lava ʻo ako mei he sīpinga ʻa e tokotaha pe kakai ʻi he talanoa ko ʻení? (Kapau ʻe lava ke fakaʻaongaʻi ʻe he kau akó hano toe akoʻi lahi ange ʻo e taukei ko ʻení, te ke lava ʻo toe vakaiʻi ʻa e “Ko e ʻIloʻi ʻa e Ngaahi Moʻoni ʻo e Ongoongoleleí ʻi he Folofolá” ʻi he Ngaahi Taukei Ako Folofolá.)

Fakaafeʻi e kau akó ke lekooti e founga te nau fakaʻosi ʻaki e fakamatala taʻekakató ʻo makatuʻunga ʻi he meʻa naʻa nau ako mei he ngaahi fakamatala takitaha ko ʻení:

• Mātiu 2:1–2, 7–11 (ko e Kau Tangata Potó)

• Luke 2:8–16 (ko e kau tauhisipí)

• Luke 2:25–32 (Simione), pe mamataʻi ʻa e “ʻOatu e Tamasiʻi ko Kalaisí ki he Temipalé” (2:04)

  

  1:54

• Luke 2:36–38 (ʻAna)

Hili hono ʻoange ha taimi feʻunga ke akó, fakaafeʻi e kau akó ke vahevahe e meʻa naʻa nau ako mei he niʻihi naʻa nau laukonga ki aí. Fakaafeʻi leva e kau akó ke nau hiki ʻi he palakipoé e ngaahi founga kehekehe naʻa nau fakaʻosi ʻaki e sētesí. ʻE lava ke faitatau ʻa e ngaahi fakamatala kuo kakató mo e ngaahi moʻoni ko ʻení: Te u lava ʻo fekumi kia Sīsū Kalaisi ʻaki ʻeku ako kiate Ia mo fakasio e ngaahi fakaʻilonga ʻo ʻEne hāʻele maí. Te u lava ʻo fekumi kia Sīsū Kalaisi ʻaki ʻeku moihū kiate Ia. Te u lava ʻo fekumi kia Sīsū Kalaisi ʻaki ʻeku ʻalu vave kiate Ia. Te u lava ʻo fekumi kia Sīsū Kalaisi ʻaki ʻeku ngāue loto fiemālie ʻi he temipalé. Te u lava ʻo fekumi kia Sīsū Kalaisi ʻaki ʻeku muimui faivelenga ki he ngaahi ueʻi ʻa e Laumālié. Te u lava ʻo fekumi kia Sīsū Kalaisi ʻi he ʻaukai mo e lotu fakamātoato.

ʻI hono vahevahe ʻe he kau akó ʻenau ngaahi fakamatala kuo kakató, fakakaukau ke fakaafeʻi kinautolu ke vahevahe foki e founga kuo ʻomi ai kinautolu ʻe he faʻahinga ngāue ko ʻení, pe ko ha taha ʻoku nau ʻilo, ke ofi ange ki he Fakamoʻuí.

Fakaafeʻi e kau akó ke nau fili ha fakamatala ʻe taha mei he palakipoé, pe ko haʻanau fakamatala pē ʻanautolu, pea faʻu ha palani faingofua ki he founga te nau fakaʻaongaʻi ai ia ke fekumi ki he Fakamoʻuí.

Fakatokangaʻi ange: Te ke lava ʻo fakaafeʻi e kau akó ʻi he kamataʻanga hoʻo kalasi hokó ke vahevahe ʻa e meʻa naʻa nau fai ke muimui ai ki heʻenau palaní.

Foki ki he “Ngaahi ʻEkitivitī Ako ke Fili Mei Aí.”

Te ke lava ʻo hiki ʻihe palakipoé ʻa e ngaahi foʻi lea ʻofa, ʻaʻapa, ʻapasia, ngāue tokoni, mo e mateaki. Fakaafeʻi e kau akó ke nau fakakaukau ki ha ngaahi taimi ne nau loto ai ke fakahaaʻi pe foaki ʻa e ngaahi meʻá ni ki he Tamai Hēvaní mo Sīsū Kalaisi. Hiki ʻa e foʻi lea ko e moihū ʻi ʻolunga he ngaahi foʻi lea ʻi he palakipoé, pea fakamahinoʻi ko e ngaahi foʻi leá ni ko e uho ia ʻo e moihū moʻoní (vakai, Ngaahi Tefitó mo e Ngaahi Fehuʻí, “Moihū,” Gospel Library).

Fakaafeʻi e kau akó ke nau ako ʻa e fakamatala ʻo e Kau Tangata Potó ʻi he Mātiu 2:1–12 pea kumi e ngaahi founga naʻe moihū ai ʻa e kau tangatá ni ki he ʻEikí. ʻE ala tokoni hano huluʻi ʻa e “The Christ Child” mei he taimi 13:44 ki he 17:16.

17:56

• Ko e hā e meʻa naʻe lea ʻaki mo fai ʻe he Kau Tangata Potó ke moihū ai ki he ʻEikí?

• Ko e hā ha meʻa te tau lava ʻo ako fekauʻaki mo e ʻuhinga ʻo e moihuú mei he Kau Tangata Potó? (ʻE lava ke ʻiloʻi ʻe he kau akó ha moʻoni hangē ko ʻení: ʻOku tau hū ki he ʻEikí ʻaki hono fakahaaʻi e ʻofa mo e ʻapasia kiate Ia ʻi heʻetau ngaahi leá mo e ngāué.)

• ʻE lava fēfē ʻe he fanga kiʻi founga faingofua mo siʻisiʻi ʻo e moihū fakamātoató ʻo tohoakiʻi kitautolu ke tau ofi ange ki he Tamai Hēvaní mo Sīsū Kalaisí? (Fakakaukau ke ke mamataʻi ʻa e “Returning to Prayer” [4:43] ke tokoni ki hono tali ʻo e fehuʻi ko ʻení.)

  

  4:43

Ke tokoni ke fai ʻe he kau akó ha ngāue lelei mo māʻoniʻoni, fakaʻaliʻali mo lau fakataha ʻa e lea ko ʻeni ʻa Palesiteni Dieter F. Uchtdorf, ʻi heʻene ʻi he Kau Palesitenisī ʻUluakí:

ʻOku fakamanatu mai ʻe he Kilisimasí mo e niʻihi ʻo e ngaahi tukufakaholo mahuʻinga ʻo e faʻahitaʻú, ʻoku totonu ke tau hangē ko e Kau Tangata Poto ʻo e kuonga muʻá, ʻo fekumi ki he Kalaisí pea tuku ʻi Hono ʻaó ʻa e ngaahi meʻaʻofa mahuʻinga tahá: ko ha loto mafesifesi mo ha laumālie fakatomala. ʻOku totonu ke tau foaki kiate Ia ʻetau ʻofá. ʻOku totonu ke tau foaki kiate Ia ʻetau loto fiemālie ke toʻo kiate kitautolu Hono huafá pea ʻaʻeva ʻi he hala ʻo e tuʻunga fakaākongá. ʻOku totonu ke tau palōmesi ke manatua maʻu pē Ia, faʻifaʻitaki ki Heʻene sīpingá, pea feʻaluʻaki ʻo fai lelei [vakai, Ngāue 10:38; Tokāteline mo e Ngaahi Fuakava 20:77, 79]. (“Of Curtains, Contentment, and Christmas” [First Presidency Christmas devotional, Dec. 4, 2011], Gospel Library)

ʻE lava ke vahevahe ʻe he kau akó ʻa e ngaahi founga kehekehe kuo nau moihū ai ki he Tamai Hēvaní mo Sīsū Kalaisi ʻaki hono foaki kiate Kinaua honau loto mafesifesí, ʻofá, mo e loto fiemālié. (Fakakaukau ke tohi e ngaahi tali ʻa e kau akó ʻi he palakipoé.)

ʻOange ki he kau akó ha ngaahi miniti siʻi ke nau fakalaulauloto fakalongolongo ai. Poupouʻi ke nau ʻiloʻi pea lekooti ha meʻa te nau lava ʻo fai he uiké ni ke moihū fakamātoato ai ki he ʻEikí.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali ʻa e fakatātā ko ʻeni ʻo Sīsū ʻi Heʻene kei talavoú.

ʻEke ki he kau akó pe ʻoku nau fakakaukau pea naʻe fēfē nai ʻa Sīsū ʻi Heʻene kei talavoú. Te ke lava foki ʻo fakaafeʻi ke nau fakakaukau pe naʻe fēfē nai hano ohi hake Ia ko ha foha pe tupu fakataha hake mo Ia ko ha tokoua/tuongaʻane.

Fakaafeʻi e kau akó ke nau toe vakaiʻi ʻa e Luke 2:40–52 mo e Liliu ʻa Siosefa Sāmitá, Mātiu 3:24–26 (Gospel Library), pea vahevahe ha ngaahi fakamatala fakaikiiki mei he kei siʻi mo e kei talavou ʻa Sīsuú ʻa ia ʻoku mahuʻinga taha kiate kinautolú. Fakamahinoʻi ange ʻoku pehē ʻe he Liliu ʻa Siosefa Sāmita ʻi he Luke 2:46, “Pea naʻa nau fanongo kiate ia, ʻo fai ha ngaahi fehuʻi kiate ia” (Gospel Library).

• Ko e hā e meʻa ʻoku fakahaaʻi mai ʻe he ngaahi potufolofola ko ʻení fekauʻaki mo e ʻulungaanga mo e ngaahi tōʻonga moʻui ʻa Sīsū ʻi Heʻene kei talavoú?

Kapau he ʻikai lave ki ai e kau akó, te ke lava ʻo fakamahinoʻi ange naʻe tupulaki ʻa e Fakamoʻuí ʻi he fakalau ʻa e taimí (vakai, Luke 2:40; Tokāteline mo e Ngaahi Fuakava 93:12–13) pea ʻi ha founga naʻe potupotutatau (vakai, Luke 2:52). Kapau ʻe fiemaʻu, te mou lava ʻo aleaʻi ʻa e ngaahi tafaʻaki ʻo e tupulakí ʻoku fokotuʻu mai ʻe he ngaahi foʻi lea “potó,” “lahí,” mo e “ʻofeina ʻe he ʻOtuá mo e tangatá” (veesi 52).

Fakakaukau ke fakaʻaliʻali ʻa e moʻoni pe ʻīmisi ko ʻení: Te tau lava ʻo muimui ki he sīpinga ʻa Sīsuú ʻaki ʻetau tupulaki fakaʻatamai, fakatuʻasino, fakalaumālie, mo fakasōsiale.

• Ko e hā nai e ʻuhinga ʻe mahuʻinga ai ke ngāueʻi ʻa e ngaahi tafaʻaki takitaha ko ʻení ʻi heʻetau feinga ke hangē ko e Fakamoʻuí?

• Ko e hā ha meʻa ʻe ala hoko kapau te tau liʻaki ha taha ʻo kinautolu?

Fakaafeʻi e kau akó ke nau fili ha tafaʻaki ʻe taha te nau fie aleaʻi fakaikiiki ange. Kole ange ke nau faʻu ha fanga kiʻi kulupu iiki mo kinautolu ʻoku nau mahuʻingaʻia ʻi he meʻa tatau. Fakaʻaliʻali e ngaahi fakamatala ko ʻení, pea fakaafeʻi e ngaahi kulupú ke nau fili ha meʻa ʻe taha pe lahi ange ke aleaʻi.

• Feinga ke ʻiloʻi ha ngaahi founga kuó ke tupulaki ai pe ko ha niʻihi kehe ʻokú ke ʻiloʻi ʻi he tafaʻaki ko ʻení.

• Fakakaukau ki he founga ʻe lava ke tokoniʻi ai koe ʻe hoʻo fakatupulaki e tafaʻaki ko ʻení ke ke hoko ʻo tatau ange mo e Tamai Hēvaní mo Sīsū Kalaisi.

• Fekumi ki he founga ʻoku tokoniʻi ai koe ʻe hono fakatupulaki e tafaʻaki ko ʻení ke ke fai ha ngaahi tokoni mahuʻingamālie ʻi ʻapi, ʻi he ngāué, ʻi he akó, ʻi he lotú, pe ʻi he komiunitií.

• Feinga ke ʻiloʻi ha ngaahi faingataʻa te ne ala taʻofi koe mei hoʻo tupulaki ʻi he tafaʻaki ko ʻení mo e founga ke ikunaʻi ai kinautolú.

Ke tokoniʻi e kau akó ke nau ngāueʻi e meʻa kuo nau akó, fakakaukau ke vahevahe ʻa e lea ko ʻeni meia Palesiteni Lāsolo M. Nalesoni:

Fealeaʻaki mo e ʻEikí fekauʻaki mo e founga te ke lava ai ʻo tupulaki ʻi ha founga potupotutataú. … ʻE fiemaʻu ke ke fekumi ki he fakahā fakatāutahá. ʻE fiemaʻu ke ke fili e founga ke ke ngāueʻi ai iá. Taimi ʻe niʻihi, ʻe ueʻi koe ʻe he Laumālié ke fai ha ngaahi meʻa faingataʻa. ʻOku ou tui kuo mou mateuteu ki he pole ko iá. Te ke lava ʻo fai ʻa e ngaahi meʻa ʻoku faingataʻá. (ʻi he “Fakafeʻiloaki ʻe he Kau Takí ʻa e Polokalama Foʻoú ʻa e Fānaú mo e Toʻu Tupú,” Liahona, Nōvema 2019, 124)

ʻOange ki he kau akó ha ngaahi miniti siʻi ke nau fakalongolongo ai mo fakafanongo ki he Laumālie Māʻoniʻoní. Poupouʻi ke nau lekooti e meʻa ʻoku nau ongoʻi ʻoku ueʻi ke nau faí. Kapau ʻoku ongoʻi lōmekina ha kau ako ʻe niʻihi ʻi hono tali e tukupā ko ʻení ke fai ha ngaahi meʻa faingataʻa, fakakaukau ke sio mo aleaʻi ʻa e “Self-Care Made Simple”(3:40).

3:40

Foki ki he “Ngaahi ʻEkitivitī Ako ke Fili Mei Aí.”