Mātiu 18; Luke 10

Vakai, “Maʻake 9:42–48. Ko e hā e meʻa ʻoku ongoʻi ʻe he Fakamoʻuí fekauʻaki mo kinautolu ʻoku nau fakaʻitaʻi ʻa ʻEne fānau ʻʻoku siʻí’?”

ʻI he Tohi Tapú, ʻoku fakataipe ʻe he fika 7 ʻa e kakato, fonu, pe kānokato. ʻOku fakataipe ʻe he mataʻifika 490 (pe “liunga fitungofulu lau ʻe fitú”) ʻa e haohaoa. Naʻe fakaʻaongaʻi ʻe Sīsū ʻa e mataʻifika 7 mo e 490 ko ha “fakataipe ʻo e fakamolemoleʻi haohaoa.”

Naʻe pehē ʻe ʻEletā Lini G. Lōpini: “Naʻe ngāue ʻaki ʻe he ʻEikí ʻa e fika ʻo e liunga fitungofulú ko ha fakatātā ʻo ʻEne Fakalelei taʻe-fakangatangatá, ʻo ʻEne ʻofa taʻe-hano ngataʻangá, mo ʻEne ʻaloʻofa taʻefakangatangatá. ʻʻIo, pea ʻo ka fakatomala maʻu pē ʻa hoku kakaí te u fakamolemoleʻi ʻa kinautolu ʻi heʻenau ngaahi angahala kiate aú’ [Mōsaia 26:30; tānaki atu hono fakamamafaʻí].” ʻOku totonu ke tau faʻifaʻitaki ki he sīpinga hono fakamolemoleʻi ʻe he Fakamoʻuí ʻa e niʻihi kehé.

ʻI he talanoa fakatātā ko ʻení, ʻoku fakafofongaʻi ʻe he tuʻí ʻa e ʻEikí pea ʻoku fakafofongaʻi ʻe he tamaioʻeiki naʻe moʻua ʻaki e talēniti ʻe 10,000 ʻa kitautolu takitaha. Naʻe fakaʻaongaʻi ʻe he Fakamoʻuí ʻa e talanoa fakatātā ko ʻení ke akoʻi ʻa hono mahuʻinga ke fakamolemoleʻi e niʻihi kehé.

ʻOku ʻuhinga ʻa e talanoa fakatātaá ki he “talēniti ʻe mano” (veesi 24) mo e “tenali ʻe teau [faka-Kalisi dēnaria]” (veesi 28), ʻa ia ko e faʻahinga paʻanga ia ʻi he kuonga ʻo Sīsuú. Ko e tenali ʻe 100 naʻe moʻua ki ai e tamaioʻeikí, ko ha paʻanga kiʻi siʻisiʻi ia ʻi hono fakafehoanaki ki he talēniti ʻe 10,000.

“Lolotonga e senituli ʻuluaki A.D., naʻe fakafuofua naʻe mahuʻinga tatau e talēniti ʻe 10,000 mo e tenali ʻe 100,000,000. Ko e tenali ʻe tahá ko e vahe ia ki ha taha ngāue lau ʻaho angamaheni. Kapau naʻe ngāue ʻa e tokotaha ko iá ʻi ha ʻaho ʻe tolungeau he taʻu, ʻe fakafuofua ki ha taʻu ʻe 33 ka ne toki lava ʻo fakatau mai ha talēniti ʻe taha. Pea ʻe fiemaʻu ia ke ne ngāueʻi ha taʻu ʻe 300,000 tupu ka ne toki maʻu ha talēniti ʻe 10,000, ko e fakakātoa ʻo e moʻua ʻa e tamaioʻeikí.”

Naʻe akoʻi ʻe Palesiteni Sefilī R. Hōlani: “ʻOku kehekehe pē fakamatala ʻa e kau potó fekauʻaki mo e mahuʻinga fakapaʻanga hení … ka ke faingofua ki heʻetau talanoa fiká, kapau ko e tenali siʻisiʻi ne ʻikai lava ʻo fakamolemoleʻí, tau pehē, ko e $100 he taimí ni, ta ʻoku fakaofi atu e moʻua talēniti ʻe 10,000 ia ne fakamolemoleʻí, he $1 pilioná—pe lahi ange!

“ʻI he moʻua fakatāutahá, ko ha mataʻifika lahi moʻoni ia—mahulu hake he meʻa ʻoku tau ʻiló. … Ka, ko e taumuʻa ʻo e talanoa fakatātaá ni, ʻoku fakataumuʻa ia ke mahulu hake heʻetau mahinó; ʻoku fakataumuʻa ia ke mahulu hake he meʻa ʻoku tau lavá, pea mahulu hake he meʻa ʻoku tau malava ke totongi fakafokí. ʻOku ʻuhinga iá … kiate kitautolu, ko ha fāmili hinga ʻo e tangatá—ʻoku ʻi ai hotau moʻua he matelié, ko e kau maumaufono, mo e kau pōpula kotoa kitautolu. …

“ʻOku fakaʻaongaʻi ʻe Sīsū ha meʻafua taʻefakatataua heni, he ʻoku taʻefakatataua ʻEne Fakalelei kuo foaki taʻetotongi mai maʻatautolú.”

Ko Luke pē ʻa e tokotaha faʻu tohi Kosipeli ʻokú ne lekooti naʻe ui ʻe Sīsū Kalaisi ha Kau Fitungofulu. Naʻe pau ke malanga ʻaki ʻa e ongoongoleleí ʻe he Kau Fitungofulú fakataha mo e Kau ʻAposetolo ʻe Toko Hongofulu Mā Uá mo teuteu ʻa e hala maʻá e Fakamoʻuí. Naʻe faitatau ʻEne uiuiʻi ʻo e Kau Fitungofulú mo ʻEne ngaahi fakahinohino ne fai kiate kinautolú mo e uiuiʻi mo e fakahinohino naʻá Ne fai ki Heʻene Kau ʻAposetolo ʻe Toko Hongofulu Mā Uá. ʻI he ʻaho ní, ko e Kau Fitungofulu Taki Māʻolungá ko e kau taki kinautolu ʻo e Siasí kuo uiuiʻi ʻe he Kau Palesitenisī ʻUluaki ʻo e Siasí. ʻOku nau hoko ko ha “kau fakamoʻoni makehe” ki hono tokoniʻi ʻo e Toko Hongofulu Mā Uá ʻi hono “langa hake ʻo e siasí,” “tokangaʻi hono ngaahi meʻa kotoa pē,” mo “malanga ʻaki mo ʻoatu ʻa e ongoongoleleí” ʻi he funga ʻo e māmaní.

Ko e hala naʻe “ʻalu hifo mei Selusalema ki Selikoó” naʻe tahifo ʻaki ia ha fute ʻe 3,280. Mahalo naʻe muimui ia ʻi ha ngaahi vaitafe mōmoa, ʻo hangē ko ʻene hā ʻi he fakatātā ʻi laló. Naʻe fakafuofua ko e halá naʻe meimei maile ʻe 12.5 (20 km) hono lōloá pea fou atu ʻi ha potu fonua naʻe lala mo tafungofunga, ʻa ia naʻe faʻa toitoi ai e kau kaihaʻá ke ʻohofi ʻa e kau fononga ʻe fou atu aí.

Fakatatau ki he fono ʻa Mōsesé, naʻe vahe ʻa e kau taulaʻeikí mo e kau Līvaí ke nau akoʻi e fono ʻa e ʻOtuá pea mo tauhi ki he ʻOtuá mo honau kāingá. Naʻa nau ʻiloʻi lelei ʻa e fekau ke “ʻofa ki ho kaungāʻapí ʻo hangē pē ko koé.” Ko hono moʻoní, naʻe fekauʻi ʻe he ʻOtuá ʻa e kakai ʻIsilelí, kau ai ʻa e kau taulaʻeikí mo e kau Līvaí, ke ʻoua naʻa nau taʻe fai ha meʻa ʻi he taimi ʻoku ʻi ha tuʻunga fakatuʻutāmaki ai e moʻui ʻa e kaungāʻapí.

ʻI he talanoa fakatātā ʻa e Fakamoʻuí, naʻe maumauʻi ʻe he taulaʻeikí mo e tangata Līvaí ʻa e ngaahi fekau ko ʻení. Mahalo naʻá na muimui ki he tala-tukufakaholo ʻa e kaumātuʻá, pe ko e fono naʻe ʻikai tohí, kae ʻikai muimui ki he fono ʻa Mōsesé. Naʻe pehē ʻe he tukufakaholo ko ʻení naʻe ʻikai haʻisia ʻa e kau Siú ke fakahaofi ʻa e kakai naʻe ʻikai ko e kau Siú pe ko kinautolu ʻoku ʻikai ʻilo honau matakalí, mei he maté. Ko e faʻahinga peheé naʻe ʻikai lau ia ko ha kaungāʻapi.

Ko e meʻapangó, he naʻe fakakakato ʻe he tangata Samēliá ʻa e ngaahi fatongia ʻo e taulaʻeikí mo e tangata Līvaí ʻo hangē ko hono fakamatalaʻi ʻi he fono ʻa Mōsesé. Naʻe akoʻi ʻe Palesiteni M. Lāsolo Pālati: “Kuó ke fifili nai ki he ʻuhinga naʻe fili ai ʻe he Fakamoʻuí ke hoko ha tangata Samēlia ko e moʻungaʻi tangata ʻo e talanoa ko ʻení? Naʻe fetāufehiʻaʻaki lahi ʻa e kakai Siú pea mo e kakai Samēliá ʻi he taimi ʻo Kalaisí. ʻI he ngaahi tūkunga angamahení, naʻe fakaʻehiʻehi ʻa e ongo kulupu ko ʻení ke ʻoua naʻá na fetaulaki. ʻE kei hoko pē ia ko ha talanoa fakatātā lelei mo mahino kapau naʻe fakahaofi ʻe ha tangata Siu ʻa e tangata naʻe tā ‘e he kau kaihaʻá.

“ʻOku hoko ‘a e fakaʻaongaʻi ʻe he Fakamoʻuí ʻa e kau Siú mo e kakai Samēliá ke ne ako mahino mai kiate kitautolu ko e kaungāʻapi kotoa ʻa kitautolu, pea ʻoku totonu ke tau ʻofa, fakalāngilangi, fakaʻapaʻapa, mo fetokoniʻaki neongo ʻa e ngaahi meʻa ʻoku tau faikehekehe aí—kau ai hotau ngaahi faikehekehe fakalotu, fakapolitikale, mo fakafonuá.”

Naʻe faitoʻo ʻe he tangata Samēliá ʻa e ngaahi lavea ʻo e tangata ne kafó ʻaki e lolo mo e uaine, ʻa ia ʻokú na fakatou maʻu ha ivi fakafaitoʻo. Naʻe fakaʻaongaʻi e loló ke fakafiemālieʻi e laveá, pea fakaʻaongaʻi e uainé ke tamateʻi ʻaki e siemu ʻi he mataʻilaveá. ʻOku toe fakataipe foki ʻe he loló mo e uainé ʻa e Fakalelei ʻa Kalaisí. Hangē ko e Samēlia leleí, ʻoku maʻu ʻe Sīsū Kalaisi ʻa e manavaʻofá. ʻOkú Ne fakamoʻui hotau ngaahi kafo fakalaumālie ʻo e angahalá mo fakahaofi kitautolu mei he maté. ʻOkú Ne ʻomi kitautolu ki ha feituʻu malu pea ʻokú Ne ʻomi mo ha niʻihi kehe ke tokoniʻi kitautolu. Kuo huhuʻi fakataautaha ʻe Sīsū Kalaisi ʻa e totongi ki hotau fakahaofí ʻo fakafou ʻi Heʻene Fakaleleí.

“Naʻe mātuʻaki mahuʻinga e anga fakakaumeʻá ʻi he sōsaieti ʻo e kau Siú, pea naʻe makatuʻunga e lāngilangi mo e ongoongo ʻo ha fefine ʻi heʻene fakahoko lelei e ngaahi fiemaʻu ʻi he anga fakafonuá fekauʻaki mo e fatongia ʻo e tokotaha talitali kakaí.” Koeʻuhí ko e ngaahi tukufakaholo fakasōsiale ko ʻení, mahalo naʻe tonu pē ʻa e lāunga ʻa Maʻata ʻi he siʻaki ia ʻe Mele ke ne ngāue toko tahá. Naʻe fakamahinoʻi ʻe he tali ʻa e Fakamoʻuí ki he hohaʻa ʻa Maʻatá ʻoku māʻolunga ange ʻa e ngaahi meʻa ʻa e ʻOtuá ʻi he ngaahi tukufakaholo fakasōsialé, neongo kapau ko ha ngaahi tukufakaholo lelei kinautolu.

• Bonnie D. Parkin, “Choosing Charity: That Good Part,” Liahona, Nov. 2003, 104–6

• Camille Fronk Olson, “Māʻata mo Mele,” Liahona, Sune 2019, 26–27

• Lynn G. Robbins, “Kae Liunga Fitungofulu Lau ʻe Fitu,” Liahona, Mē 2018, 21–23

• John W. Welch, “The Good Samaritan: Forgotten Symbols,” Ensign, Feb. 2007, 41–47