Sione 14–17

Fakakaukau ke aleaʻi ʻa e ngaahi meʻa ko ʻení:

Fakaafeʻi ʻa e kau akó ke lau ʻa e Sione 14:1–6, ʻo kumi ha foʻi moʻoni te nau lava ʻo vahevahe mo e kaungāmeʻa ʻi he talanoá. Fakakaukau ke lau ʻa e Sione 13:36–37 pea fakamahinoʻi ange ko e Sione 14:1–6 ko ha tali ia ki he hohaʻa ʻa Pita he ʻikai ke lava ʻo fononga mo e ʻEikí. Fakakaukau ke fehuʻi ange:

• Ko e hā e meʻa ʻoku akoʻi ʻe Sīsū Kalaisi fekauʻaki mo e moʻoní? (Tokoni ke ʻiloʻi ʻe he kau akó ha tefitoʻi moʻoni hangē ko ʻení: Ko Sīsū Kalaisi ʻa e halá, moʻoní, pea mo e moʻuí.)

• Ko e hā e ʻuhinga ʻoku mahuʻinga ai ke ʻiloʻi ko Sīsū ʻa e “halá, moʻoní, pea mo e moʻuí” kae ʻikai ko ha hala pē, ko ha moʻoni pē, pe ha moʻui peé? (Fakakaukau ke lau mo aleaʻi ʻa e Ngāue 4:12; Mōsaia 3:17.)

• ʻOku faitokonia fēfeeʻi hoʻo ʻiloʻi ko Sīsū ʻa e halá, moʻoní, pea mo e moʻuí” ʻa hoʻo tui kiate Iá? ʻE faitokonia fēfē ʻe he tui ko ʻení hoʻo ngaahi filí mo e ngāué?

Fakaafeʻi ʻa e kau akó ke nau lau ʻa e Sione 14:6–13 pea kumi ʻa e founga hono fakahaaʻi mai ʻe Sīsū Kalaisi ʻa e hala ki he Tamai Hēvaní.

• Kuo tokoniʻi fēfē koe ʻe he ngaahi akonaki, sīpinga, mo e Fakalelei ʻa Sīsū Kalaisí ke ke toe ofi ange ai ki he Tamai Hēvaní?

Ke fakaloloto e mahino ʻa e kau akó ki he Sione 14:6, fakaafeʻi ke nau fakaʻaongaʻi e meʻangāue fekumí ʻi he Gospel Library ke maʻu e ngaahi akonaki ʻa e kau taki ʻo e Siasí fekauʻaki mo e veesi ko ʻení (vakai ki he taukei “Ko Hono Fakaʻangaʻi ʻo e Ngaahi Akonaki ʻa e Kau Taki ʻo e Siasí ke Mahino ʻa e Folofolá” ʻi he Ngaahi Taukei Ako Folofolá). Poupouʻi ʻa e kau akó ke fakaʻilongaʻi mo tohiʻi ʻa e ngaahi kupuʻi lea ʻoku nau pehē ʻoku mahuʻingamālie tahá (vakai ki he taukei “Ko hono Fakakulupu ʻo e Ngaahi Folofolá mo e Ngaahi Akonaki Kehe ʻo e Ongoongoleleí” ʻi he Ngaahi Taukei Ako Folofolá).

ʻOange ha taimi ki he kau akó ke vahevahe ʻa e ngaahi akonaki ʻa e kau taki ʻo e Siasí ʻoku nau pehē ʻoku ʻaonga mo mahuʻinga-mālie tahá. ʻI he vahevahe ʻa e kau akó, te ke lava ʻo fai ha ngaahi fehuʻi ʻokú ne fakaafeʻi ʻa hono fakaʻaongaʻí, hangē ko e:

• Te ke fakaʻaongaʻi fēfē nai ʻa e akonaki ko ʻení ʻi hoʻo moʻuí?

• Ko e fē ha taimi kuo faitāpuekina ai koe ʻi haʻo moʻui ʻaki ʻa e akonaki ko ʻení?

Te ke ala fakaafeʻi ʻa e kau akó ke nau toe vakaiʻi ʻa e tūkungá mei he kamataʻanga ʻo e ʻekitivitī akó. Te nau ala aleaʻi ʻa e founga te nau tali aí ʻo fakatatau mo e meʻa kuo nau ako ʻi he ʻaho ní.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali ha vaʻa kuo tuʻusi mei ha fuʻu ʻakau, mei ha ʻakau iiki, pe kiʻi fuʻu ʻakau siʻisiʻi. Aleaʻi ʻa e meʻa ʻe iku ʻo hoko ki he vaʻá. Fakaafeʻi ʻa e kau akó ke nau lau ʻa e Sione 15:1–8 mo kumi ʻa e meʻa naʻe akoʻi ʻe he Fakamoʻuí ʻo ngāue ʻaki ʻa e talanoa fakatātā ki ha vaʻa naʻe motu mei he vainé.

• Ko e hā e meʻa ‘oku akoʻi mai ʻe he “vaine moʻoní” fekauʻaki mo Sīsū Kalaisí? Ko e hā e meʻa ʻe ala fakafofongaʻi ʻe he ngaahi fuá?

• Ko e hā e meʻa ʻoku akoʻi atu ʻe he talanoa fakatātā ko ʻení fekauʻaki mo hoʻo vā fetuʻutaki mo e Fakamoʻuí? (ʻE ala tala atu ʻe he kau akó ha tefitoʻi moʻoni hangē ko ʻení: ʻI heʻeku nofo ʻia Sīsū Kalaisí, te u fua ʻaki ha “fua lahi.”)

• Ko e hā ha ngaahi fua, pe ngaahi tāpuaki, kuo hoko ki hoʻo moʻuí ʻi hoʻo falala ki he Fakamoʻuí?

Fakakaukau ke aleaʻi ʻa e lea ko ʻeni ʻa Palesiteni Sefilī R. Hōlaní (pe te mou fili ke mamata ʻi he “Vaine Moʻoní” [2:37]):

ʻOku ʻuhinga ʻa e lea ngāue pe veape faka-Pilitānia ko e “nofó” … ke “tuʻu, pe nofo.” …

Naʻe folofola ʻa Sīsū ʻo pehē, “Ka [mou] māvae mo au, ʻe ʻikai te mou faʻa fai ha meʻa” [Sione 15:5]. … ʻOku tau fiemaʻu ʻa Kalaisi ʻi he meʻa kotoa pea ʻoku totonu ke tau “nofo” maʻu ʻiate Ia, ʻo tuʻu mālohi mo tuʻu maʻu ʻo taʻengata. Kuo pau ke tau pīkitai kiate Ia, ki he Fakamoʻui ʻo kitautolu kotoá, pea ki Hono Siasí, ʻa ia kuo fakahuafa ʻaki Hono huafa māʻoniʻoní, kae lava ʻo matala ʻa e fua ʻo e ongoongoleleí mo tāpuekina ʻetau moʻuí. Ko e Ia ʻa e vaine ʻoku hoko ko hotau maʻuʻanga ivi moʻoní pea mo e maʻuʻanga pē taha ʻo e moʻui taʻengatá. He ʻikai ngata pē ʻi heʻetau lava ‘o kātaki ‘iate Iá, ka te tau ikuna foki ʻi he ngāue māʻoniʻoni ko ʻeni he ʻikai ke teitei tōnounou ʻiate kitautolú. (“Abide in Me,” Liahona, May 2004, 32)

Fakaʻaliʻali ʻa e ngaahi fakamatala taʻe-kakato ko ʻení, pea fakaafeʻi ʻa e kau akó ke nau fakakakato ʻa ia ʻoku ongo taha kiate kinautolú. Pe, ko ha faʻu pē ʻe he kau akó haʻanau meʻa pē ʻanautolu.

• ʻI he fehangahangai mo ha palopalema faingataʻa ʻo e moʻuí, te u lava ʻo nofo ʻi he Fakamoʻuí ʻaki haʻaku …

• ʻI haʻaku ngaahi fehuʻi fekauʻaki mo e ongoongoleleí pe Siasí, te u lava ʻo nofo ʻi he Fakamoʻuí ʻaki haʻaku …

• ʻI hono fakamamahiʻi pe anga taʻe-totonu mai ha taha, te u lava ʻo nofo ʻi he Fakamoʻuí ʻaki haʻaku …

• ʻI he siʻi mālōlō ha taha ʻofaʻangá, te u lava ʻo nofo ʻi he Fakamoʻuí ʻaki haʻaku …

Fakaafeʻi ʻa e kau akó ke nau vahevahe mo fakamatalaʻi ʻenau ngaahi fakamatala kuo kakató. Poupouʻi ke nau hokohoko atu ʻi he kumi ha ngaahi founga te nau lava ai ke nofo kakato ange ʻia Kalaisi ʻi heʻenau moʻui fakaʻahó.

Foki ki he “Ngaahi ʻEkitivitī Ako ke Fili Mei Aí.”

Fakakaukau ke lau ʻa e lea ko ʻeni ʻa Palesiteni Sūsana H. Potá, pe mamata ʻi he “I Feel My Savior’s Love” (3:39). Hili ia pea toki aleaʻi ʻa e ʻuhinga ʻoku hoko ai hono aʻusia e ʻofa ʻa e ʻOtuá ko ha aʻusia liliu moʻuí.

3:40

ʻI hoʻomou ʻiloʻi pea mahino hono ʻofeina taʻe-hano-tatau kimoutolu ko ha fānau ʻo e ʻOtuá, ʻokú ne liliu e meʻa kotoa pē. (“ʻOfa ʻa e ʻOtua: Ko e Fakafiefia Taha ia ki he Laumalié,” Liahona, Nōvema 2021, 33)

Fakamatalaʻi ange ʻi he efiafi fakaʻosi ʻo e ngāue ʻa Sīsū ʻi he matelié, naʻá Ne akoʻi ha ngaahi moʻoni mahuʻinga ki heʻene kau ākongá fekauʻaki mo e ʻofá. Fakaafeʻi ʻa e kau akó ke nau ngāue ʻi ha fanga kiʻi kulupu ke ako ʻa e Sione 14:15–24; 15:9–14, ʻo kumi e ngaahi moʻoni fekauʻaki mo e ʻofá. Ke fakaloloto ʻenau mahino ki he meʻa naʻe akoʻi ʻe he Fakamoʻuí, te nau ala kumi ʻa e ngaahi fehokotaki ʻi he ʻofá mo e …

• Talangofuá.

• Tamai Hēvaní.

• Sīsū Kalaisi.

• Ko e Laumālie Māʻoniʻoní.

• Kakai Kehé.

(Ko e ngaahi moʻoni ʻe ala maʻu ʻe he kau akó ʻe kau ai ʻeni: Kapau ʻoku tau ʻofa ki he ʻEikí, te tau feinga ke tauhi ʻEne ngaahi fekaú. ʻOku talaʻofa ʻe he ʻEikí ʻa e Laumālie Māʻoniʻoní kiate kinautolu ʻoku ʻofa kiate Ia mo tauhi ʻEne ngaahi fekaú. ʻOku fekauʻi mai ke tau feʻofaʻaki ʻo hangē ko e ʻofa ʻa Sīsū ʻiate kitautolú.)

Te ke ala fakaafeʻi ʻa e ngaahi kulupú ke nau fakamatalaʻi ʻa e ngaahi moʻoni kuo nau maʻú. Fakakaukauʻi pe ʻe lava ke tokoni ha taha ʻo e ngaahi fehuʻi ko ʻení ke ongoʻi ʻe hoʻo kau akó ʻa e mahuʻinga ʻo e meʻa ʻoku nau akó:

• Ko e hā ha meʻa kuó ke ako mei he moʻui ʻa e Fakamoʻuí fekauʻaki mo e ʻofá mo e talangofuá?

• Ko e hā ha ongo kuó ke maʻu ʻi ha taimi naʻá ke tauhi ai ʻa e ngaahi fekaú koeʻuhí ko hoʻo ʻofa ki he Tamai Hēvaní mo Sīsū Kalaisí?

• Ko e fē ha taimi kuó ke ongoʻi ai e ʻofa ʻa e ʻOtuá ʻo fakafou ʻi he Laumālie Māʻoniʻoní? Naʻe tokoni fēfē ia kiate koé?

• Ko e fē ha taimi kuó ke ongoʻi ai e ʻofa faka-Kalaisí ki ha taha pe mei ha taha?

Ke fakaʻosi ʻa e ʻekitivitī ako ko ʻení, te ke ala fakaafeʻi ʻa e kau akó ke nau fakakaukau ki ha meʻa te nau lava ʻo fai ke lava ai ʻe he ʻofa ʻa e ʻOtuá ʻo liliu ʻenau moʻuí.

Fakatokangaʻi ange: ʻOku angamaheni ʻaki ke pehē ʻe he kakaí ʻoku ʻikai ha makatuʻunga ki he ʻofa ʻa e ʻOtuá. Kapau ʻe ʻohake ʻa e talanoa ko ʻení ʻi he kalasí, fakakaukau ke lau mo aleaʻi ʻa e fakamatala ko ʻeni ʻa ʻEletā D. Toti Kulisitofasoní:

ʻOku lahi ʻa e ngaahi founga ke fakamatalaʻi mo tau lāulea ai ki he ʻofa fakalangí. Ko e taha ʻo e ngaahi lea ʻoku tau faʻa fanongo ai he ʻaho ní ko e ʻofa ʻa e ʻOtuá ʻoku “ʻikai fai tuʻungaʻá.” Neongo ʻoku moʻoni ʻi ha tafaʻaki, ka ko e foʻi fakamatala ʻikai fai tuʻungaʻá ʻoku ʻikai ʻasi ia ʻi he folofolá. Ka, ʻoku fakamatalaʻi ʻEne ʻofá ʻi he folofolá ko ha “ʻofa lahi mo fakaofo” [Tokāteline mo e Ngaahi Fuakava 138:3, “ʻofa haohaoa” [1 Sione 4:18], “ʻofa huhuʻi” [ʻAlamā 5:26], mo e “ʻofa taʻengata” [Selemaia 31:3]. Ko ha ngaahi foʻi lea lelei ange ʻeni he ko e lea ʻikai fai tuʻungaʻá te ne lava ke ʻomi ha fakakaukau hala fekauʻaki mo e ʻofa fakalangí, hangē ko ʻení, ʻoku kātakiʻi ʻe he ʻOtuá e meʻa kotoa pē pea ʻoku ʻikai ke Ne fakamāuʻi kitautolu he ko ʻEne ʻofá ʻoku ʻikai fai tuʻungaʻa, pe ʻoku ʻikai ʻekeʻi ʻe he ʻOtuá ha meʻa meiate kitautolu he ko ʻEne ʻofá ʻoku ʻikai fai tuʻungaʻa, pe ʻoku fakamoʻui e taha kotoa ʻi he puleʻanga ʻo e ʻOtuá he ko ʻEne ʻofá ʻoku ʻikai fai tuʻungaʻa. Ko e ʻofa ʻa e ʻOtuá ʻoku taʻe-fakangatangata pea ʻe tuʻuloa ʻo lauikuonga, ka ko ʻene fekauʻaki mo kitautolú ʻe makatuʻunga ia ʻi he meʻa ʻoku tau fai ki Heʻene ʻofá. (“Nofo Maʻu ʻi Heʻeku ʻOfá,” Liahona, Nōvema 2016, 48)

Foki ki he “Ngaahi ʻEkitivitī Ako ke Fili Mei Aí.”

Fakakaukau ke fakaʻaliʻali ʻa e lea ko ʻeni naʻe fai ʻe Palesiteni Lāsolo M. Nalesoni.

ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní. (“Fakahā maʻá e Siasí, Fakahā ki Heʻetau Moʻuí,” Liahona, Mē 2018, 96)

Fakaafeʻi ʻa e kau akó ke nau fakamatalaʻi ʻa e ʻuhinga “he ʻikai lava ai ke tau moʻui fakalaumālie” taʻe kau ai ʻa e Laumālie Māʻoniʻoní.

Fakamatalaʻi ange ʻi he lolotonga ʻo e efiafi fakaʻosi ʻo ʻEne ngāue ʻi he matelié, naʻe palōmesi ʻa Sīsū te ne fekauʻi mai ʻa e Laumālie Māʻoniʻoní ki Heʻene kau ākongá. Naʻá Ne akoʻi ange ʻa e ngaahi moʻoni mahuʻinga kāfakafa ʻe lava ke maʻu ʻe he Laumālie Māʻoniʻoní ʻi heʻetau moʻuí.

Fakaafeʻi ʻa e kau akó ke nau kumi ʻi he Sione 14:16, 26–27; 15:26–27; 16:13–14 ha ngaahi founga kehe ke fakakakato ai ʻa e fakamatala ko ʻení ke fakahaaʻi ha foʻi moʻoni naʻa nau ako: Ko e Laumālie Māʻoniʻoní … ʻE lava ke fakahoko fakakalasi ʻeni ʻe he kau akó pe ʻi ha fanga kiʻi kulupu iiki. Pea fakaafeʻi ʻa e kau akó ke nau hiki ʻenau fakamatalá ʻi he palakipoé. (Poupouʻi ʻa e kau akó ke nau fakaʻilongaʻi pe hikiʻi ʻa e ngaahi moʻoni ʻoku nau maʻú.)

Ko ha ngaahi founga ʻeni ʻe lava ke fakakakato ai ʻe he kau akó ʻa e fakamatalá:

Ko e Laumālie Māʻoniʻoní …

• ʻokú ne akoʻi kitautolu ʻi he meʻa kotoa pē. (Sione 14:26)

• fakamanatu kiate kitautolu ʻa e meʻa kotoa pē. (Sione 14:26)

• ʻomai ʻa e melinó. (Sione 14:27)

• fakafiemālie. (Sione 14:16; 15:26)

• fakamoʻoni kia Kalaisi. (Sione 15:26)

• tataki kitautolu ki he moʻoni kotoa pē. (Sione 16:13)

• fakahaaʻi mai ʻa e ngaahi meʻa ʻe hoko maí. (Sione 16:13)

• fakaongoongoleleiʻi ʻa e Fakamoʻuí. (Sione 16:14)

Fakaafeʻi ʻa e kau akó ke fakakaukau ki ha taimi naʻe tākiekina ai kinautolu ʻe he Laumālie Māʻoniʻoní ʻi ha taha ʻo e ngaahi founga kuo hiki he palakipoé. ʻE lava ke vahevahe ʻe he kau akó ʻenau aʻusiá mo hano hoa, kiʻi kulupu, pe kalasí.

ʻOku angamaheni pē ke ʻi ai ha ngaahi fehuʻi ʻa e kau taautaha kei talavoú fekauʻaki mo e founga ʻoku ngāue ai ʻa e Laumālie Māʻoniʻoní ʻi heʻenau moʻuí. Te ke lava ʻo fakaʻaliʻali ʻa e ngaahi fehuʻi ʻi laló pea kole ki he kau akó ke nau fili ha fehuʻi ʻoku nau ongoʻi ʻoku fekauʻaki taha mo kinautolú. Pea fakaafeʻi leva ʻa e kau akó ke nau fakakaukau ko ha taki faka-Siasi kinautolu ʻi ha fakataha lotu Mata ki he Mata, pea kuo fai ai ʻa e fehuʻi naʻa nau filí. Fakaafeʻi ʻa e kau akó ke nau fakamatalaʻi ʻenau ngaahi talí.

Kapau ʻe ʻaonga, te ke ala vahevahe ha taha pe toe lahi ange ʻo e ngaahi vitiō ko ʻení ke ʻilo ʻa e founga kuo tali ai ʻe ha niʻihi kehe, kau ai e kau taki ʻo e Siasí, ʻa e ngaahi fehuʻi ko ʻení.

• “ How can I tell the difference between the Holy Ghost and my emotions? ” (4:39)

  

  4:39

• “ How can I feel the Holy Ghost more often? ” (4:12)

  

  4:12

• “How does the Holy Spirit guide?” (3:25)

  

  3:25

Fakaafeʻi ʻa e kau akó ke nau talaatu ha faʻahinga meʻa te nau lava ʻo fai ke fakaafeʻi ʻa e Laumālié ki heʻenau moʻuí.

Foki ki he “Ngaahi ʻEkitivitī Ako ke Fili Mei Aí.”

Fakaafeʻi ‘a e kau akó ke fakakaukau ki ha taimi ne nau lotua ai ha taha kehe pe ko ha taimi ne nau fanongo ai ki ha lotua kinautolu ‘e ha taha pe ha ni’ihi kehe. ʻAi ha toko taha pe toko ua ʻo e kau akó ke na vahevahe ʻa e meʻa naʻá na ongoʻí.

Fakamanatu ki he kau akó naʻe lotua kitautolu ʻe he Fakamoʻuí kimuʻa peá Ne hāʻele ki he Ngoue ko Ketisemaní. ʻOku ʻiloa ʻeni ko e Lotu Hūfakí. Fakamahinoʻi ange ko e taha taukapó ko ha taha ʻokú ne taukapoʻi pe tautapa maʻá ha taha kehe.

Fakaafeʻi ʻa e kau akó ke nau ako tautau toko ua pe fakakulupu iiki ʻa e Sione 17:3, 11–17, 22–26 pea fakaʻilongaʻi ʻi heʻenau folofolá ʻa e founga te nau lava ai ʻo fakakakato ʻa e fakamatala ko ʻení: Naʻe lotu ʻa Sīsū Kalaisi ke tau …

Hili hano maʻu ʻe he kau akó ha taimi feʻunga ke laukonga aí, kole ange ke nau lipooti ʻa e meʻa kuo nau ʻiló pea mo hiki ʻenau talí ʻi he palakipoé. ʻE ala peheni hoʻo lisi kuo kakató: Naʻe lotu ʻa Sīsū Kalaisi ke tau …

• maʻu ʻa e moʻui taʻengatá. (Sione 17:2–3)

• ʻiloʻi ʻa e Tamai Hēvaní mo Sīsū Kalaisi. (Sione 17:3)

• ke kei (maluʻi) ʻe he Tamai Hēvaní. (Sione 17:11)

• hoko ʻo taha, ʻo hangē ko ʻEne taha mo ʻEne Tamaí. (Sione 17:11, 21–23)

• maluʻi mei he kovi ʻo e māmaní. (Sione 17:11, 14–16)

• maʻu ʻEne fiefiá. (Sione 17:13)

• fakamāʻoniʻoniʻi. (Sione 17:17, 19)

• hoko ʻo haohaoá. (Sione 17:23)

• nofo mo Ia. (Sione 17:24)

• maʻu e ʻofa ʻa e Tamaí. (Sione 17:26)

Ka kakato ʻa e lisí, te ke ala fehuʻi ange:

• Ko e hā e meʻa ʻoku akoʻi atu ʻe he lotu ko ʻení fekauʻaki mo mo Sīsū Kalaisi mo e Tamai Hēvaní?

• Ko e hā hoʻo ongo fekauʻaki mo e Fakamoʻuí, ʻi hoʻo ʻiloʻi ko ʻeni ʻoku finangalo ke ke maʻu ʻa e ngaahi tāpuaki ko ʻení?

Ke tokoni ke mahino ki he kau akó ʻa e fekauʻaki ʻa e Lotu Hūfakí mo ʻEne Fakaleleí, fakamanatu ange naʻá Ne fai ʻa e lotu ko ʻení kimuʻa pē pea mamahi ʻi he ngoué. Tamateʻi ʻa e fakamatala taʻe-kakato “Naʻe lotu ʻa Sīsū Kalaisi ke tau lava ʻo …” pea fetongi ʻaki ia ʻa e “Koeʻuhí ko e Fakalelei ʻa Sīsū Kalaisí, te tau lava ʻo …”

• Ko e hā ha fekauʻaki ʻoku mou lava ʻo fakatokangaʻi ʻi he Lotu Hūfakí mo e Fakalelei ʻa Sīsū Kalaisí? (Tokoni ke ʻiloʻi ʻe he kau akó ʻa e foʻi moʻoni koeʻuhí ko e Fakalelei ʻa Sīsū Kalaisí, te tau ala lava maʻu ai ʻa e ngaahi tāpuaki naʻá Ne lotua ʻi Heʻene Lotu Hūfakí.)

• Ko e hā hoʻo ongo fekauʻaki mo e Fakamoʻuí, ʻi hoʻo ʻilo naʻá Ne foaki ʻEne moʻuí kae lava ke ke maʻu ʻa e ngaahi tāpuaki ko ʻení?

Fakakaukau ke kole ki he kau akó ke nau toe vakaiʻi ʻa e lisi ʻi he palakipoé pea fili ha tāpuaki ʻe taha pe ua te nau fiemaʻu ʻi heʻenau moʻuí. Fakaafeʻi ʻa e kau akó ke nau lotu maʻu pē ke foaki ange ʻe he ʻEikí ʻa e ngaahi tāpuaki ko iá.

Foki ki he “Ngaahi ʻEkitivitī Ako ke Fili Mei Aí.”