Mātiu 2; Luke 2

Kuo ʻi ai ha fakamahamahalo lahi fekauʻaki mo e tuʻunga totonú, tupuʻangá, fiká, mo e hingoa ʻo e Kau Tangata Potó. Ka naʻe ʻikai ʻomi ʻe Mātiu ʻa e ngaahi fakaikiiki ko ʻení. Naʻá ne fakaʻaongaʻi ʻa e foʻi lea faka-Kalisi ko e magi (maki) ke ʻuhinga ki he kau tangatá. ʻOku ʻuhinga ʻa e foʻi lea ko iá ki ha kulupu ʻo e kau ʻasitanoma mo e kau taulaʻeiki fakakuongamuʻa ʻoku nau kau ki he tui fakalotu ʻi Sōlosiliané ʻi Peasia. Neongo pe ko hai ʻa e Kau Tangata Potó pe ko e feituʻu ne nau omi mei aí, ʻoku hā ʻi heʻenau ʻaʻahí “ko e kau tangata angatonu kinautolu ne fekauʻi mai ʻi ha fekau ke mamata ki he ʻao ʻo e ʻAlo ʻo e ʻOtuá ʻi he māmaní.”

ʻOku ʻikai ʻiloʻi e taimi pau ʻo e ʻaʻahi ʻa e Kau Tangata Potó. Ka neongo ia, ʻoku fokotuʻu mai ʻe he Mātiu 2:11 naʻe hoko ia hili ha taimi mei hono ʻaloʻi ʻo Sīsū Kalaisí. Naʻe maʻu ʻe he Kau Tangata Potó ʻa Sīsū ʻi ha “fale,” kae ʻikai ko ha ʻaiʻangakai ʻo e manú, pea ko Ha “tamasiʻi siʻi,” ʻikai ko ha valevale.

Naʻe ʻomi ʻe he Kau Tangata Potó ha ngaahi meʻaʻofa ko e koula, laipeno, mo e mula ke fakalāngilangiʻi mo hū kia Sīsū.

Kuo fuoloa hono fakamahuʻingaʻi ʻo e koulá ʻi hono ngingilá, fakaʻofoʻofá, malava ʻo filioʻí, mo matuʻuaki ʻa e ʻumeʻumeá mo hono ʻuliʻí. Naʻe fakafelāveʻi ʻe he kakai ʻi he kuonga muʻá ʻa e koulá mo e tuʻunga fakatuʻí, taʻe-faʻa-maté, mo e ʻotuá.

Naʻe kamata ʻa e laipenó mei ʻAlepea mo e fakatokelau ʻo ʻAfiliká. Ko ha toʻiʻi ʻakau kuo fakamōmoa kuo fakaʻaongaʻi ʻi he kaloní mo e ngaahi meʻa fakanamuleleí ʻi ha ngaahi taʻu ʻe lauiafe. ʻI he hisitōliá, ko e laipenó ko ha koloa mahuʻinga ʻaupito ia. Naʻe tutu ia ko ha meʻa namu kakala lolotonga e moihū ʻi he temipalé ʻi ʻIsileli ʻo e kuonga muʻá.

Ko e mulá ko ha toʻiʻi ʻakau mōmoa ia mei he ʻakau talatalá mo e ʻulu ʻakau ʻoku maʻu ʻi ʻAlepea mo e fakatokelau ʻo ʻAfiliká. Kuo taʻu ʻe lauiafe hono fakaʻaongaʻi ʻo e mulá ʻi he kaloni, meʻa fakanamu lelei mo e faitoʻo. Naʻe fakaʻaongaʻi ʻe he kau ʻIsileli ʻo e kuonga muʻá ʻa e mulá ʻi he moihū ʻi he temipalé ko ha konga ʻo e lolo tākai māʻoniʻoni ki hono fakatapui ʻo e ngaahi tuʻí, kau taulaʻeikí, mo e tāpanekalé.

ʻOku talanoa ʻa e kau fai hisitōlia ki he Hēlota ʻoku fakamatala ki ai ʻi he Mātiu 2 mo e Luke 1:5 ko Hēlota ko e Lahí. Naʻe fili ʻe he kau taki Lomá ʻa Hēlota ko ha tuʻi ʻo Siutea neongo naʻe ʻikai ko ha Siu ia. Naʻe pule ʻa Hēlota mei he taʻu 37 BC ki he 4 BC. ʻOku ʻiloa ia ʻi ha ngaahi ngāue langa kehekehe, kau ai hono toe langa ʻo e temipale ʻi Selusalemá. Naʻe hoko foki ʻa Hēlota ko ha tangata angaʻuli mo taʻefalalaʻanga. Lolotonga ʻene moʻuí, naʻá ne tuʻutuʻuni ke mate ha taha ʻo hono ngaahi uaifí, toko tolu ʻo hono ngaahi fohá, mo e kāinga ofí.

ʻI he ongoʻi manavasiʻi ʻi hono ʻaloʻi ʻo Sīsuú, ʻa e Tuʻi moʻoni ʻo e kau Siú, naʻe tuʻutuʻuni ai ʻa Hēlota ke fakapoongi fakatokolahi ʻa e fānau naʻe taʻu ua mo siʻi ange ʻi Pētelihemá mo e ngaahi vahefonua takatakai aí.

Naʻe fakafuofua ʻa Pētelihema ki ha maile ʻe 90 (kilomita ʻe 145) ki he fakatonga ʻo Nāsaletí, ʻa ia ne nofo ai ʻa Siosefa mo Melé. Naʻe ʻaho ʻe fā ki he nima ʻa e fononga lalo ki Pētelihemá—mahalo naʻe lōloa ange ki he ongomeʻa malí, ʻi he fakakaukau atu ki he tūkunga ʻo Melé.

ʻOku fakaʻaongaʻi ʻi he Tohi Tapu ʻa Kingi Sēmisí ʻa e “fale talifonongá” ki he lea faka-Kalisi ko e kataluma ʻoku maʻu ʻi he Fuakava Foʻou faka-Kalisí. ʻOku fakaʻaongaʻi e foʻi lea ko ʻení ʻi he Luke 2:7 ʻo ʻuhinga ki he “nofoʻanga” pea “loki talitali kakai.” ʻOku fakaʻaongaʻi foki ʻa e foʻi lea faka-Kalisi ko e kataluma ʻi he Luke 22:11 pea ʻoku ʻuhinga ia ki he loki naʻe fakaʻaongaʻi ʻe Sīsū mo ʻEne kau ākongá ʻi he ʻOhomohe Fakaʻosí. ʻOku lava ke liliu e foʻi lea ko ʻení ko e “loki talitali kakai.” Naʻe faʻa hoko e loki talitali kakaí ko ha loki ʻi ʻolunga. ʻOku pehē ʻi he Luke 2:7 naʻe ʻikai ha loki moʻo Mele mo e valevale ko Sīsuú ʻi he loki talitali kakaí.

ʻI he ʻuhinga ko ʻení, mahalo naʻá na nofo ʻi lalo, ʻa ia naʻe tauhi ai ʻa e fanga monumanú ʻi he poó kotoa pea nau kai mei he ʻaiʻanga kai ʻo e manú. Mahalo ko e feituʻu naʻe ʻaloʻi ai ʻa e Fakamoʻuí ko e fungavaka ki laló.

ʻOku fakahaaʻi ʻe he loto-fiemālie ʻa e Fakamoʻuí ke ʻaloʻi ʻi ha ngaahi tūkunga māʻulaló ha founga ʻe taha naʻá Ne hāʻele hifo ai “ki lalo ʻi he ngaahi meʻa kotoa pē.”

Naʻe meimei ko e kofu takatakaí ko ha ngaahi kafu pe konga tupenu ne kofu takai ʻaki e fānau valevalé. ʻOku ʻuhinga ʻa e takatakai ʻaki ʻa e kofú ke “takatakai maʻu.”

Fakatatau ki he fono ʻa Mōsesé, naʻe taʻemaʻa ʻa e houʻeiki fafiné hili ʻenau fāʻelé. Ke maʻá, naʻe fiemaʻu ke ʻalu ʻa Mele ki he temipalé ʻo fai ha feilaulau. “Pea kapau ʻoku ʻikai faʻa ʻomi ʻe ia ha lami, te ne toki ʻomi ʻe ia ha kulukulu ʻe ua, pe ko e lupe mui ʻe ua.” Naʻe foaki ʻe Mele ha fanga kiʻi lupe pe fanga lupe kae ʻikai ko ha lami, ʻokú ne fakahaaʻi naʻe siʻisiʻi e koloa naʻá ne maʻú.

Naʻe tohi ʻe ʻEletā Semisi E. Talamesi, “Naʻe hangē pē ʻa Sīsū ko e fānau tangata kei īkí, naʻe fiemaʻu ʻEne fakalakalaka moʻoni ʻo hangē pē ko e fānaú.” ʻI Heʻene tupú, naʻe “tupulaki ʻa e potó ʻia Sīsū mo e lahí, pea naʻe ʻofeina ia ʻe he ʻOtuá mo e tangatá.” ʻI he taʻu 12 ʻa Sīsuú, naʻe maʻu ʻe Mele mo Siosefa ʻEne talanoa ki he “kau akonakí,” pe kau faiako ʻi he temipalé. ʻOku fakahaaʻi ʻi he Liliu ʻa Siosefa Sāmitá ko e kau tangata ko ʻení “naʻa nau fanongo kiate ia mo fai ʻa e ngaahi fehuʻi kiate ia” kae ʻikai ko e founga ʻe tahá. Naʻe akoʻi ʻe he Palōfita ko Siosefa Sāmitá, “‘I He‘ene kei tamaisi‘i si‘í, na‘e ma‘u ‘e [Sīsū Kalaisi] ‘a e poto kotoa na‘e fiema‘u ke Ne lava ai ‘o tu‘utu‘uni mo pule‘i ‘a e pule‘anga ‘o e kakai Siú, pea lava ke fakafetau‘i lea mo e kau poto mataotaó mo loloto ‘ene ‘ilo ki he fonó mo e me‘a fakalangí, pea mo ‘ai ‘enau ngaahi fakakaukaú mo ‘enau angafaí ke hangē ha me‘a ngalivalé ‘i hono fakafehoanaki mo e poto na‘á Ne ma‘ú.”

• Russell M. Nelson, “The Peace and Joy of Knowing the Savior Lives,” Ensign, Dec. 2011, 16–21

• Eric D. Huntsman, “Glad Tidings of Great Joy,” Ensign, Dec. 2010, 52–57

• Wendy Kenney, “We Three Kings,” New Era, Dec. 2009, 24–27