“Ngāue 16–21,” Fuakava Foʻoú – Tohi Lēsoni maʻá e Faiako ʻInisititiutí (2025)
Ngāue 16–21
ʻOku ʻi he Ngāue 16–21 ha lekooti ʻo e ngāue fakafaifekau hono ua mo e tolu ʻa Paulá. ʻI hono tataki ʻe he Laumālié ʻa Paulá, naʻá ne fononga ʻi he ngaahi feituʻu kotoa ʻoku ʻiloa he taimí ni ko Toake mo Kalisí. Naʻá ne ʻilo heni ha kakai kuo nau mateuteu ke tali ʻa e ongoongolelei ʻo Sīsū Kalaisí, pea naʻá ne fokotuʻu ha ngaahi siasi lahi. Naʻe fai ʻe Paula ha malanga mahuʻinga ʻi he Moʻunga ko Māʻasí ʻi ʻAtenisi (vakai, Ngāue 17). Naʻe fehangahangai ʻa Paula ʻi ʻEfesō, mo e fakafepaki mei he kau fefakatauʻaki koloa fakalotofonuá mo e kau lotu ki he ʻotua tamapua ko Taianá. Naʻá ne fakatokanga ki he kau taki ʻo e Siasí ʻi ʻEfesoó fekauʻaki mo e ngaahi fakatuʻutāmaki ʻoku tuʻunuku maí mo e hē mei he moʻoní ʻi he Siasí.
Ngaahi Maʻuʻanga Tokoni Kehé
Ngaahi Tokoni Fakafolofolá: Fuakava Foʻoú, “Ngāue 16–21”
Fakatokangaʻi ange: ʻOku ʻomi ʻe he “Talateu ki he Kalasí” ha fakahinohino ki he founga hono fakaʻaongaʻi ʻo e ngaahi ʻelemēniti angamaheni ʻe fā ʻo e lēsoni ʻoku hoko maí.
Ko Hono Fakatupulaki ʻo e Ako Fakatāutahá
Kimuʻa pea kamata e kalasí, fakakaukau ke ʻoange ki he kau akó ha pōpoaki ʻe taha pe lahi ange mei he ngaahi pōpoaki ko ʻení pe ko haʻo pōpoaki pē ʻaʻau:
-
ʻI hoʻo lau ʻa e Ngāue 16–21 he uike ní, kumi ha ngaahi founga ʻoku fakamanatu atu ai kiate koe ʻa Sīsū Kalaisi ʻi he ngaahi ngāue ʻa Paulá. Fakakaukau ke fakaʻilongaʻi ʻa e ngaahi fakamoʻoni fakafolofola ʻokú ke maʻú koeʻuhí ke ke lava ʻo vahevahe ia ʻi he kalasí.
-
ʻOku founga fēfē hoʻo tuku ke lāngilangiʻia ʻa e ʻOtuá ʻi hoʻo moʻuí? Lau ʻa e Ngāue 16:6–15, 22–40; 18:5–11 ke vakai ki he founga naʻe tāpuekina ai ʻa Paula mo ha niʻihi kehe ʻi hono tākiekina ʻe he ʻEikí ʻenau moʻuí.
-
Te ke lava fēfē ʻo vahevahe ʻa e ongoongolelei ʻo Sīsū Kalaisí mo e kakai ʻoku kehe ʻenau tuí mei hoʻo tui ʻaʻaú? Lau ʻa e Ngāue 17:16–34 ke ako ki he founga naʻe vahevahe ai ʻe Paula ʻa e ongoongoleleí mo e kakai ʻAtenisí.
-
Kuó ke fifili nai ki he meʻa ke vahevahe fekauʻaki mo e ongoongoleleí mo kinautolu kuo nau ʻosi muimui ki he Fakamoʻuí? Ko e hā ʻokú ke ako ʻi he Ngāue 18:24–28; 19:1–7 mei he ngaahi angafai ʻa ʻAkuila, Pīsila, mo Paulá?
Ngaahi Fehuʻí mo e Vahevahé
Tuku ha taimi ki he kau akó ke nau ʻeke ha ngaahi fehuʻi mo fevahevaheʻaki ha ngaahi fakakaukau mo e ngaahi moʻoni naʻa nau ʻilo ʻi heʻenau ako fakataautaha ʻa e Ngāue 16–21.
Akoʻi ʻo e Taukeí
ʻE lava ke tokoni ʻa e Ngāue 20–21 ke fakaʻaongaʻi ai e taukei ko e “Ko e Tokanga Taha kia Sīsū Kalaisi ʻi he Folofolá” ʻi he Ngaahi Taukei Ako Folofolá.
Ngaahi ʻEkitivitī Ako ke Fili Mei Aí
ʻOku ʻoatu ha ngaahi founga ako lahi maʻau mo hoʻo kau akó. Fili ʻi he faʻa lotu ʻa e fili pe ngaahi fili ʻe mahuʻingamālie taha ki hoʻo kalasí.
ʻOku founga fēfē ʻeku tuku ke lāngilangiʻia ʻa e ʻOtuá ʻi heʻeku moʻuí?
Te ke lava ʻo fakaʻaliʻali e sivi fakafoʻituitui ko ʻení pea fakaafeʻi e kau akó ke fakakakato ia ʻiate kinautolu pē:
Fakaʻaongaʻi ha meʻafua ʻo e 1 ki he 10, fakafuofuaʻi ʻa e fakamatala takitaha (1 = meimei ʻikai ʻaupito; 10 = meimei maʻu pē).
-
Ko e ʻOtuá ʻa e ivi tākiekina mahuʻinga taha ʻi heʻeku moʻuí.
-
ʻOku muʻomuʻa e leʻo ʻo e ʻOtuá ʻi he ngaahi leʻo kehe kotoa pē.
-
ʻOku ou loto-fiemālie ke fakamuʻomuʻa ha meʻa pē ʻoku finangalo ʻa e ʻOtuá ke u fai, ʻi ha toe taumuʻa kehe.
Fakamatalaʻi ange te tau lava ʻo ako meia Paula mo e niʻihi kehé ʻa e founga te tau lava ai ʻo fakahoko e ngāue ʻa e ʻOtuá ʻi heʻetau fakaʻatā ke lāngilangiʻia Hono finangaló ʻi heʻetau moʻuí. Ke tokoni ke vakai e kau akō ki he fakahoko ʻa e moʻoni ko ʻení, ʻoange kiate kinautolu ʻa e laʻipepa tufa “Ko hono Tuku ke Lāngilangiʻia e Ivi Tākiekina ʻo e ʻOtuá ʻi Heʻetau Moʻuí.” Fakaafeʻi e kau akó ke fili e tefito ʻoku nau fie akó. Te nau lava leva ʻo faʻu ha fanga kiʻi kulupu iiki mo kinautolu naʻa nau fili ʻa e tefito tataú.
Ke fakaloloto e mahino ʻa e kau akó ki he moʻoni ko ʻení, te ke lava ʻo fakaʻaliʻali ʻa e fakamatala ko ʻeni meia Palesiteni Lāsolo M. Nalesoní. ʻOange ha taimi ki he kau akó ke nau fakakaukau ai ki heʻene ngaahi fehuʻí pea lekooti ʻenau ngaahi fakakaukaú mo e ongó. Poupouʻi e kau akó ke nau ngāue ʻo fakatatau mo ha faʻahinga ueʻi pē te nau maʻu.
ʻOkú ke loto-fiemālie ke tuku ke hoko ʻa e ʻOtuá ko e ivi tākiekina mahuʻinga taha ʻi hoʻo moʻuí? Te ke tuku nai ʻEne folofolá, ʻEne ngaahi fekaú, mo ʻEne ngaahi fuakavá ke e tākiekina e meʻa ʻokú ke fai ʻi he ʻaho kotoa pē? Te ke tuku nai Hono leʻó ke muʻomuʻa taha ʻi ha toe meʻa? ʻOkú ke loto-fiemālie nai ke fakamuʻomuʻa ha meʻa pē ʻokú Ne finangalo ke ke fai, ʻi ha toe meʻa kehe ʻokú ke fakaʻamua? … Siʻi kāinga ʻofeina, ʻi hoʻo fili ko ia ke tuku ke lāngilangiʻia ʻa e ʻOtuá ʻi hoʻo moʻuí, te ke aʻusia ʻiate koe pē ko hotau ʻOtuá ko “ha ʻOtua ʻo e ngaahi mana” [Molomona 9:11]. (“Tuku ke Lāngilangiʻia ʻa e ʻOtuá,” Liahona, Nōvema 2020, 94, 95)
Te u lava fēfē ʻo vahevahe ʻa e ongoongolelei ʻo Sīsū Kalaisí mo kinautolu ʻoku kehe ʻenau tuí meiate aú?
Fakaafeʻi e kau akó ke vahevahe nounou ha ngaahi sīpinga ʻe niʻihi ʻo e ngaahi tui ʻoku maʻu ʻe he kakaí ʻoku kehe mei heʻenau tuí. Fakamatalaʻi ange ʻi he taimi naʻe ʻalu ai ʻa Paula ki ʻAtenisí, naʻá ne fetaulaki ai mo ha kakai naʻe kehe ʻaupito ʻenau tuí meiate ia. (ʻE ala tokoni ke toe vakaiʻi ʻa e “Ngāue 17:15–32. Ko e hā ha ngaahi tui naʻe fehangahangai mo Paula ʻi ʻAtenisi?” ʻi he Ngaahi Tokoni Fakafolofolá: Fuakava Foʻoú.)
Fakaafeʻi e kau akó ke nau lau e Ngāue 17:16–31, ʻo kumi e founga naʻe teuteuʻi ai ʻe Paula ʻa e hala ke akoʻi ha ngaahi moʻoni mahuʻinga fekauʻaki mo e Tamai Hēvaní mo Sīsū Kalaisi ki he kakai ʻAtenisí. Hili hono ʻoange ha taimi ki he kau akó ke nau fekumi ai ʻi he folofolá, te ke lava ʻo fehuʻi ange:
-
Ko e hā e meʻa ʻokú ke mahuʻingaʻia ai ʻi he founga ʻa Paula ke akoʻi ʻa kinautolu ʻoku kehe ʻenau tuí mei heʻene tuí?
-
Naʻe fokotuʻu fēfē ʻe Paula ʻa e ngaahi tui naʻá ne tatau ai mo e kakai ʻi ʻAtenisí? (ʻE lava ke ʻiloʻi ʻe he kau akó ha ngaahi meʻa hangē ko ʻení: [1] naʻe fakapapauʻi ʻe Paula ʻa e mahuʻingaʻia ʻa e kakai ʻAtenisí ʻi he tui fakalotú, [2] naʻá ne ʻiloʻi e founga naʻa nau tali ʻaki ki he tui fakalotú, [3] naʻá ne fakafehokotaki e “ʻotua ʻoku ʻikai ʻiloá” ki he ʻOtua moʻoní, pea [4] naʻá ne fakaʻaongaʻi ha moʻoni mei ha punake ʻAtenisi pea tānaki atu ki he moʻoni ko iá.)
-
Hili hono maʻu ʻe Paula ʻa e ngaahi tui naʻá ne tatau ai mo e kakai ʻAtenisí, ko e hā ha ngaahi moʻoni naʻá ne akoʻi fekauʻaki mo e Tamai Hēvaní mo Sīsū Kalaisí? (ʻE ala ʻiloʻi ʻe he kau akó ha ngaahi moʻoni hangē ko ʻení: Naʻe fakatupu ʻe he ʻOtuá ʻa e māmaní. ʻOku foaki ʻe he ʻOtuá ʻa e moʻuí ki he meʻa moʻui kotoa pē. Naʻe tuku pau ʻe he ʻOtuá ʻa e kuonga mo e feituʻu ke nofo ai ʻa e kakai kotoa pē. Kapau te tau fekumi ki he ʻEikí, te tau lava ʻo maʻu Ia. Ko e hako kitautolu ʻa e ʻOtuá. ʻOku fekauʻi ʻe he ʻOtuá ʻa e tokotaha kotoa pē ke fakatomala. ʻE fakamaauʻi kitautolu ʻe he ʻOtuá ʻi he ʻaho fakaʻosí. Naʻe toetuʻu ʻa Sīsū Kalaisi.)
-
ʻE liliu fēfē ha moʻui ʻa ha taha ʻi hono ako e ngaahi moʻoni ko ʻení? Te ne liliu fēfē nai hoʻo moʻuí?
Ke tokoni ke akoako mo fakaʻaongaʻi ʻe he kau akó ʻa e meʻa ʻoku nau akó, te ke lava ʻo ʻai ke nau faʻu ha fanga kiʻi kulupu iiki pea aleaʻi ʻa e tūkunga ko ʻení. Fakaafeʻi e kau akó ke nau fakakaukau ki ha ngaahi tui tatau ʻoku nau maʻu mo Lūsia pea mo e founga te nau ala tokoni ai ki heʻene hohaʻá.
Naʻe ohi hake ʻa Lūsia ʻi ha ʻapi fakaemāmani (ʻikai fakalotu). ʻOku siʻi ʻene ʻilo ki he ngaahi akonaki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne toki ʻalu kimuí ni ki ha ʻoupeni hausi ʻa e temipalé peá ne ongoʻi nonga. Lolotonga ʻene ʻi he temipalé, naʻá ne fanongo ki ha ongo meʻa ʻokú na talanoa fekauʻaki mo e mahuʻinga hono ʻiloʻi ko e fānau kitautolu ʻa e ʻOtuá. Naʻá ne puputuʻu ʻi he fakakaukau ko ʻení. Naʻá ne fakakaukau ko e ʻOtuá ko ha mālohi pulipulia ia ʻi he ʻunivēsí. ʻOkú ne fifili pe te tau hoko fēfē ko ʻEne fānau.
Hili hono ʻoange ha taimi ki he kau akó ki he fealēleaʻaki fakakulupú, fakaafeʻi kinautolu ke vahevahe ʻa e founga te nau fokotuʻu ai ha ngaahi tui tatau mo Lūsiá. ʻAi ke vahevahe ʻe he kau akó ʻa e founga te nau lava ai ʻo akoʻi ange ko ha fānau ia ʻa e ʻOtuá. Pe te ke lava ʻo ʻai ke tulamaʻi ʻe he kau akó ʻa e founga te nau tali ʻaki kia Lūsiá.
Fakaafeʻi leva e kau akó ke nau fakakaukau ki ha taha ʻoku nau ʻiloʻi ʻoku ʻikai mahino kiate ia hono tuʻunga totonu ko ha fānau ʻa e ʻOtuá. ʻE lava ke lekooti ʻe he kau akó ha ngaahi founga te nau lava ai ʻo tokoni ke mahino lelei ange ki he tokotahá ni ʻa e foʻi moʻoni ko ʻení. Poupouʻi kinautolu ke nau fakakaukau ki he founga te nau lava ai ʻo muimui ki he sīpinga ʻo e akonaki mo e fakamoʻoni ʻa Paula kia Sīsū Kalaisi ʻo fakafou ʻi he Laumālié.
Ko e hā e ʻuhinga ʻe mahuʻinga ai ke vahevahe ʻeku tuí mo kinautolu kuo ʻosi muimui ki he Fakamoʻuí?
Fakaafeʻi e kau akó ke nau fakakaukau ki ha kaungāmeʻa pe maheni Kalisitiane ʻoku fekumi fakamātoato ke muimui ki he Fakamoʻuí. Mahalo ʻe vahevahe ʻe he kau akó ha meʻa ʻoku nau saiʻia ai fekauʻaki mo e tōʻonga moʻui honau ngaahi kaungāmeʻá.
-
Ko e hā e ʻuhinga ʻe mahuʻinga ai ke vahevahe ʻetau tuí mo e kau Kalisitiane kehé?
Fakamatalaʻi ange ko ʻAkuila mo Pīsilá ko ha ongomeʻa mali. Naʻá na tokoni fakatuʻasino mo fakalaumālie kia Paula ʻi heʻene ngāue fakafaifekaú. ʻOku ʻomi ʻe ʻAkuila, Pīsila, mo Paula ha ngaahi sīpinga ʻo e founga ke vahevahe ai ʻetau tuí mo kinautolu kuo nau ʻosi tui ki he Fakamoʻuí. Fakaafeʻi e kau akō ke nau lau e Ngāue 18:24–28 mo e Ngāue 19:1–7, ʻo kumi e meʻa naʻe fakahoko ʻe ʻAkuila, Pīsila, mo Paulá ke fakamālohia e tui ʻa e toenga ʻo e kakai tuí.
Fakakaukau ke ʻeke ange ʻa e ongo fehuʻi ko ʻení:
-
Ko e hā ‘okú ke mahuʻingaʻia ai fekauʻaki mo ʻApolosí? Ko e hā ʻokú ke mahuʻingaʻia ai fekauʻaki mo e kau ākonga naʻe akoʻi ʻe Paulá?
-
Ko e hā te tau lava ʻo ako mei he ngaahi sīpinga ʻa ʻAkuila, Pīsila, mo Paulá? (ʻE ala ʻiloʻi ʻe he kau akó ha moʻoni hangē ko ʻení: ʻI heʻetau vahevahe ʻa e kakato ʻo e ongoongoleleí mo e kau muimui kehe ʻo Sīsū Kalaisí, ʻe lava ke mahino lelei ange kiate kinautolu ʻa e founga ʻe lava ke faitāpuekina ai ʻe he ongoongoleleí ʻenau moʻuí.)
-
ʻE fakamālohia fēfē hoʻo tui kia Kalaisí ʻi hono vahevahe hoʻo ʻofa mo e fakamoʻoni kia Sīsū Kalaisí mo e kakai tui kehé?
ʻE lava ke vahevahe ʻe he kau akó ha ngaahi aʻusia kuo nau maʻu ʻi heʻenau talanoa fekauʻaki mo e ongoongoleleí mo e kau Kalisitiane kehé. ʻE lava ke aleaʻi ʻe he kau akó ʻa e meʻa naʻe ola leleí pe ko e meʻa naʻa nau mei lava ʻo fakahoko lelei angé.
Fakaafeʻi e kau akó ke nau hiki e ngaahi moʻoni, ngaahi faingamālie, mo e ngaahi tāpuaki ʻoku makehe ki he ongoongolelei ʻo Sīsū Kalaisi kuo fakafoki maí. Te ke lava ʻo hiki ʻenau talí ʻi he palakipoé. ʻE lava ke ngāue tautau toko ua pe fakakulupu iiki ʻa e kau akó pea aleaʻi ʻa e founga te nau lava ai ʻo vahevahe ʻa e ngaahi moʻoni ko ʻení mo e kau Kalisitiane kehé.
Ko e hā te u lava ʻo ako fekauʻaki mo Sīsū Kalaisí mei he moʻui ʻa Paulá?
Ko Hono Fakatupulaki ʻEtau Founga Akoʻí mo e Akó
Tukutaha e tokangá ki he ngaahi moʻoni ʻoku nau tataki ki he uluí mo langaki ʻa e tui kia Sīsū Kalaisí. Naʻe akonaki ʻa ʻEletā D. Toti Kulisitofāsoni ʻo pehē: “Ko e taumuʻa mahuʻinga taha ʻo e folofola kotoa pē ko hono fakafonu ʻaki hotau laumālié ʻa e tui ki he ʻOtua ko e Tamaí mo Hono ʻAlo ko Sīsū Kalaisí” (“Ko e Tāpuaki ʻo e Folofolá,” Liahona, Mē 2010, 34). ʻI hoʻo teuteu ke faiakó, fehuʻi pē kiate koe, “Ko e hā ʻe ako ʻe he kau akó ʻi he potufolofola ko ʻení ʻe lava ʻo tokoni ke nau ʻunuʻunu ofi ange ai ki he Fakamoʻuí?”
Te ke lava ʻo kamata ʻaki hano fakaʻaliʻali ʻa e fakatātā ko ʻeni ʻo e akonaki ʻa Paulá. Hili iá pea ʻeke leva e ngaahi fehuʻi ko ʻení.
Tā fakatātaaʻi ʻe Dan Burr
-
Ko e hā naʻe ongoʻi ʻe Paula fekauʻaki mo e Fakamoʻuí?
-
Ko e hā te tau lava ʻo ako fekauʻaki mo e Fakamoʻuí mei he moʻui ʻa Paulá?
Fakamatalaʻi ange ʻoku tau lava ʻo ako lahi ange fekauʻaki mo e Fakamoʻuí ʻo ʻikai ngata pē ʻi he ngaahi akonaki ʻa ʻEne kau ʻAposetoló mo e kau palōfitá kae fakafou foki ʻi heʻenau tōʻonga moʻuí. Te ke lava ʻo fakaʻaliʻali ʻa e lea ko ʻeni ʻa ʻEletā Pulusi R. Makongikií:
ʻOku ʻikai ha veiveiua ʻoku lahi ha ngaahi meʻa ne hoko ʻi he moʻui ʻa ha kau palōfita tokolahi naʻá ne fakamavaheʻi ai e kakai māʻoniʻoni ko iá ko ha ngaahi fakataipe mo e ʻata ʻo honau Mīsaiá. ʻOku mahuʻinga fau mo feʻunga ke tau fekumi ki he ngaahi faitatau ʻo Kalaisí ʻi he feituʻu kotoa pē pea ke toutou fakaʻaongaʻi kinautolu ʻaki haʻatau manatuʻi maʻu pē Ia mo ʻEne ngaahi fonó. (The Promised Messiah: The First Coming of Christ [1978], 453)
Ke tokoni ki he kau akó ke nau ako fekauʻaki mo e Fakamoʻuí mei he ngaahi ʻulungaanga, angafai, mo e sīpinga ʻa Paulá, te nau lava ʻo fakaʻaongaʻi e taukei ko e “Ko e Tokanga Taha kia Sīsū Kalaisi ʻi he Folofolá” ʻi he Ngaahi Taukei Ako Folofolá. Fakaʻaliʻali ʻa e ngaahi fehuʻi mo e potufolofola ko ʻení. Fakaafeʻi e kau akó ke nau lau e potufolofola takitaha pea fakaʻaongaʻi e ngaahi fehuʻí ke tataki kinautolu ʻi heʻenau akó.
Ko e hā ʻoku akoʻi atu ʻe he ngaahi angafai ʻa Paulá fekauʻaki mo Sīsū Kalaisi, ʻEne moʻuí, mo Hono misioná?
Ko e hā te ke lava ʻo ako fekauʻaki mo e tōʻonga mo e ngaahi ʻulungaanga ʻo Sīsū Kalaisí mei he sīpinga ʻa Paulá?
Hili hono ʻoange ha taimi feʻunga ki he kau akó ke nau akó, fakaafeʻi kinautolu ke vahevahe ʻa e meʻa ne nau ʻilo fekauʻaki mo e Fakamoʻuí ʻo fakafou ʻi he ngaahi ʻulungaanga, sīpinga, mo e angafai ʻa Paulá. ʻE lava foki ke vahevahe ʻe he kau akó ʻa e meʻa ʻoku nau ako fekauʻaki mo e Fakamoʻuí ʻo fakafou ʻi he moʻui ʻa e kau palōfita ʻo e kuonga muʻá mo onopōní fakatouʻosi.
Ke tokoni ke vakai e kau akó ki he founga te nau lava ai ʻo vahevahe ʻa e ongoongolelei ʻo Sīsū Kalaisí ʻo fakafou ʻi heʻenau ngaahi sīpingá, fakakaukau ke fehuʻi ange:
-
Ko hai ʻokú ke ʻiloʻi ʻokú ne fakamanatu atu kiate koe ʻa e Fakamoʻuí?
-
Ko e hā ha ngaahi ʻulungaanga ʻokú ke maʻu ʻoku tatau mo e Fakamoʻuí?
-
Ko e hā te ke lava ʻo fai ke hangē ange ai hoʻo moʻuí ko e Fakamoʻuí?